ຈົດໝາຍສະບັບທີສອງເຖິງຕີໂມທຽວ 3:1-17
3 ຂໍໃຫ້ຮູ້ວ່າ ໃນສະໄໝສຸດທ້າຍ+ຈະເປັນໄລຍະທີ່ມີແຕ່ຄວາມຫຍຸ້ງຍາກລຳບາກແລະອັນຕະລາຍ.
2 ຄົນຈະເຫັນແກ່ໂຕ ເຫັນແກ່ເງິນ ມັກອວດ ຈອງຫອງ ໝິ່ນປະໝາດ ບໍ່ຟັງຄວາມພໍ່ແມ່ ບໍ່ສຳນຶກບຸນຄຸນ ບໍ່ພັກດີ
3 ບໍ່ຮັກຍາດຕິພີ່ນ້ອງ* ບໍ່ຍອມໃຜ ມັກໃສ່ຮ້າຍຄົນອື່ນ ບໍ່ຄວບຄຸມໂຕເອງ ໂຫດຮ້າຍ ຊັງສິ່ງທີ່ດີ
4 ເປັນຄົນທໍລະຍົດ ຫົວແຂງ ອວດດີ ເປັນຄົນຮັກຄວາມມ່ວນຊື່ນແທນທີ່ຈະຮັກພະເຈົ້າ
5 ເປັນຄົນເຄັ່ງສາສະໜາແຕ່ທາງນອກ ແຕ່ບໍ່ໄດ້ເຮັດຕາມຄຳສອນຂອງສາສະໜາ.+ ຂໍໃຫ້ເຈົ້າຢູ່ໄກໆຈາກຄົນແບບນີ້.
6 ເຂົາເຈົ້າບາງຄົນຊອກວິທີໃກ້ຊິດກັບຄອບຄົວຄົນອື່ນແບບແນບນຽນ ເພື່ອຫຼອກລວງພວກຜູ້ຍິງທີ່ເປັນຄົນຊື່ໆເຊິ່ງເປັນຄົນບໍ່ສົມບູນແບບແລະປ່ອຍໂຕໄປກັບຄວາມຕ້ອງການຫຼາຍຢ່າງ.
7 ເຖິງວ່າຜູ້ຍິງເຫຼົ່ານີ້ຈະມັກຮຽນຮູ້ເລື່ອງຕ່າງໆ ແຕ່ກໍບໍ່ເຄີຍເຂົ້າໃຈຄວາມຈິງຢ່າງຖືກຕ້ອງ.
8 ເຂົາເຈົ້າຕໍ່ຕ້ານຄວາມຈິງຄືກັບທີ່ຢາເນແລະຢຳເບເຄີຍຕໍ່ຕ້ານໂມເຊ. ເຂົາເຈົ້າເປັນຄົນໃຈຊົ່ວ. ພະເຈົ້າບໍ່ພໍໃຈເຂົາເຈົ້າຍ້ອນເຂົາເຈົ້າບໍ່ໄດ້ໃຊ້ຊີວິດຕາມຄວາມເຊື່ອ.
9 ເຂົາເຈົ້າຈະໄປບໍ່ຮອດໃສ ແລະທຸກຄົນຈະເຫັນຄວາມໂງ່ຂອງເຂົາເຈົ້າຄືກັບທີ່ເຫັນຄວາມໂງ່ຂອງຢາເນກັບຢຳເບ.+
10 ແຕ່ເຈົ້າໄດ້ເຮັດຕາມຄຳສອນຂອງຂ້ອຍຢ່າງດີ ແລະໄດ້ຮຽນແບບຂ້ອຍໃນເລື່ອງການໃຊ້ຊີວິດ+ ເລື່ອງຈຸດມຸ່ງໝາຍ ຄວາມເຊື່ອ ຄວາມອົດທົນ ຄວາມຮັກ ແລະຄວາມສັດຊື່.
11 ເຈົ້າຮູ້ດີເລື່ອງທີ່ຂ້ອຍຖືກຂົ່ມເຫງແລະທົນທຸກຢູ່ເມືອງອັນຕີໂອເຂຍ+ ເມືອງອີໂກນີອົນ+ ແລະເມືອງລີຊະທາ.+ ຂ້ອຍຕ້ອງອົດທົນກັບການຂົ່ມເຫງຫຼາຍແບບ ແຕ່ຜູ້ເປັນນາຍກໍຊ່ວຍຂ້ອຍໃຫ້ລອດຈາກເຫດການທັງໝົດນັ້ນມາໄດ້.+
12 ທີ່ຈິງ ທຸກຄົນທີ່ຕັ້ງໃຈໃຊ້ຊີວິດໂດຍເຊື່ອຟັງພະເຈົ້າສຸດຫົວໃຈແລະເປັນລູກສິດຂອງພະຄລິດເຢຊູກໍຈະຖືກຂົ່ມເຫງຄືກັນ.+
13 ແຕ່ຄົນຊົ່ວແລະຄົນຫຼອກລວງແຮ່ງຈະເຮັດຊົ່ວຫຼາຍຂຶ້ນເລື້ອຍໆ. ເຂົາເຈົ້າຈະຫຼອກລວງຄົນອື່ນແລະໂຕເອງກໍຈະຖືກຫຼອກລວງຄືກັນ.+
14 ສ່ວນເຈົ້າ ຢ່າເຊົາເຮັດຕາມສິ່ງທີ່ເຈົ້າໄດ້ຮຽນຮູ້ແລະໝັ້ນໃຈແລ້ວ.+ ເຈົ້າກໍຮູ້ວ່າເຈົ້າຮຽນຈາກຜູ້ໃດ.
15 ເຈົ້າຮູ້ຈັກພະຄຳພີສັກສິດ+ຕັ້ງແຕ່ເຈົ້າເກີດ.*+ ພະຄຳພີໃຫ້ສະຕິປັນຍາທີ່ຈະເຮັດໃຫ້ເຈົ້າລອດໄດ້ໂດຍທາງຄວາມເຊື່ອໃນພະຄລິດເຢຊູ.+
16 ທຸກສິ່ງທີ່ຂຽນໄວ້ໃນພະຄຳພີມາຈາກພະເຈົ້າ.*+ ພະຄຳພີມີປະໂຫຍດສຳລັບສອນ+ ຕັກເຕືອນ ແກ້ໄຂເລື່ອງຕ່າງໆໃຫ້ຮຽບຮ້ອຍ ແລະສັ່ງສອນຄົນໃຫ້ເຮັດສິ່ງທີ່ຖືກຕ້ອງ+
17 ເພື່ອຄົນຂອງພະເຈົ້າຈະມີຄວາມສາມາດພຽງພໍແລະມີຄວາມພ້ອມສຳລັບວຽກທີ່ດີທຸກຢ່າງ.
ຂໍ
^ ຫຼື “ບໍ່ມີຄວາມຮັກຕາມທຳມະຊາດ”
^ ຫຼື “ເປັນແອນ້ອຍ”
^ ຫຼື “ພະເຈົ້າດົນໃຈໃຫ້ຂຽນຂຶ້ນມາ”
