ЧОН Куин ӕмӕ Джули сты лӕг ӕмӕ ус, сӕ иуыл дӕр ӕмӕ иннӕйыл дӕр цӕуы 35 азы бӕрц. Фондз азы размӕ ӕххӕстрӕстӕг пионертӕй лӕггад кодтой Сиднейы (Австрали). Куин дзуры: «Нӕ дыууӕ дӕр куыстам, ӕнӕхъӕн бон кӕм нӕ хъуыди кусын, ахӕм ран ӕмӕ нӕхицӕн ӕнӕмӕт цард кодтам. Кӕм цардыстӕм, уым климӕт хорз уыд ӕмӕ дзы цӕрын дӕр ӕнцон уыди. Нӕ хиуӕттӕм ӕмӕ не ’мбӕлттӕм дӕр хӕстӕг уыдыстӕм». Фӕлӕ уӕддӕр Куин ӕмӕ Джулийӕн цыдӕр ӕнцой нӕ лӕвӕрдта. Цымӕ цы? Ӕмбӕрстой йӕ, фадат сын кӕй ис фылдӕр лӕггад кӕнынӕн. Фӕлӕ сӕ царды уаг фӕивынмӕ сӕ ныфс нӕ хастой.

2009 азы сын конгрессы иу раныхас сӕ зӕрдӕтӕ тынг бацагайдта. Ӕфсымӕрӕн йӕ ныхас уыди, фылдӕр лӕггад кӕныны фадат кӕмӕн ис, уыдонмӕ. Йӕ раныхасы ахӕм ныхӕстӕ загъта: «Ахъуыды-ма кӕн ахӕм цӕвиттоныл: машинӕ галиуырдӕм кӕнӕ рахизырдӕм фӕзилӕн ис, ӕрмӕстдӕр цӕугӕ куы кӕна, уӕд. Уӕдӕ мах дӕр фылдӕр лӕггад кӕнын куы фӕнда, уӕд нын Йесо разамынд дӕтдзӕн, размӕ куы цӕуӕм, ома уыцы хъуыддаджы ӕппӕт тыхтӕй куы архайӕм, ӕрмӕстдӕр уӕд» *. Куин ӕмӕ Джулимӕ афтӕ фӕкаст, цыма уыцы ныхӕстӕ комкоммӕ уыдонӕн дзырдта. Стӕй ма уыцы конгрессы интервью райстой, Тайваны миссионерӕй чи лӕггад кӕны, ахӕм лӕг ӕмӕ усӕй. Уыдон радзырдтой, сӕ лӕггад сын цы циндзинад хӕссы, уый тыххӕй. Стӕй загътой, нырма дӕр дзы стыр ӕххуыс кӕй хъӕуы. Ӕмӕ та ацы ныхӕстӕ дӕр Куин ӕмӕ Джули сӕхимӕ айстой.

Джули та загъта: «Уыцы конгрессы фӕстӕ Йегъовӕмӕ скуывтам, цӕмӕй нын ахӕм ныфс радтаид, ӕмӕ нӕ бон бауыдаид Тайванмӕ ацӕуын». Ӕмӕ ма йӕ ныхӕстӕм ноджыдӕр бафтыдта: «Фӕлӕ уӕддӕр тарстыстӕм, сывӕллон фыццаг хатт арф донмӕ ныггӕпп кӕнын куыд фӕтӕрсы, афтӕ». Уыцы арф донмӕ «ныггӕпп кӕнынӕн» сын баххуыс кодта Екклесиаст 11:4. Уым фыст ис: «Дымгӕмӕ йӕ хъус чи дары, уый ницы байтаудзӕн, ӕмӕ мигътӕм чи кӕсы, уый ницы ӕркӕрддзӕн». Куин зӕгъы: «Нӕхицӕн загътам, дымгӕмӕ нӕ хъус кӕй нал дардзыстӕм ӕмӕ мигътӕм кӕй нал кӕсдзыстӕм, фӕлӕ уый бӕсты тауын ӕмӕ кӕрдын кӕй райдайдзыстӕм». Уый тыххӕй фылдӕр кувын райдыдтой, стӕй миссионерты биографитӕ кастысты ӕмӕ, Тайванмӕ лӕггад кӕнынмӕ чи ацыд, ахӕм ӕфсымӕртӕ ӕмӕ хотимӕ кӕрӕдзимӕ компьютерӕй писмотӕ фыстой. Гъемӕ ӕртӕ мӕймӕ сӕ машинӕтӕ ӕмӕ сӕ мебель ауӕй кодтой ӕмӕ Тайванмӕ ӕрцыдысты.

