A Mboni za Yehova ali ndi njira yabwino yokuthandizani kuphunzira zimene Baibulo limaphunzitsa. Phunziro la Baibuloli lingakuthandizeni:

•   Kukhala ndi moyo wosangalala

•   Kukhala mnzake wa Mulungu

•   Kudziwa zimene Baibulo limalonjeza zokhudza m’tsogolo

Zimene zili patsambali

•  Kodi phunziro la Baibulo limachitika bwanji?

•  Kodi ndiyenera kulipira kuti ndiphunzire?

•  Kodi limatenga nthawi yaitali bwanji?

•  Kodi ndingayambe bwanji?

•  Kodi ndikhoza kungoyesa kaye?

•  Ngati ndiyamba kuphunzira Baibulo, kodi adzandikakamiza kuti ndikhale wa Mboni za Yehova?

•  Kodi ndingagwiritse ntchito Baibulo langa?

•  Kodi ndingapemphe anthu ena kuti akhale nafe pa phunzirolo?

•  Ngati ndinaphunzirapo ndi Mboni za Yehova m’mbuyomu, kodi ndingaphunzirenso?

•  Kodi ndingaphunzire Baibulo popanda munthu kundiphunzitsa?

 Pali munthu amene azikuthandizani kudziwa Baibulo poliphunzira motsatira mutu wa nkhani. Muziphunzira mokambirana buku lakuti Mungakhale Ndi Moyo Mpaka Kalekale kuti mwapang’onopang’ono mudziwe uthenga wa m’Baibulo komanso mmene Baibulolo lingakuthandizireni. Kuti mudziwe zambiri, onerani vidiyoyi.

 Ayi. Timatsatira malangizo amene Yesu anapatsa ophunzira ake akuti: “Munalandira kwaulere, patsani kwaulere.” (Mateyu 10:8) Anthu amene amaphunzitsa salipiridwa komanso mungalandire Baibulo kapena buku lakuti Mungakhale ndi Moyo Mpaka Kalekale kwaulere.

 M’bukuli muli maphunziro 60. Mungasankhe mmene mukufuna kuphunzirira koma ambiri amakonda kumaliza phunziro limodzi kapena oposerapo mlungu uliwonse.

1.  1. Mulembe fomu imene ili pawebusaiti yathu. Tidzagwiritsa ntchito zimene mwalemba kuti munthu ayambe kuphunzira nanu basi.

2.  2. Munthu amene azidzaphunzira nanu adzakupezani. Iye adzakufotokozerani mmene phunziro lanu liziyendera komanso adzayankha mafunso amene mungakhale nawo.

3.  3. Inu ndi munthuyo mudzapangana mmene muzidzaphunzirira. Mukhoza kuphunzira pogwiritsa ntchito foni, vidiyo, polemberana makalata kapena maimelo. Nthawi zambiri, anthu amaphunzira kwa ola limodzi koma mukhoza kuchepetsa kapena kutalikitsa nthawiyo malinga ndi zimene mungafune.

 Inde. Kuti muchite zimenezi, lembani fomu pawebusaiti yathu. Munthu akadzakupezani, mumuuze kuti mukufuna kungoyesa kaye phunzirolo kuti muone ngati mungalikonde. Iye adzagwiritsa ntchito kabuku kakuti Mungakhale ndi Moyo Mpaka Kalekale, komwe kali ndi maphunziro atatu oyambirira, kuti muone ngati mungasangalale ndi phunziro.

 Ayi. A Mboni za Yehova amakonda kwambiri kuphunzira Baibulo ndi anthu, koma sitiwakakamiza kuti alowe chipembedzo chathu. M’malomwake, timaphunzitsa mwaulemu zimene Baibulo limanena ndipo timazindikira kuti munthu aliyense ali ndi ufulu wosankha zimene akufuna kukhulupirira.—1 Petulo 3:15.

 Inde, mukhoza kugwiritsa ntchito Baibulo lililonse limene mukufuna. Timakonda kugwiritsa Baibulo la Dziko Latsopano la Malemba Opatulika chifukwa ndi lomveka bwino komanso linamasuliridwa molondola. Koma timadziwa kuti anthu ambiri amakonda kugwiritsa ntchito Baibulo limene alizolowera.

 Inde. Mukhoza kupempha anthu onse a m’banja lanu kapena mnzanu wina aliyense.

 Inde. Ndipotu mwina mungakonde phunziro lathu latsopano kuposa lakalelo chifukwa talisintha mogwirizana ndi zimene anthu amafuna masiku ano. Limakhala ndi mavidiyo ndi zithunzi zambiri komanso ndi lokambirana kuposa lakalelo.

 Inde. Ngakhale kuti anthu ambiri amaphunzira bwino akakhala ndi munthu wowaphunzitsa, ena amakonda kuyamba kaye ndi kuphunzira paokha. Gawo lathu lakuti Zokuthandizani Pophunzira Baibulo limasonyeza zinthu zaulere zomwe mungagwiritse ntchito pophunzira Baibulo. Zinthu zina zimene zingakuthandizeni ndi izi:

•   Mavidiyo Okhudza Baibulo. Mavidiyo aafupiwa amafotokoza zinthu zikuluzikulu zimene Baibulo limaphunzitsa.

•   Kuyankha Mafunso a M’Baibulo. Nkhanizi zimayankha mafunso osiyanasiyana okhudza Baibulo.

•   Kufotokoza Mavesi a M’Baibulo. Mungaphunzire tanthauzo la mavesi ndi mawu ena odziwika a m’Baibulo.