“ကျမ်းစာကို ကြိုးစားပြီး ဖတ်ကြည့်တယ်။ ဒါပေမဲ့ တော်တော်နဲ့ ဖတ်မပြီးလို့ လန့်သွားတယ်။”​—ဗရီရာနာ၊ ၁၅ နှစ်။

 သင်ကော အဲဒီလို ခံစားရသလား။ ဒီဆောင်းပါးက ကူညီပေးပါလိမ့်မယ်။

•  ဘာကြောင့် ကျမ်းစာ ဖတ်ရမလဲ

•  ကျမ်းစာကို ဘယ်လို ဖတ်ရမလဲ

•  ရွယ်တူတွေ အဆို

 ကျမ်းစာ ဖတ်ပါလို့ ပြောရင် ပျင်းစရာကောင်းလိုက်တာဆိုတဲ့ အတွေး ဝင်လာသလား။ ဒါကို နားလည်ပေးနိုင်ပါတယ်။ စာအုပ်က အထူကြီး၊ စာလုံးတွေက သေးသေးလေး၊ ဘာရုပ်ပုံမှလည်း မပါဘူး။ တီဗီ၊ ဗီဒီယိုတို့လို စိတ်ဝင်စားစရာ မကောင်းဘူးလို့ စဉ်းစားမိမှာပဲ။

 ဒီလိုစဉ်းစားကြည့်ပါ– ရှေးဟောင်း ရတနာသေတ္တာကြီးတစ်လုံး တွေ့တယ် ဆိုပါစို့။ အထဲမှာ ဘာများရှိမလဲ သိချင်တယ် မဟုတ်လား။

 ကျမ်းစာဟာ အဲဒီရတနာသေတ္တာနဲ့ တူတယ်။ ရတနာလို အဖိုးတန်တဲ့ ပညာရှိစကားတွေ အများကြီး ပါတယ်။ အဲဒီပညာရှိစကားတွေက

•   ဆုံးဖြတ်ချက်ကောင်း ချနိုင်အောင်

•   မိဘနဲ့ အဆင်ပြေအောင်

•   သူငယ်ချင်းကောင်း ရနိုင်အောင်

•   စိတ်ဖိစီးမှုကို ရင်ဆိုင်ဖြေရှင်းနိုင်အောင် ကူညီပေးတယ်။

 ရှေးကျတဲ့စာအုပ်က ဘယ်လို လုပ်ပြီး ခုချိန်ထိ လက်တွေ့ကျဆဲလဲ။ ‘ကျမ်းစောင်အားလုံးကို ဘုရားသခင့် စွမ်းအားတော် လမ်းညွှန်မှုနဲ့ ရေးထား’ လို့ပါပဲ။ (၂ တိမောသေ ၃:၁၆) ကျမ်းစာမှာပါတဲ့ အကြံပြုချက်တွေက အကောင်းဆုံး အကြံပေးရှင်ဆီက လာတယ်ဆိုတဲ့ အဓိပ္ပာယ် ဖြစ်တယ်။

 တစ်နည်းကတော့ ကျမ်းစာကို အစကနေ အဆုံးထိ ဖတ်ပါ။ ဒါဆိုရင် ကျမ်းစာရဲ့ အဓိကသတင်းစကားကို ခြုံငုံသဘောပေါက်သွားမယ်။ ကျမ်းစာဖတ်နည်း အမျိုးမျိုးရှိတဲ့ထဲက နှစ်နည်းကို ကြည့်ရအောင်–

•    ကျမ်းစောင် ၆၆ စောင်ကို ကမ္ဘာဦးကနေ ဗျာဒိတ်အထိ အစဉ်လိုက် ဖတ်နိုင်တယ်။

•    ကျမ်းစာဖြစ်ရပ်တွေ ဖြစ်ပျက်ခဲ့တဲ့ နှစ်ကာလအလိုက် စဉ်ထားပြီး ဖတ်နိုင်တယ်။

   အကြံပြုချက်။ ကမ္ဘာသစ်ဘာသာပြန်ကျမ်းရဲ့ နောက်ဆက်တွဲ က၇ မှာ ယေရှုရဲ့ မြေကြီးအသက်တာ အဓိကဖြစ်ရပ်တွေကို အစဉ်လိုက်ပြထားတယ်။