Ныртӕккӕ Тайваны алы рӕтты, хъусынгӕнджытӕ кӕм нӕ фаг кӕны, уым, лӕггад кӕны 100 ӕфсымӕр ӕмӕ хойӕ фылдӕр алы бӕстӕтӕй. Уыдон ӕрцыдысты Австралийӕ, Великобританийӕ, Канадӕйӕ, Францийӕ, Японийӕ, Корейӕ, Испанийӕ ӕмӕ Америкӕйы Иугонд Штаттӕй. Уыцы ӕфсымӕртӕ ӕмӕ хотӕ сты алы кары. Ӕппӕты кӕстӕрыл дзы цӕуы 21 азы, ӕппӕты хистӕрыл та – 73 азы бӕрц. Уыдонӕй 50 фылдӕр сты, чындзыцыд чи нӕу, ахӕм хотӕ. Уыцы зынгзӕрдӕ ӕфсымӕртӕ ӕмӕ хотӕн цы ӕххуыс кӕны ӕндӕр бӕстӕйы лӕггад кӕнынӕн? Базонӕм ӕй.

Нӕ хо Лаурӕ у Канадӕйӕ, пионерӕй лӕггад кӕны Тайваны ныгуылӕн хайы. Фӕлӕ иу-дӕс азы размӕ хъусын кӕнын ӕппындӕр нӕ уарзта. Уый зӕгъы: «Уыйбӕрц никуы хъусын кодтон, цӕмӕй уыцы хъуыддаг бауарзтаин». Фӕлӕ йӕ иуафон Канадӕйы йе ’мбӕлттӕ иу мӕймӕ семӕ хъусын кӕнынмӕ акодтой Мексикӕмӕ. «Уӕд афтӕ бирӕ фыццаг хатт лӕггад кодтон ӕмӕ мӕ зӕрдӕмӕ тынг фӕцыди, кӕд уый ӕнхъӕл нӕ уыдтӕн, уӕддӕр».

Фӕстӕмӕ Канадӕмӕ куы ’рыздӕхтысты, уӕд Лаурӕ сфӕнд кодта, ӕндӕр ӕвзагыл кӕй уадзынц, ахӕм ӕмбырдмӕ рахизын. Китайаг ӕвзаджы курсытӕм йӕхи ныффыссын кодта ӕмӕ китайаг къордимӕ райдыдта лӕггад кӕнын. Ӕмӕ йӕ разы ахӕм нысан сӕвӕрдта, цӕмӕй Тайванмӕ ацыдаид. Йӕ нысан йӕ къухы бафтыд 2008 азы сентябры. Лаурӕ радзырдта: «Цӕмӕй ног уавӕртыл сахуыр уыдаин, уый тыххӕй мӕ бахъуыд иу аз. Фӕлӕ, фӕстӕмӕ Канадӕмӕ аздӕхон, ахӕм хъуыды мӕм никуы фӕзынд». Хъусын кӕныны тыххӕй та цы хъуыды кӕны? «Ныр хъусын кӕнын тынг уарзын. Библи кӕимӕ ахуыр кӕнын, уыдон Йегъовӕйы тыххӕй куы базонынц, уӕд сӕ цард аивынц, ӕмӕ ма уымӕй стырдӕр циндзинад цы хъуамӕ хӕсса! Ам, Тайваны, лӕггад кӕнгӕйӕ уыцы циндзинад бирӕ хӕттыты банкъардтон».

