НӔ РАГФИДДӔЛТӔ, Адам ӕма Евӕ, Хуцаумӕ нӕ байгъустонцӕ ӕма айдагъ сӕхе нӕ, фал ма адӕни еугурейдӕр тӕрегъӕд ӕма мӕлӕти уацари бакодтонцӕ. Фал уӕддӕр, Хуцаумӕ адӕни туххӕй ци фӕндӕ адтӕй, е нӕ раййивта. Ӕма уой туххӕй ӕ Дзурд Библий еу ӕма дууӕ хатти нӕ зӕгъуй.

• «Рӕстгӕнгутӕ зӕнхӕ бунӕн райсдзӕнцӕ ӕма ибӕл цӕрдзӕнцӕ ӕносмӕ» (Псалом 37:29).

• «Е фесафдзӕй мӕлӕт ӕносмӕ, Дуйнедарӕг Хуцау Йеговӕ се ’гасемӕндӕр сӕ цӕстисугтӕ сӕ ростӕй ниссӕрфдзӕй» (Исай 25:8).

• «Исӕфт ӕрцӕудзӕй фӕстаг знаг дӕр – мӕлӕт» (1 Коринфӕгтӕмӕ 15:26).

• «Нӕбал уодзӕй нӕдӕр мӕлӕт, нӕдӕр маст, нӕдӕр гъарӕнгӕ, нӕдӕр рист» (Раргомадӕ 21:4).

Хуцау мӕлӕт куд фесафдзӕй? Куд фӕууидтан, уотемӕй Библий финст ӕй, зӕгъгӕ, «рӕстгӕнгутӕ... цӕрдзӕнцӕ ӕносмӕ». Фал ма си уотӕ финст дӕр ес, зӕгъгӕ, «зӕнхӕбӕл нӕййес еу уӕхӕн раст адӕймаг дӕр, айдагъ хуарздзийнадӕ ка кӕнуй» (Екклесиаст 7:20). Мадта е уобӕл дзорӕг ӕй, ӕма Хуцау ӕ уагӕвӕрдтӕ ку не ’нхӕст кӕнун кӕна, уӕд рӕдуйгӕ дӕр некебал кӕндзӕй, ӕма мӕлӕт уотемӕй исӕфт ӕрцӕудзӕй? Уомӕн гӕнӕн нӕййес! Хуцау уотӕ некӕд бакӕндзӕй, уомӕн ӕма «ӕ бон сайун... нӕй» (Титмӕ 1:2). Мадта уӕд ци бакӕндзӕй, цӕмӕй исӕнхӕст кӕна, адӕни туххӕй имӕ райдайӕни ци фӕндӕ адтӕй, уой?

Йеговӕ Хуцау адӕни берӕ ке уарзуй, уомӕ гӕсгӕ ахӕсти аргъ бафиста, цӕмӕй нӕ мӕлӕтӕй иссӕребарӕ кӕна. Дзурдбаст «ахӕсти аргъ» фегъосгӕй адӕймаг арӕхдӕр расагъӕс кӕнуй, еске уацарӕй иссӕребарӕ кӕнуни туххӕй ци аргъ бафедунцӕ, уобӕл. Аци дзурдбаст Библий кӕми ӕмбӕлуй, уоми ӕ сӕйраг гъуди ӕй, цӕй туххӕй кенӕ ке туххӕй лӕвӕрд цӕуй, уой аргъи хӕццӕ ӕмиасӕ ке ӕй. Еци аргъ адӕймаги бафедун фӕгъгъӕуй, ескӕмӕн ести зиан ку ракӕнуй кенӕ уотӕ бакӕнун раст ку фӕууй, уӕд. Адӕн еугурӕйдӕр тӕрегъӕдгунтӕ ке ’нцӕ ӕма се ’гасемӕндӕр мӕлӕти тӕрхон хаст ке ӕрцудӕй, уомӕ гӕсгӕ Библи комкоммӕ зӕгъуй: «Уонӕй еуемӕн дӕр ӕ бон нӕй е ’нсувӕри балхӕнун ӕма е ’нсувӕри туххӕй Хуцауӕн бафедун (Адӕймаги уод балхӕнуни аргъ уотӕ устур ӕй, ӕма ӕй ӕности дӕргъи некема бафиста)» (Псалом 49:7, 8).

