“Maing, KAUN, ia erein ei kin patohwan liklikweriong komwi oh peksawas, a komwi ahpw sohte ketin karonge oh doareikitasang nan at apwal laud?” (Apakuk 1:2, 3) Lokaia pwukat iei en Apakuk, ohl mwahu men me Koht ketin kupwurperenki. Ia duwe, eh pekipek kasalehda me eh pwoson tikitik? Uhdahn soh! Koht ketin kamehlelehiong Apakuk me E ketin koasoanedier ahnsou ehu me e pahn ketin kauhdi lokolok.​—Apakuk 2:2, 3.

E mengei en nda me Koht ketin pwapwand ni eh anahnehier wia mehkot, ahnsou me kowe de emen me ke karanih wie lokolok. Ahpw, Paipel kamehlelehiong kitail: “Siohwa sohte kin ketin pwapwand en kapwaiada sapwellime inou, duwen ekei ar kin lemeleme, ahpw e kin ketin kanengamahiong kumwail pwehki e sohte kin ketin kupwurki emen en kasohrala ahpw e ketin kupwurki aramas koaros en koluhla.”​—2 Piter 3:9.

Kereniong e pahn ketin mwekid! Sises ketin kasalehda me dih tohrohr ehu pahn kadehdehda duwen irair tohrohr kan me pahn wia kilel en imwin rahn akan en “koasoandi en mwehi wet.” (Madiu 24:3-42) Pweidahn kokohp en Sises nan atail ahnsou kin kasalehda me kereniong Koht pahn ketin wia mehkot ong wiewiahn aramas akan. *

Ahpw ia duwen Koht eh pahn ketin kauhdi lokolok koaros? Ni ahnsou me Sises ketiket nin sampah, e ketin kasalehda sapwellimen Koht manaman en katikala ahn aramas akan kahpwal. Tehk ekei karasepe kan.

Kahpwal en Mesenleng: Nindoken Sises oh sapwellime wahnpoaron ko ar senserek pohn Sehd en Kalili, lapalahn kisinieng ehu kereniong kakihrala wararail pwohto. Ahpw Sises ketin kasalehda me ih oh Semeo kak ketin kaunda mwekid en mesenleng. (Kolose 1:15, 16) Ihte me Sises mahsanih iei, “Tokedi! Meleileidi!” Ia imwilahn met? “Kisiniengo eri mwelehdi, e ahpw meleileidi kowahlap.”​—Mark 4:35-39.

Soumwahu: Aramas tohto kin ese me Sises kak ketin kamwahwihala me maskun oh mwoator kan oh pil irail kan me lokolongki soumwahu en rerrer, tokutok, de soangen soumwahu teikan. “E ketin kamwahwihala koaros me lokolok.”​—Madiu 4:23, 24; 8:16; 11:2-5.

Lehk Lapalap: Sises ketin doadoahngki manaman me Semeo ketikihong pwehn kadirehla mwenge malaulau ko. Paipel mahsanih me erein sapwellime doadoahk en kalohk, pak riau e ketin kamwengehda meh kid kei.​—Madiu 14:14-21; 15:32-38.

Mehla: Siohwa eh ketin sapwellimanki manaman en katokehdi mehla kin sansalda sang kaiasada siluh me kileldi me Sises ketin wia. Emen irail me e ketin kaiasada, melahr erein rahn pahieu.​—Mark 5:35-42; Luk 7:11-16; Sohn 11:3-44.