Лӕг ӕмӕ ус, Брайан ӕмӕ Мишелыл дӕр цӕуы фӕйнӕ 35 азы бӕрц, сты Иугонд Штаттӕй. Ӕмӕ аст азы размӕ Тайванмӕ куы ацыдысты, уӕд райдианы уадиссаг ницӕмӕй уыди сӕ бон уацамынды баххуыс кӕнын. Фӕлӕ сын иу фӕлтӕрд миссионер ахӕм ныхӕстӕ загъта: «Адӕймагӕн ӕрмӕст буклет куы раттат, уӕддӕр-иу уӕ рох ма уӕд уый, ӕмӕ, чи зоны, уӕдмӕ Йегъовӕйы тыххӕй ӕппындӕр  ницы фехъуыста. Ӕмӕ уый та гыццыл хъуыддаг нӕу!» Уыцы ныхӕстӕ Брайан ӕмӕ Мишелы ныфс бауагътой. Иу ӕфсымӕр та сын афтӕ загъта: «Цӕмӕй китайаг ӕвзаг ахуыр кӕнгӕйӕ уӕхимӕ ма ныхъхъусат, уый тыххӕй уе ’нтыстдзинӕдтӕ иу бонӕй иннӕ бонмӕ ма нымайут, фӕлӕ иу конгрессӕй иннӕ конгресмӕ». Ӕмӕ, ӕцӕгдӕр, китайаг ӕвзаг сахуыр кӕнын сӕ къухы бафтыд ӕмӕ ныр сӕ лӕггады бирӕ тыллӕг хӕссынц.

Цы дын баххуыс кӕндзӕн ӕндӕр ӕвзаг ахуыр кӕнынӕн? Кӕм дӕ фӕндид лӕггад кӕнын, уырдӕм иуцасдӕрмӕ ацу. Уым цу ӕмбырдтӕм, дӕ рӕстӕг ӕрвит бынӕттон хотӕ ӕмӕ ӕфсымӕртимӕ ӕмӕ семӕ уацамынды цу. Брайан афтӕ загъта: «Рӕстдзинад базонын цас адӕмы фӕнды, уый дӕхи цӕстӕй куы фенай, стӕй хотӕ ӕмӕ ӕфсымӕрты уарзондзинад дӕхиуыл куы бавзарай, уӕд дӕ ӕнӕмӕнг бафӕнддзӕн цыфӕнды зындзинӕдты сӕрты дӕр ахизын ӕмӕ ӕндӕр бӕстӕйы лӕггад кӕнын».

Тайваны ӕххуыс кӕм хъӕуы, уырдӕм чи ацыд, уыцы пионертӕй иуӕй-иутӕ сӕхи дарынц, англисаг ӕвзаг иннӕтӕн кӕй амонынц, уый фӕрцы. Кристин ӕмӕ Мишель та кӕсаг уӕй кӕнынц. Мӕнӕ цы зӕгъы Кристин: «Ахӕм куыст раздӕр никуы кодтон, фӕлӕ мын уый фӕрцы ис ацы бӕстӕйы баззайыны фадат». Цасдӕры фӕстӕ Кристинӕн фӕзынд йӕхи ӕлхӕнджытӕ. Кусын ӕй ӕнӕхъӕн бон нӕ хъӕуы, фӕлӕ уый фӕрцы йӕхи дӕр ӕмӕ йӕ бинойнаджы дӕр дары. Ӕмӕ сын фаг рӕстӕг ис, царды сын сӕйрагдӕр цы у, уымӕн, ома пионертӕй лӕггад кӕнынӕн – адӕймӕгтӕ ахсынӕн.