Ӕнӕнхӕст адӕймаг ку рамӕлуй, уӕд ӕрмӕстдӕр ӕхе тӕрегъӕдти туххӕй бафедуй. Ӕма неке бон ӕй ӕхе ӕнӕнхӕстдзийнадӕй фӕййервӕзун кӕнун. Удта ӕнӕхӕст адӕймаги бон нӕй, цӕмӕй ма еске тӕрегъӕдти туххӕй дӕр бафеда ӕма сӕ мӕлӕтӕй фӕййервӕзун кӕна (Ромӕгтӕмӕ 6:7). Уомӕ гӕсгӕ ӕнхӕст ӕма ӕнӕтӕрегъӕд адӕймаг гъӕуама ӕ цард нивондӕн равардтайдӕ, ӕхе тӕрегъӕдти туххӕй нӕ, фал мах тӕрегъӕдти туххӕй (Дзиуиттӕгтӕмӕ 10:1–4).

Ӕма Хуцау дӕр ӕ Фурт Киристей уӕлӕрвтӕй уой туххӕй рарвиста, цӕмӕй зӕнхӕбӕл ӕнхӕст, ӕнӕтӕрегъӕд адӕймагӕй райгурдайдӕ (1 Петури 2:22). Киристе загъта, ке ӕрцудӕй, цӕмӕй «ӕ уод ратта берети балхӕнуни туххӕй» (Марки 10:45). Е рамардӕй нӕ тӕрегъӕдти туххӕй ӕма нӕ мӕлӕтӕй фӕййервӕзун кодта (Иоанни 3:16).

Абони ӕнхӕст кӕнуй Библий пахампарадӕ. Нӕхе цӕстӕй уинӕн, «хъӕбӕр уӕззау рӕстӕг» ке искодта, ӕма уомӕй бӕрӕг ӕй, аци фуддуйнейӕн ӕ «фӕстаг бӕнтти» ке цӕрӕн (2 Тимофеймӕ 3:1). Фӕстаг бӕнттӕ фӕууодзӕнцӕ, «ӕнӕхуцау адӕнбӕл тӕрхон кӕд исӕнхӕст уодзӕй ӕма кӕд фесӕфдзӕнцӕ, еци бон» (2 Петури 3:3, 7). Фал, Хуцауи ка уарзуй, еци  адӕн фӕййервӕздзӕнцӕ ӕма «ӕносмӕ цӕрдзӕнцӕ» (Матфеййи 25:46).

Милиуантӕн ба ӕносмӕ цӕруни фадуат фӕззиндзӕй, ку райгас уонцӕ, уӕд. Адӕймаги фӕстӕмӕ цардмӕ раздахӕн ке ес, уой Киристе бавдиста, горӕт Наинмӕ ку ’рбацудӕй, уӕд. Еу идӕдзӕ силгоймагӕн ӕ еунӕг фурт рамардӕй. Йесойӕн идӕдзӕ силгоймаги «тӕрегъӕдӕй ӕ зӕрдӕ фӕрристӕй», ӕма ин ӕ фурти райгас кодта (Лукай 7:11–15). Апостол Павел дӕр загъта: «Ӕма ӕз мӕ нифс дарун Хуцаубӕл... ке райгас уодзӕнцӕ рӕстгӕнгутӕ дӕр ӕма фудгӕнгутӕ дӕр». Уӕхӕн федар нифс нин ке ес, е уобӕл дзорӕг ӕй, ӕма Хуцау адӕни уарзуй (Гъуддӕгтӕ 24:15).

Миллиардтӕмӕ ӕнгъӕлмӕ кӕсуй ӕносон цард. Библий финст ес: «Рӕстгӕнгутӕ зӕнхӕ бунӕн райсдзӕнцӕ ӕма ибӕл цӕрдзӕнцӕ ӕносмӕ» (Псалом 37:29). Еци рӕстӕг ку ’рцӕуа, уӕд адӕн уодзӕнцӕ хъӕбӕр амондгун ӕма цийнӕ кӕндзӕнцӕ, еу 2 000 анзей размӕ апостол Павел ци дзурдтӕ ниффинста, етӕ ке исӕнхӕст ӕнцӕ, уобӕл: «Мӕлӕт, кӕми ӕй дӕ уӕлахез? Мӕлӕт, кӕми ӕй дӕ маргӕй гъӕстӕ фат?» (1 Коринфӕгтӕмӕ 15:55). Адӕни знаг, мӕлӕт, исӕфт ӕрцӕудзӕй!