Biso bato tobangaka liwa mpo ezali monguna, mpe tosalaka nyonso oyo tokoki mpo na kobatela bomoi na biso. (1 Bakorinti 15:26) Kasi, kozala na nsɔmɔ ya liwa oyo euti na mateya ya lokuta mpe biyambayamba etyaka bato na “boombo bomoi na bango mobimba.” (Baebre 2:15) Koyeba solo na oyo etali liwa ekopekisa yo ozala na nsɔmɔ ya liwa, oyo ekoki kolongola yo esengo ya kozala na bomoi.​—Yoane 8:32.

Solo na oyo etali liwa

•   Bato oyo bakufá bayebaka eloko te. (Nzembo 146:4) Osengeli te kobanga ete okonyokwama to okomona mpasi soki okufi, mpo Biblia elobi ete liwa ezali lokola mpɔngi.​—Nzembo 13:3; Yoane 11:11-14.

•   Bato oyo bakufá bakoki kosala biso mabe te. Ata baoyo bazalaki mpenza banguna na biso “bazangi makasi kati na liwa.” (Masese 21:16) Biblia elobi ete “koyina na bango ná zuwa na bango esili.”​—Mosakoli 9:6.

•   Liwa esukisaka makambo nyonso te. Na nzela ya lisekwa, Nzambe akozongisa na bomoi bato oyo bakufá.​—Yoane 5:28, 29; Misala 24:15.

•   Nzambe alaki ete ekozala na ntango moko oyo “liwa ekozala lisusu te.” (Emoniseli 21:4) Mpo na ntango yango, Biblia elobi: “Bayengebene bakozwa mabele, mpe bakofanda wana seko”; moto moko te akozala lisusu na nsɔmɔ ya liwa.​—Nzembo 37:29.