Уильям ӕмӕ Дженнифер Тайванмӕ иу-авд азы размӕ ӕрцыдысты. Ацы бинонтӕ дӕр сты Иугонд Штаттӕй. Уильям афтӕ загъта: «Тынг бирӕ хъуыддӕгтыл нӕ фӕхъӕуы аххӕссын. Хъӕуы ног ӕвзаг ахуыр кӕнын дӕр, пионерӕй лӕггад кӕнын ӕмӕ ӕмбырды ӕххуыс кӕнын дӕр, стӕй ма нӕхи фӕдарыны фаг ӕхца кусын дӕр. Ӕмӕ нӕм уый тыххӕй хатгай хъарутӕ нал вӕййы». Фӕлӕ уӕддӕр сты амондджын ӕмӕ сын сӕ лӕггады бирӕ ӕнтысы. Цӕй фӕрцы? Уыдон сӕхицӕй ӕгӕр бирӕ нӕ домынц. Зӕгъӕм, афтӕ нӕ хъуыды кӕнынц, ӕмӕ китайаг ӕвзаг иу бонмӕ сахуыр кӕндзысты. Ӕмӕ уый фӕрцы сӕ ныфс нӕ асӕтты, исты сын, куыд сӕ фӕнды, афтӕ тагъд куы нӕ фӕуайы, уӕддӕр.

Уильям радзырдта, иухатт ын иу цӕуӕг цӕстдарӕг ахӕм ныхӕстӕ кӕй загъта, зӕгъгӕ, Йегъовӕйы хъуыддаджы дӕ разы цавӕрдӕр нысан куы сӕвӕрай, уӕд хъуамӕ цин кӕнай, уыцы нысанмӕ дӕ хӕстӕгдӕр чи кӕны, уыцы къахдзӕфтӕй алкӕцыйыл дӕр. Уильям куыд зӕгъы, афтӕмӕй ацы уынаффӕ йӕхицӕн дӕр ӕмӕ йӕ бинойнагӕн дӕр баххуыс кодта, цӕмӕй ӕмбаргӕ уой, бӕрнон ӕфсымӕрты ныхасмӕ хъусой, сӕ цард аразой, ног бӕстӕйы уавӕртӕ куыд домынц, уымӕ гӕсгӕ ӕмӕ ӕнтыстджындӕр уой. Уильям ма ноджыдӕр загъта: «Уый фӕрцы иуӕй-иу хатт рӕстӕг ссарӕм, ацы сакъадахыл цы рӕсугъд бынӕттӕ ис, уыдон фенынӕн дӕр».

Нӕ хо Меган у Иугонд Штаттӕй ӕмӕ лӕггад кӕны пионерӕй. Уый дӕр ӕппӕт хъарутӕй архайы, цӕмӕй китайагау сӕрибарӕй дзура. Ӕмӕ уыцы нысанмӕ тырнгӕйӕ уый дӕр Уильям ӕмӕ Дженниферау йӕ алы къахдзӕфыл дӕр цин кӕны. Алы къуыри дӕр сабат ӕмӕ хуыцаубоны хъусынгӕнджыты къордимӕ ацӕуы иу диссаджы ранмӕ – наулӕууӕн бынат Гаосюнмӕ. Тайваны уымӕй стырдӕр наулӕууӕн нӕй. Уым Меган хорз хабар фӕхъусын кӕны иу науӕй иннӕ наумӕ ӕмӕ дзы сӕмбӕлы, Бангладешӕй, Индийӕ, Индонезийӕ, Филиппинтӕй, Таиландӕй ӕмӕ Вануатуйӕ чи ӕрцӕуы, ахӕм кӕсагахсджытыл. «Кӕсагахсджытӕ наулӕууӕны цыбыр рӕстӕг йеддӕмӕ нӕ фӕвӕййынц, ӕмӕ уымӕ гӕсгӕ семӕ Библи ахуыр кӕнын райдайӕм, фыццаг хатт сыл куыддӕр фембӕлӕм, афтӕ ӕмӕ тӕккӕ дӕр уым. Цӕмӕй се ’ппӕтыл дӕр аххӕссон, уый тыххӕй арӕх цыппар-фондз адӕймагимӕ иумӕ фӕахуыр кӕнын». Меган китайаг ӕвзагимӕ та куыд фидауы? Йӕхӕдӕг афтӕ зӕгъы: «Мӕн бӕргӕ тагъддӕр фӕнды, фӕлӕ ӕдзухдӕр мӕ зӕрдыл дарын иу ӕфсымӕры ныхӕстӕ: „Дӕ бон цыдӕриддӕр у, уый араз ӕмӕ, дӕ бон цы нӕу, уый та Йегъовӕ сараздзӕн“».

