Koht ketin mahsanihong Adam: “Ma ke pahn tungoale, ke pahn mehkihla rahnohte.” (Senesis 2:17) Sohte kahrepen Koht en ketikihong Adam kehkehlik wet, ma e ketin kapikada Adam en mahla oh mehla. Adam ese me ma e sohte pahn kang wahntuhkeo, e sohte pahn mehla.

Adam oh Ihp sohte anahne kang wahntuhkeo pwe ira en pousehlahte momour​—mie soangsoangen tuhke tohto me mie wahrail nan mwetuwelo. (Senesis 2:9) Sang ara sohte pahn kang wahntuhkeo, tepin pwopwoudo pahn kasalehda ara peikiong Meno me ketikihong ira ara mour. E pil pahn kasalehda me ira pohnese sapwellimen Koht pwuhng en ketin padahkihong ira dahme ira pahn kin wia.

Pwehn wehwehki kahrepen Adam oh Ihp ara mehla, kitail anahne tehk duwen koasoakoasoipene ehu me pidada kitail koaros. Sehdan me Tepil doadoahngki serpent men pwehn wiahda karaun likamw ehu. Paipel mahsanih: “Eri, sineik ih mahn me keieu mwersuwed nanpwungen mahn akan me KAUN-O Koht ketin wiahda. E ahpw idekda rehn liho, ‘Mehlel apwoat me Koht ketin keinepwihsang kumwa en dehr tungoale wahntuhke kan en nan mwetuwelet?’”​—Senesis 3:1.

Ihp eri sapengki: “Se kak tungoale wahntuhke koaros en mwetuwelet, ihte wahntuhke me mi nanwerengeo me se sohte kak tungoale. Koht ketin keinepwihsang kiht wahntuhke pwoatet se en dehr tungoale de sair, pwe se de mehkihla.” Sineiko ahpw sapengki liho, “Likamw pwoat men; kumwa sohte pahn mehla. Koht mahsanih men pwehki eh mwahngih me ni ahnsowohte me kumwa pahn tungoale wahntuhkehn, kumwa pahn marainla oh duwehla Koht, pwe kumwa pahn esehla dahme mwahu oh dahme suwed.” Ih kahrepe wet me Sehdan nda me Siohwa sounlikamw men me sohte kupwurki Adam oh Ihp ira en ahneki mehkot mwahu.​—Senesis 3:2-5.

Ihp kamehlele dahme e rong. E ahpw kangkakil tuhkeo. E lingankihda tuhkeo, oh uhdahn men ale! Ih eri ale ekei wahntuhkeo oh tepida kang. Paipel eri mahsanih: “E ahpw pil kihong eh pwoudo pwe en pil iang tungoale. Eh pwoudo ahpw pil iang tungoale.”​—Senesis 3:6.

Ia uwen met eh kansensuwedihala Koht ni eh ketin mahsanih me sapwellime seri kompoak kan pein pilada ira en sapeikiong ih! Dahme e ketin wia? Siohwa ketin mahsanihong Adam: “Ke pahn . . . pwurehng wiepwella, me ke wiawihda sang ie.  Pwe ke wiawihda sang pwehl oh ke pahn pwurehng wiepwella.” (Senesis 3:17-19) Pwehki met, “e ahpw sipalla ni eh sounpar 930.” (Senesis 5:5) Adam sohte pousehlahte momour nan ehu wasa tohrohr me duwehte nanleng. E sohte mi wasa kis mwohn Siohwa eh ketin kapikada ih sang ni pwehl. Eri ni ahnsou me e mehla, e wiahla pwehl me e kepikipikda sang ie, mehkot ehu me sohte kin momour. E sohla mie. Ia uwen kansensuwed!

Pwehki ara pein pilada ira en sapeik, Adam oh Ihp katihasang ara mour unsek oh koapworopwor en mour kohkohlahte. Ira kehn me paliwarara kan wekidekla; ira sohla unsek oh ira dipanla. Ahpw ara dipikihda sapeik sohte ongete ira. Ira kadaur ara irair en dihpo ong kadaudokara kan. Rom 5:12 mahsanih: “Sang rehn aramas tehmen dihp leledohng sampah oh mehla sang ni dihp, ihme kahrehda mehla lelohngehr aramas koaros pwe irail koaros dipadahr.”

Paipel kawehwehda me dihp oh mehla duwehte “depwek en pahtou me mihmi pohn wehi koaros.” (Aiseia 25:7) Depwek wet kapilpene aramas duwehte ahng pwoisin ehu me aramas sohte kak pitsang. Ni mehlel, “koaros . . . mehla pwehki Adam.” (1 Korint 15:22) Peidek me wahnpoaron Pohl idek iei: “Ihs me pahn kapitiehla sang ni paliwar me kin kahluwaielahng soangen mehla wet?” Mie me pahn kak wia met?​—Rom 7:24.