ДӔ ЦӔСТИТӔБӔЛ рауайун кӕнӕ, цума кӕсис киномӕ цӕхуӕндӕр зундгонд адӕймаги туххӕй, зӕгъӕн, дӕ зӕрдӕмӕ ка цӕуй, уӕхӕн музыканти туххӕй. Фиццаг бал ӕвдесунцӕ, минкъий ма ку адтӕй, еци рӕстӕгутӕ, удта музыкалон инструментбӕл куд ахур кодта ӕма, цӕмӕй хуарз цӕгъдун исахур адтайдӕ, уой туххӕй ӕй цӕйбӕрцӕ архайун гъудӕй, уой. Идарддӕр ӕвдесунцӕ, алли бӕстити концерттӕ куд дӕттуй ӕма дуйнебӕл ӕ ном куд райгъустӕй, уой. Рӕстӕг рацудӕй ӕма ӕ сугъзӕрийнӕ ӕнзтӕ фӕцӕнцӕ ӕма киной кӕрон рамардӕй.

Аци киной хабӕрттӕ цардӕй ист ӕнцӕ. Ӕма кино кефӕнди туххӕй ма адтайдӕ,– фӕнди музыканти, фӕнди ахургонди, фӕнди спортсмени кенӕ ӕндӕр зундгонд адӕймаги туххӕй,– кӕрон ба уӕддӕр, ӕвӕдзи, уӕхӕн адтайдӕ. Расагъӕс кӕнӕ, нур дӕр ма адӕймагӕн уойбӕрцӕ кӕми бантӕсуй, уоми, зӕронд ӕма мӕлгӕ ку нӕ кодтайдӕ, уӕдта ин цӕйбӕрцӕ фулдӕр ӕнтӕстайдӕ.

Гъигагӕн ни мӕлӕтӕй хизт еу дӕр нӕй (Екклесиаст 9:5). Цийфӕнди ма кӕнӕн, цӕмӕй ма базӕронд уӕн ӕма ма рамӕлӕн, уӕддӕр нӕ кӕрон уомӕ цӕуй. Уомӕй уӕлдай ма адӕймагбӕл ӕнӕнгъӕлӕги дӕр ести фидбилиз ӕрцӕуй кенӕ фӕссӕйгӕ уй, ӕма уой туххӕй ӕрбамӕлуй. Библий куд финст ӕй, уотемӕй нӕ цард ӕй сӕумон мегъи хузӕн – «мегъӕ еу минкъий рӕстӕгмӕ куд фӕззиннуй ӕма удта куд ӕрбайсӕфуй, уой хузӕн» (Иакови 4:14).

Беретӕ, адӕймаг цӕй туххӕй цӕруй ӕма исонбон ци ’рхӕсдзӕй, уой ке нӕ зонунцӕ, уомӕ гӕсгӕ цардмӕ кӕсунцӕ уӕхӕн цӕстӕй: «Хуӕрӕн ӕма ниуазӕн,– уӕддӕр исон рамӕлдзиан» (1 Коринфӕгтӕмӕ 15:32). Фал уӕхӕн цард уомӕн кӕнунцӕ, ӕма ’й зонунцӕ, абони уа ӕви исон, уӕддӕр ке рамӕлдзӕнцӕ. Адӕймагӕн ӕ царди уӕхӕн рӕстӕгутӕ фӕууй, уӕлдайдӕр ба зин уавӕри ку бахауй, уӕд, ӕма фӕссагъӕс кӕнуй: «Райгурӕ, удта рамӕлӕ – гъе уомӕй ӕндӕр нӕ цард неци ӕй?» Аци фарстайӕн дзуапп кӕми ес иссерӕн?

Беретӕ сӕ нифс дарунцӕ, аци фарстабӕл дзуапп ахургӕндтӕ ке иссердзӕнцӕ. Наукӕ ӕма медицини фӕрци адӕймаг абони фулдӕр цӕруй. Ӕма нур дӕр еуӕй-еу ахургӕндтӕ архайунцӕ, цӕмӕй никки фулдӕр цӕрӕн. Фал син е бантӕса ӕви нӕ, уӕддӕр аци фарстатӕ ӕнӕ дзуаппӕй байзайдзӕнцӕ: цӕмӕн зӕронд кӕнӕн ӕма цӕмӕн мӕлӕн? Ескӕд уотӕ уодзӕй, ӕма мӕлгӕ некебал кӕндзӕй? Аци фарстатӕбӕл дзурд цӕудзӕй иннӕ статьяти. Уомӕй уӕлдай ма дзуапп базондзиан уӕхӕн фарстабӕл дӕр: «Райгурӕ, удта рамӕлӕ – гъе уомӕй ӕндӕр нӕ цард неци ӕй?»