Fl-​24 taʼ Frar 2022, kmieni filgħodu l-​armata tar-​Russja bdiet tattakka l-​Ukrajna, avolja mexxejja minn pajjiżi differenti pruvaw jevitaw gwerra. Din il-​ġlieda militari kif se teffettwa d-​dinja? Ftit ġranet ilu, is-​segretarju ġenerali tal-​Ġnus Magħquda, António Guterres, qal: “Ma nistgħux nimmaġinaw kemm din il-​ġlieda se ġġib tbatija, ħsara, u teffettwa s-​sigurtà tal-​pajjiżi fl-​Ewropa u mad-​dinja kollha.”

•   Ġesù Kristu kien qal li se jkun hemm żmien fejn “ġens iqum kontra ġens u saltna kontra saltna.” (Mattew 24:7) Biex tara kif il-​Bibbja turi li l-​gwerer li qed naraw huma parti mill-​profezija taʼ Ġesù, aqra l-​artiklu “X’inhu s-​sinjal tal-​‘aħħar jiem,’ jew ‘żmien it-​tmiem’?”

•   Il-​ktieb taʼ Rivelazzjoni jqabbel il-​gwerer maʼ rikkieb fuq ‘żiemel kulur in-​nar’ u “li jneħħi l-​paċi minn fuq l-​art.” (Rivelazzjoni 6:4) Aqra l-​artiklu “L-​erbaʼ rikkieba taż-​żwiemel—Min huma?” biex tara kif il-​profezija tal-​gwerer qed issir bħalissa.

•   Il-​ktieb taʼ Danjel kien qal li “s-​sultan tat-​tramuntana” u “s-​sultan tan-​nofsinhar” se jkunu kontra xulxin. (Danjel 11:25-​45) Ara l-​vidjow Profezija Mwettqa—Danjel Kapitlu 11 biex titgħallem għala r-​Russja u l-​pajjiżi li jgħinuha huma s-​sultan tat-​tramuntana. a

•   Rivelazzjoni jiddeskrivi “l-​gwerra tal-​jum il-​kbir t’Alla li Jistaʼ Kollox.” (Rivelazzjoni 16:14, 16) Imma dil-​gwerra mhux se tkun bejn il-​pajjiżi kif naraw bħalissa. Aqra l-​artiklu “X’inhi l-​battalja t’Armageddon?” biex issir taf iżjed dwar x’se jiġri f’din il-​gwerra.

•   Il-​Bibbja tgħid li Alla se “jwaqqaf il-​gwerer sa tarf l-​art.” (Salm 46:9) Aqra l-​artiklu “Tama Vera għal Futur Aħjar” biex titgħallem dwar il-​futur li jwegħedna Alla.

•   Ġesù għallem lid-​dixxipli tiegħu biex jitolbu li tiġi s-​Saltna t’Alla. (Mattew 6:9, 10) Is-​Saltna hi gvern fis-​sema li se tagħmel dak li jrid Alla fuq l-​art. U Alla jrid li fid-​dinja kollha jkun hawn il-​paċi. Biex tara kif is-​Saltna se tgħinek, ara l-​vidjow X’inhi s-​Saltna t’Alla?

 Hemm iktar minn 129,000 Xhud taʼ Ġeħova jgħixu fl-​Ukrajna. Bħax-​Xhieda taʼ Ġeħova mad-​dinja kollha, huma jimitaw lil Ġesù billi jibqgħu newtrali fil-​politika u ma jiħdux sehem fil-​gwerer. (Ġwanni 18:36) Ix-​Xhieda taʼ Ġeħova jkomplu jippritkaw “l-​aħbar tajba tas-​saltna” mad-​dinja kollha li hi l-​unika soluzzjoni għall-​problemi li għandna, inkluż il-​gwerer. (Mattew 24:14) Jekk tixtieq tkun taf iktar dwar it-​tama li tagħtina l-​Bibbja, jekk jogħġbok ikkuntattjana.