Nzambi wakambila Adama ne: “dituku diwadia [tshimuma tshia ku mutshi au] neufue bulelela.” (Genese 2:17) Mukenji eu kauvua mua kuikala ne bualu buawu bu biobi ne: Nzambi uvua mufuke Adama bua kukulakaja ne kufua to. Adama uvua mumanye ne: yeye kayi mudie tshimuma tshia ku mutshi au, kavua mua kufua to.

Kabivua bikengela bua Adama ne Eva badie tshimuma tshia ku mutshi au bua bikale ne muoyo, bualu mu budimi muvua mitshi ya bungi mishilashilangane ivua ikuama bimuma. (Genese 2:9) Bu mulume ne mukaji ba kumpala aba kabayi badie tshimuma tshia ku mutshi au, bavua mua kuikala baleje muvuabu batumikila Eu uvua mubapeshe muoyo. Bivua kabidi mua kuikala bileje ne: bavua bitaba bukenji bua Nzambi bua kubalombola mu malu onso.

Bua kumanya bua tshinyi Adama ne Eva bakafua, bidi bikengela tukonkonone muyuki udi mutubueje tuetu bonso mu tshilumbu etshi. Satana Diabolo wakakuata mudimu ne nyoka bua kuamba malu mabi a dishima. Bible udi wamba ne: “Mpindieu, nyoka uvua mudimuke kupita nyama yonso ya tshisuku idi mu mpata ivua Yehowa Nzambi mufuke. Nunku wakebeja mukaji ne: ‘Nzambi uvua muambe bulelela ne: kanuena ne bua kudia mitshi yonso idi mu budimi ebu anyi?’”​—Genese 3:1.

Ke Eva kuandamuna ne: “Tudi mua kudia bimuma bia mitshi idi mu budimi. Kadi Nzambi mmuambe bua bimuma bia mutshi udi munkatshi mua budimi ne: ‘Kanuena ne bua kubidia nansha, tòo, kanuena ne bua kuwulenga nansha; tshianana nenufue.’” Ke nyoka kumuambila ne: “Kanuena nufua bulelela to. Bualu Nzambi mmumanye ne: dituku dine dinudi nudia bimuma biawu, mêsu enu neatabale, nenuikale bu Nzambi, bamanye tshidi tshimpe ne tshidi tshibi.” Nunku Satana uvua usua kuamba ne: Yehowa mmuena dishima uvua ubengela baledi betu ba kumpala tshintu tshimpe.​—Genese 3:2-5.

Eva wakitaba tshivuabu bamuambile. Wakalengamina mutshi au. Uvua muimpe kumona, uvua usankisha bikole. Nunku wakapola tshimuma ne kutuadijaye kutshidia. Bible udi uleja ne: “Pashishe wakalua kupesha bayende pakavuabu nende, yeye kubanga kudia.”​—Genese 3:6.

Bivua ne bua kuikala bibungamije Nzambi bikole bua kumona ne: bana bende bananga bavua basungule bua kubenga kumutumikila! Ntshinyi tshiakenzaye? Yehowa wakambila Adama ne: ‘Neupingane ku buloba, bualu kuoku ke kuvuabu bakuangatshile. Bualu wewe udi lupuishi ne neupingane ku lupuishi.’ (Genese 3:17-19) Bua bualu ebu, “matuku onso a muoyo wa Adama akafika ku bidimu 930, pashishe wakafua.” (Genese 5:5) Adama kakaya mu diulu to, anyi kakatungunuka ne kuikala ne muoyo muaba mukuabu. Kumpala kua Yehowa kumufukaye ne lupuishi lua buloba  kavuaku to. Nunku pakafuaye, kavua kabidi ne muoyo anu bu lupuishi luvuabu bamufuke nalu. Wakajimina kashidi. Bia dibungama be!

Bu muvua Adama ne Eva babenge kutumikila ku budisuile, bakajimija bupuangane buabu ne ditekemena dia kuikala ne muoyo kashidi. Bakafika ku dinyanguka mubidi; kuluabu bena mpekatu ne bapange bupuangane. Kadi mpekatu wabu wa dibenga kutumikila au kavua ubatangila anu bobu nkayabu to. Bakasambulujilabu bana babu bubi abu. Lomo 5:12 udi wamba ne: “Bu muvua mpekatu mubuele mu ba pa buloba kupitshila kudi muntu umue [Adama], ne lufu lubuele bua mpekatu, ne mushindu eu lufu lutampakane kudi bantu bonso bua muvuabu bonso benze mpekatu.”

Bible udi umvuija mpekatu ne lufu bu “tshilamba tshidi tshibuikila bukua bantu buonso ne tshibuikilu tshidi tshilukila pa bisamba bionso.” (Yeshaya 25:7) Tshilamba etshi tshidi tshibuikila bukua bantu anu bu dibungi dia mulungu didi kadiyi kunyema. Mu bulelela, ‘bantu bonso badi bafua mu Adama.’ (1 Kolinto 15:22) Mupostolo Paulo udi wela lukonko elu: “Nnganyi wansungila ku mubidi udi uya nanyi ku lufu elu?” Kudiku muntu anyi?​—Lomo 7:24.