NSOMBELU utudi nende lelu ki nnguvua Nzambi muanyishe bua tuikale nende to. Buloba buvua ne bua kuikala buwule ne bantu badi banemeka bumfumu butambe bunene bua Mufuki wetu, bapeta masanka adi afumina ku dilonda mikenji yende, ne bidikija ngikadilu yende mitambe buimpe. Bavua ne bua kuikala beleshangana diboko ne disanka dionso mu dikolesha dia bana, dimanya malu mapiamapia, ne divuija buloba buonso Mparadizu.

• “Udi ujikija mvita pa buloba buonso bujima.”​—Misambu 46:9.

• “Tshikondo tshisungula tshiakalua . . . tshia kunyangakaja badi banyangakaja buloba.”​—Buakabuluibua 11:18.

• “Muntu nansha umue udi musombele mu ditunga kakuamba ne: ‘Ndi nsama.’”​—Yeshaya 33:24.

• “Basungula banyi nebasanke bikole menemene bua mudimu wa bianza biabu.”​—Yeshaya 65:22.

Milayi eyi neyikumbane mushindu kayi? Nzambi mmusungule Muanende Yezu bu Mukalenge wa mbulamatadi mupuangane wikala mua kukokesha buloba kumbukila mu diulu. Bible udi ubikila mbulamatadi eu ne: Bukalenge bua Nzambi. (Danyele 2:44) Bible udi uleja bua Yezu ne: “Nzambi neamupeshe nkuasa wa bukalenge . . . , ne neakokeshe bu Mukalenge.”​—Luka 1:32, 33.

Patshivua Yezu pa buloba, wakenza bishima bia bungi bua kujadika ne: paluaye Mukokeshi neavuije nsombelu wa bantu muimpe kupita utudi nende lelu.

• Wakuondopa masama a mishindu yonso, uleja muajikijaye matekete a bantu.​—Matayi 9:35.

• Wakabatamija mbuu, uleja muakubaye bantu ku makole adi nawu bintu bidi Nzambi mufuke.​—Mâko 4:36-39.

• Wakadisha bantu binunu bia bungi, uleja muabakumbajilaye majinga abu.​—Mâko 6:41-44.

• Wakakudimuna mâyi malue mvinyo mu tshibilu tshia dibaka, uleja muambuluishaye bantu bua kuikalabu ne nsombelu wa disanka.​—Yone 2:7-11.

Ntshinyi tshiudi mua kuenza bua kuikala ne nsombelu udi Nzambi ulongoluela bantu badi bamunange? Kudi “njila” uudi ne bua kuendela. Bible udi umubikila ne: “njila udi ufikisha ku muoyo, bantu bakese badi bamupeta.”​—Matayi 7:14.

Njila udi ufikisha ku muoyo ntshinyi? Nzambi udi wamba ne: “Meme, Yehowa, ndi Nzambi webe, Yeye udi ukulongesha bua diakalenga diebe, Yeye udi ukulombola mu njila uudi ne bua kuendela.” (Yeshaya 48:17) Wewe mulonde njila eu newikale ne nsombelu muimpe wa katshia.

Yezu wakamba ne: “Meme ndi njila ne bulelela ne muoyo.” (Yone 14:6) Patudi tuitaba bulelela buvua Yezu mulongeshe ne tuidikija tshilejilu tshivuaye mutushile,  dîba adi tudi mua kusemena pabuipi ne Nzambi ne kupeta masanka.

Mmunyi muudi mua kupeta njila udi ufikisha ku muoyo? Kudi bitendelelu bia bungi, kadi Yezu wakadimuija ne: “Ki muntu yonso udi umbikila ne: ‘Mukalenge, Mukalenge,’ wabuela mu Bukalenge bua mu diulu to, kadi anu eu udi wenza disua dia Tatu wanyi udi mu diulu ke wabuela.” (Matayi 7:21) Wakamba kabidi ne: “Nenubamanyine ku mamuma abu.” (Matayi 7:16) Bible udi mua kukuambuluisha bua kumanya ntendelelu mulelela ne kumusunguluja ne wa dishima.​—Yone 17:17.

Mmushindu kayi uudi mua kuendela mu njila udi ufikisha ku muoyo? Bidi bikengela ufike ku dimanya eu udi Mpokolo wa muoyo: Nnganyi au? Dîna diende nnganyi? Utu mushindu kayi? Udi wenza tshinyi? Mmusue bua tuenze tshinyi? *

Nzambi mmusue bua bantu benze bia bungi, kabayi bimanyina anu pa dienza mudimu, didia, dinaya, ne diasa mêku patupu to. Tudi mua kumanya Mufuki wetu ne kulua balunda bende. Tudi mua kuleja ne: tudi bamunange patudi tuenza disua diende. Yezu wakamba ne: “Bualu ebu budi bumvuija muoyo wa tshiendelele: bende bakumanya wewe, Nzambi umuepele mulelela.”​—Yone 17:3.

Kulonga mua kusankisha Nzambi umuepele mulelela kudi mua kulomba bua kuenza amue mashintuluka. Bidi mua kuikala bualu bukole. Kadi mu bulelela, netupete nsombelu mulenga patudi tutuadija kuendela mu njila udi ufikisha ku muoyo eu. Bua kukuambuluisha bua kupeta mandamuna a nkonko minene idi itangila Nzambi, Bantemu ba Yehowa badi bakulomba bua kulonga nabu Bible tshianana pa dîba ne muaba uudi musue. Udi mua kutupeta mu site wetu wa jw.org.