Нӕ хо Кэти у Великобританийӕ. Ӕндӕр бӕстӕйы лӕггад кӕнын куы сфӕнд кодта, уӕд уал фыццаг базыдта, чындзыцыд чи нӕу, ахӕм хойӕн тӕссаг кӕм нӕ уыдзӕн лӕггад кӕнын, уый. Уый тыххӕй Йегъовӕйӕн радзырдта, стӕй цалдӕр филиалмӕ дӕр ныффыста, цӕмӕй йын бамбарын кодтаиккой, хойӕн иунӕгӕй сӕ бӕстӕйы тӕссаг цӕмӕй уыдзӕн, уыдӕттӕ. Йӕ фыстӕджытӕн цы дзуапп радтой, уыдонмӕ лӕмбынӕг куы ’ркаст, уӕд ӕй бамбӕрста, Тайваны йын иттӕг хорз кӕй уыдзӕн.

Гъемӕ 2004 азы ацыд Тайванмӕ. Уӕд ыл цыди 31 азы. Ам Кэти кӕны тынг хуымӕтӕг цард. Мӕнӕ цы радзырдта: «Хотӕ ӕмӕ ӕфсымӕрты бафарстон, зӕгъгӕ, дыргътӕ ӕмӕ халсартӕ асламдӕрӕй кӕм ис ӕлхӕнӕн. Ӕмӕ уый фӕрцы мӕ капеччытӕ фылдӕры фаг кӕнынц». Цы йын ӕххуыс кӕны ахӕм хуымӕтӕг цард кӕнынӕн? Кэти загъта: «Йегъовӕмӕ арӕх фӕкувын, цӕмӕй, цы хуымӕтӕг хӕринӕгтӕ хӕрын ӕмӕ цы хуымӕтӕг дарӕсы цӕуын, уымӕй райгонд уон. Ӕмӕ йӕ уынын, мӕ куывдтытӕ мын кӕй хъусы – амоны мын, ӕнӕмӕнг мӕ цы хъӕуы, уый ӕмӕ мын ӕххуыс кӕны, цӕмӕй фылдӕрмӕ ма тырнон, кӕд, мӕ зӕрдӕ цы фӕзӕгъы, уый мын алы хатт нӕ вӕййы, уӕддӕр». Кэти ма ноджыдӕр загъта: «Хуымӕтӕг цард кӕй кӕнын, уый мӕ зӕрдӕмӕ цӕуы, уымӕн ӕмӕ мын уый фӕрцы ӕнцондӕр у мӕ хъарутӕ ӕмӕ мӕ рӕстӕг иууылдӕр Йегъовӕйы хъуыддагӕн дӕттын».

Фӕлӕ Кэти кӕд хуымӕтӕг цард кӕны, уӕддӕр ын ахӕм цард уыйбӕрц циндзинад хӕссы, ӕмӕ йӕ ницӕуыл баивид. Цымӕ цӕмӕн? Йӕхӕдӕг афтӕ загъта: «Ахӕм рӕтты фӕхъусын кӕнын, ӕмӕ дзы бирӕтӕ хорз хабар сӕ зӕрдӕмӕ айсынц. Ӕмӕ мӕ цинӕн кӕрон дӕр нал вӕййы!» Тайванмӕ куы ’рцыд, уӕд пионерӕй лӕггад кӕнын цы горӕты райдыдта, уым китайаг ӕвзагыл дыууӕ ӕмбырды йеддӕмӕ нӕ уыди, ныр та дзы ахӕм ӕмбырдтӕ ис авд. Кэти дзуры: «Уыйбӕрц адӕм Йегъовӕйы организацимӕ куыд цӕуынц, уый мӕхи цӕстӕй уынын ӕмӕ хуымгӕрдӕны мӕхӕдӕг дӕр архайын. Ӕмӕ мын уый фӕрцы мӕ цард алы бон дӕр хӕссы бирӕ циндзинад!»