 ဒုတိယနည်းကတော့ ကြုံတွေ့နေရတဲ့ အခက်အခဲနဲ့ ဆက်စပ်မှုရှိတဲ့ ကျမ်းစာမှတ်တမ်းကို ရွေးဖတ်ပါ။ ဥပမာ–

•    ယုံကြည်စိတ်ချရတဲ့ မိတ်ဆွေတွေ ရချင်သလား။ ယောနသန်နဲ့ ဒါဝိဒ်အကြောင်း ဖတ်ပါ။ (၁ ရှမွေလ အခန်းကြီး ၁၈–၂၀) ပြီးရင် “မိတ်ဆွေကောင်းများ ရှာတွေ့နိုင်ပုံ” ဆိုတဲ့ လေ့ကျင့်ခန်းစာရွက်ကို သုံးပြီး သင်ခန်းစာ ရယူပါ။

•    သွေးဆောင်မှုတွေကို အားကြိုးမာန်တက် တွန်းလှန်ချင်သလား။ သွေးဆောင်မှုကို ယောသပ် တွန်းလှန်ခဲ့ပုံအကြောင်း ဖတ်ပါ။ (ကမ္ဘာဦး အခန်းကြီး ၃၉) အဲဒီနောက် “သွေးဆောင်မှုကို တွန်းလှန်နိုင်ပုံ . . . ယောသပ်—အပိုင်း ၁” နဲ့ “မတရားတဲ့ စွပ်စွဲချက်ကြီးပဲ . . . ယောသပ်—အပိုင်း ၂” လေ့ကျင့်ခန်း စာရွက်တွေကို သုံးပြီး သင်ခန်းစာ ရယူပါ။

•    ဆုတောင်းခြင်းက ကူညီပေးနိုင်ပုံအကြောင်း သိချင်နေသလား။ နေဟမိရဲ့ အတွေ့အကြုံကို ဖတ်ကြည့်ပါ။ (နေဟမိ အခန်းကြီး ၂) “သူ့ဆုတောင်းချက်ကို ဘုရားသခင် ဖြေကြားပေးခဲ့” လေ့ကျင့်ခန်းစာရွက်ကို သုံးပြီး သင်ခန်းစာ ရယူပါ။

   အကြံပြုချက်။ ဆိတ်ငြိမ်တဲ့ ဝန်းကျင်မျိုးမှာ ကျမ်းစာ ဖတ်ပါ။ ဒါမှ အာရုံစိုက်နိုင်မယ်။

 တတိယနည်းကတော့ ကျမ်းစာမှတ်တမ်းတစ်ခု ဒါမှမဟုတ် ဆာလံတစ်ခန်းကို ဖတ်ပါ။ ပြီးရင် ကိုယ်နဲ့ ဘယ်လို သက်ဆိုင်သလဲ စဉ်းစားပါ။ ဖတ်ပြီး ကိုယ့်ကိုယ်ကိုယ် ဒီလိုမေးပါ–

•    ယေဟောဝါက ဒီအချက်ကို ကျမ်းစာထဲ ဘာကြောင့် ထည့်ရေးခိုင်းသလဲ။

•    ဒါက ယေဟောဝါရဲ့ ဂုဏ်ရည်တော်အကြောင်း၊ လုပ်ဆောင်ပုံနည်းလမ်းအကြောင်း ဘာကို ဖော်ပြသလဲ။

•    ဒီအချက်ကို ဘဝမှာ ဘယ်လို ကျင့်သုံးနိုင်သလဲ။

   အကြံပြုချက်။ ပန်းတိုင်ချပါ။ ကျမ်းစာ စဖတ်ဖို့ စီစဉ်ထားတဲ့ ရက်စွဲကို ချရေးပါ။