LANGA’PO bidi shi utala video īsambila pa muntu mutumbe, padi i mukayi wa minjiki mutumbe osangelanga. Video ibashilula kulombola mwaatamine, mwaadi wifundila minjiki, ne mwaadi wiibidija kitatyi ne kitatyi. Kupwa ubamumone wimba, wenda mu matanda meshileshile, kadi wayukana ntanda yonso. Ne kwija kwine mpika wanunupa, ayo video ifula nandi wafu.

Ino video ke ya kufwatakanyapo, inoko īsambila pa mwanda mumweke mu būmi bwa muntu. Nansha byoisambila pa mukayi wa minjiki, ino befundi ba sianse, banyemi, ne bantu bakwabo batumbe, nabo i bashiye mānga ya uno muswelo. Uno muntu walongele padi bintu bivule, ino le ubeipangula byaadi wa kulonga shi kekwadipo myanda mibi pamo bwa bununu ne lufu?

I kya bulanda, mwanda bino byo bitutengēle batwe bonso. (Musapudi 9:5) Nansha shi tubalonga bukomo namani, ketubwanyapo kunyema bununu ne lufu. Kadi ke enkapo kyakyo, tubwanya kufwa na akishida nansha na misongo. Enka na munenena’kyo Bible, tudi pamo bwa lumundu lwa lubanga “lumweka kitatyi kityetye kupwa lwajimina.”​—Yakoba 4:14.

Pa kino, bamo i babulwe lukulupilo ne kitungo, balondanga musoñanya wa amba “tudyei tutome, mwanda kesha tusa kufwa.” (1 Bene Kodinda 15:32) Le kumwenepo amba kwikala na būmi bwa uno muswelo i kintu kilombola’mba lufu i mwanda wa bulanda? Ekale panopano nansha mwenda mafuku, nakampata kitatyi kyotanwa na makambakano makomo, ubwanya kwiipangula’mba, ‘le buno bo būmi bonso kete?’ Le ukatana malondololo kwepi?

Bantu bavule dyalelo banyemenanga ku sianse. Befundi ba sianse ne badokitele baloñanga bukomo bwa kulepeja’ko būmi bwetu. Kadi befundi ba sianse bamo baloñanga bukomo bwa kulepeja’ko būmi bininge. Ino nansha shi abalonga bukomo namani, bipangujo bikidi’ko i bino: Mwanda waka tununupanga ne kufwa? Le kudi lukulupilo lwa amba lufu walwana netu ukanekenibwa? Bishinte bilonda’ko bisa kwisambila pa uno mwanda ne kulondolola ku kipangujo kya amba, le buno bo būmi bonso kete?