Leza wālombwele Adama amba, “difuku dyokadya [ku mutyi], bine ukafwa.” (Ngalwilo 2:17) Uno musoñanya kewādipo wa kwikala na buluji shi Adama wādi wa kununupa ne kufwa. Adama wādi uyukile amba shi kādilepo ku mutyi, kādipo wa kufwa.

Ba Adama ne Eva kebādipo banenwe kudya ku uno mutyi pa kwikala bōmi, mwanda mu budimi mwādi mityi mingi ipa bipa. (Ngalwilo 2:9) Shi ba mulume ne mukaji babajinji kebādilepo ku mutyi, bādi ba kulombola’mba bakōkele Yewa wēbapele būmi. Kadi bādi ba kulombola’mba betabije Leza ebaludike.

Pa kuyuka kyāfwidile ba Adama ne Eva, tufwaninwe kulangulukila pa mwisambo umo witutala ne batwe. Satana Dyabola wāingidije nyoka pa kubepa bubela bwa nshikani. Bible unena’mba: “Ino nyoka wādi mukosoke bininge mu banyema bonso ba ntanda bālongele Yehova Leza. Penepo wānena mwana-mukaji amba: ‘Le bine Leza wanenene amba kemufwaninwepo kudya ku mityi yonso ya mu budimi?’”​—Ngalwilo 3:1.

Penepa Eva wālondolola’mba: “Tubwanya kudya bipa bya ku mityi ya mu budimi. Inoko Leza wanenene pa mwanda wa bipa bya ku mutyi udi mu bukata bwa budimi amba: ‘Kemufwaninwepo kudya’ko, aa, kemufwaninwepo kutenga’ko; shi bitupu mukafwa.’” Kupwa nyoka wamunena’mba: “Bine kemukafupo. Mwanda Leza uyukile amba mu dine difuku dyomukadya’ko, meso enu akapūtuka kadi mukekalanga pamo bwa Leza, mukayuka biyampe ne bibi.” Mu uno muswelo, Satana wānenene amba Yehova i mbepai wāsuminwe bambutwile betu babajinji kintu kiyampe.​—Ngalwilo 3:2-5.

Eva wāitabije byawāivwene. Wābandila mutyi. Wādi muyampe kadi usangaja! Wāolola kuboko, wāapa’ko kipa, wādya’ko. Kadi Bible unenena’mba: “Kupwa, wāpa’ko ne wandi mulume paādi nandi pamo, nandi wādya’ko.”​—Ngalwilo 3:6.

Bine Leza wāivwene bulanda pa kumona bandi bana basenswe bamutombokela ku kusaka! Le wālongele’po namani? Yehova wānenene Adama amba: ‘Ukajokela ku biloba, mwanda e kowalupwilwe. Mwanda wi luvumbi kadi ukajokelanga ku luvumbi.’ (Ngalwilo 3:17-19) Pa kino, “mafuku onso a būmi bwa Adama āfikile pa myaka 930, penepo wāfwa.” (Ngalwilo 5:5) Adama kāendelepo mūlu nansha mu kīkalo kya mishipiditu. Kādi’kopo kumeso kwa Yehova kumupanga ku luvumbi. Nanshi  kitatyi kyaāfwile, kādipo na būmi pamo’nka bwa luvumbi kwaāpangilwe. Wālekele kwikala’ko. Bine i kya bulanda!

Ba Adama ne Eva byobātombokele ku kusaka, bājimije būmi bubwaninine ne kyepelo kyabo kya kwikala’ko nyeke. Ngitu yabo yāshintyile bya binebine; bāikala bampikwa kubwaninina ne ba bubi. Inoko bubi bwabo bwa kutomboka kebwēbaletēlepo bipa bilula’nka abo bene. Bāsambulwidile lutundu lwabo bubi bwabo. Kisonekwa kya Bene Loma 5:12 kinena’mba: “Monka mwātwelele bubi mu ino ntanda kupityila ku muntu umo [Adama] ne lufu kupityila ku bubi, mo mwasambakenine ne lufu ku bantu bonso mwanda bonso balongele bubi.”

Bible utela bubi ne lufu bu “kisandi kipūtyile bantu bonso ne kipūtwa kisukilwe pa mizo yonso.” (Isaya 25:7) Kino kisandi, i kipūte bantu bonso pamo bwa lumundu lwa sumu kelubwanyapo kunyema muntu nansha umo. Na bubine, ‘bonso bafwilanga mudi Adama.’ (1 Bene Kodinda 15:22) Mutumibwa Polo wāipangwile kino kipangujo amba: “I ani le ukankūla ku umbidi umfikija ku luno lufu?” Le udi’ko?​—Bene Loma 7:24.