Цымӕ, статьяйы райдианы кӕй кой кодтам, уыцы Куин ӕмӕ Джули та цы баисты? Куинмӕ фыццӕгты афтӕ каст, ӕмӕ китайаг ӕвзаг дзӕбӕх кӕй нӕ зоны, уымӕ гӕсгӕ ӕмбырдӕн ницы ӕххуыс уыди. Фӕлӕ бынӕттон ӕфсымӕртӕ афтӕ нӕ хъуыды кодтой. «Уӕд уыдтӕн кӕстӕриуӕггӕнӕг ӕфсымӕр, ӕмӕ не ’мбырдӕй дыууӕ ӕмбырды куы скодтой, уӕд мын бирӕ хъуыддӕгтӕ бабар кодтой,– дзуры Куин.– Ӕмӕ йӕ уӕд ӕцӕгдӕр бамбӕрстон, стыр ӕххуыс кӕм хъӕуы, ахӕм ран кӕй лӕггад кӕнын». Ӕмӕ стӕй йӕ мидбылты худгӕйӕ йӕ ныхӕстӕм бафтыдта: «Ахъуыды-ма кӕн, мӕ сӕр дӕр сӕ хъуыди! Уымӕй тынгдӕр ма цы хъуамӕ уа». Ныр Куин лӕггад кӕны хистӕр нӕлгоймагӕй. Джули та афтӕ загъта: «Ныры хуызӕн амондджын никуы уыдыстӕм, нӕ цардӕй нӕ зӕрдӕ райы, уынӕм ӕй, дзӕгъӕлы кӕй нӕ цӕрӕм. Ардӕм баххуыс кӕнынмӕ ӕрцыдыстӕм, фӕлӕ нӕм афтӕ кӕсы, ӕмӕ мах уыдонӕн нӕ, фӕлӕ уыдон махӕн баххуыс кодтой. Йегъовӕйӕ тынг бузныг стӕм, ам лӕггад кӕныны фадат нын кӕй радта, уый тыххӕй!»

Нырма дӕр бирӕ бӕстӕты хуымгӕрдӕны хъӕуы фылдӕр кусджытӕ. Чи зоны, скъола каст фӕдӕ ӕмӕ хъуыды кӕныс, дарддӕр цы кусай, ууыл. Йе та, чи зоны, дӕхицӕн бинонтӕ нӕй, ӕмӕ дӕ фӕнды Йегъовӕйы организацийӕн фылдӕр истӕмӕй баххуыс кӕнын. Кӕнӕ дӕ фӕнды, цӕмӕй дӕ бинонтӕ Йегъовӕйы хъуыддаджы фылдӕр аразой, ӕмӕ уын царды уа, ӕхсызгонӕй-иу кӕй ӕрхъуыды кӕнат, бирӕ ахӕм хабӕрттӕ. Науӕд, чи зоны, царды бирӕ цыдӕртӕ федтай, бирӕ цыдӕртӕ дӕхиуыл бавзӕрстай ӕмӕ ныр пенсийы ацыдтӕ ӕмӕ дӕ бон у уыцы куырыхон зондӕй иннӕтӕн дӕр фӕхай кӕнын. Дызӕрдыг дӕр ма кӕн: хъусынгӕнджытӕ кӕм нӕ фаг кӕны, ахӕм ранмӕ лӕггад кӕнынмӕ куы ацӕуай, уӕд дӕм ӕнхъӕлмӕ кӕсы стыр арфӕдзинӕдтӕ!