Algo cu por yuda hopi ta e consuelo cu nos ta ricibi di famia, amigo y rumannan den fe.

Palabranan bondadoso y agradabel di un amigo ta manera enguente suavisante y refrescante. (Prov. 16:24; 18:24; 25:11) Pero cristiannan berdadero no ta pensa solamente riba nan necesidad pa consuelo. Nan ta haci esfuerso pa “consola otro hende cu ta den cualkier tipo di tribulacion cu e consuelo cu [nan mes] a ricibi di Dios.” (2 Cor. 1:4; Luc. 6:31) Antonio, un superintendente di districto na Mexico, a experencia esaki personalmente.

Ora Antonio a haya sa cu e tin linfoma, un tipo di cancer di sanger, el a bira masha tristo. A pesar di esey, el a haci hopi esfuerso pa no desespera. Kico e tabata haci? Entre otro, el a purba di siña e canticanan di Reino for di cabes, canta nan na bos halto y medita riba e letranan. Oracion na bos halto y lesamento di Bijbel tambe a resulta di ta un gran consuelo p’e.

Pero segun Antonio, un di e cosnan cu mas a yud’e ta e sosten cu el a ricibi di su rumannan den fe. El a bisa: “Ora ami cu mi esposa tabata sinti nos aplasta, nos tabata pidi un famia di nos, cu ta un anciano den congregacion, pa bin haci oracion cu nos. Esaki tabata consola y trankilisa nos.” Antonio a sigui bisa: “En realidad, ta danki na e sosten di nos famianan y nos rumannan den fe cu nos por a supera e situacion dificil aki bastante lihe.” El a keda hopi agradecido na su amigonan atento y compasivo.

Un otro cos cu por yuda nos den tempo dificil ta spirito santo, esta, e forsa y poder cu Jehova a priminti di duna su sirbidornan. Y apostel Pedro a bisa cu Dios ta duna spirito santo “libremente.” (Echo. 2:38) Un prueba di esaki ta e echo cu Dios a drama su spirito santo riba hopi hende na Pentecoste di aña 33 di nos era. Aunke Pedro tabata referi na rumannan ungi, nos tur por ricibi Dios su spirito santo. Siendo cu Dios ta duna su spirito santo na abundancia, pakico no pidie duna nos esaki abundantemente?—Isa. 40:28-31.

Apostel Pablo a pasa den hopi tribulacion; tabatin biaha, cu hasta el a hera muri. (2 Cor. 1:8-10) No obstante, e no tabatin un miedo insaludabel di perde su bida. Loke a consol’e tabata e echo cu e tabata sa cu e por a conta cu Jehova su yudansa. El a skirbi: “Alaba sea e Dios y Tata di nos Señor Hesucristo, e Tata di tierno misericordia y Dios di tur consuelo, kende ta consola nos den tur nos tribulacionnan.” (2 Cor. 1:3, 4) Pablo no a laga e tribulacionnan hacie deprimi. Al contrario, e pruebanan aki a hacie un persona mas comprensivo, di manera cu e tabata mihor prepara pa yuda otronan den dificultad.

Despues cu Antonio a recupera, e por a sigui traha como superintendente biahero. Semper el a mustra interes den su rumannan den fe, pero awor e cu su esposa ta haci esfuerso extra pa bishita rumannan cu ta malo. Por ehempel, ora Antonio a bishita un ruman cu tabata lucha cu un maleza grave, el a haya sa cu e ruman no tabata kier bay reunion mas. Antonio a splica: “No cu e ruman no tabata stima Jehova y su rumannan den fe mas, pero e maleza a afect’e asina tanto cu e tabata sintie inutil.”

Pa anima e ruman homber aki, Antonio a pidie haci oracion na un get-together cu nan tabatin recientemente. Maske e ruman a sintie incomodo, el a acepta pa haci oracion. Antonio a bisa: “Su oracion tabata masha bunita, y despues di esey tabata comosifuera el a bira un otro persona. El a sintie util atrobe.”

Si, nos tur a yega di pasa den un of otro sufrimento. Pero manera Pablo a bisa, esaki por prepara nos pa consola otronan cu ta den un situacion dificil. Pesey, laga nos ta atento pa ora nos rumannan ta sufri, nos por imita nos Dios, Jehova, y consola nan.