OKKIRIZA nti Bayibuli yava eri Katonda? Oba olowooza nti Bayibuli kitabo ekirimu amagezi g’abantu?

N’abantu abamu abeeyita Abakristaayo balina endowooza za njawulo ku nsonga eyo. Ng’ekyokulabirako, okunoonyereza okwakolebwa mu Amerika mu 2014 kwalaga nti abantu abasinga obungi abeeyita Abakristaayo bakkiriza nti “Bayibuli erina akakwate ne Katonda.” Ate ku luuyi olulala, omuntu 1 ku buli bantu 5, Bayibuli baali bagitwala ng’ekitabo ekirimu “engero ez’edda, enfumo, ebyafaayo, n’amateeka ebyawandiikibwa abantu.” Kati ekyebuuzibwa kiri nti, “Ddala Bayibuli ‘yaluŋŋamizibwa’ Katonda?”—2 Timoseewo 3:16.

Bayibuli erimu ebitabo 66, ebyawandiikibwa abantu nga 40 mu bbanga lya myaka nga 1,600. Naye bwe kiba nti Bayibuli yawandiikibwa bantu, kijja kitya okuba nti ‘yaluŋŋamizibwa Katonda’? Okuba nti Bayibuli ‘yaluŋŋamizibwa Katonda’ kitegeeza nti ebigirimu byava eri Katonda. Bayibuli egamba nti: “Abantu baayogeranga ebyava eri Katonda nga balina obulagirizi bw’omwoyo omutukuvu.” (2 Peetero 1:21) Katonda yakozesa amaanyi ge agatalabika agayitibwa omwoyo omutukuvu okutuusa obubaka ku bantu abaawandiika ebitabo ebiri mu Bayibuli. Kino kiyinza okugeraageranyizibwa ku maneja wa kampuni abaako obubaka bw’agamba omuwandiisi we okuwandiika, era omuwandiisi oyo n’abuwandiika. Ebyo omuwandiisi by’aba awandiise tebiba bibye wabula biba bya maneja wa kampuni.

Abawandiisi ba Bayibuli abamu baategeezebwa obubaka obuva eri Katonda okuyitira mu bamalayika. Abalala baafuna okwolesebwa okuva eri Katonda. Ate abamu Katonda yabatuusaako obubaka bwe okuyitira mu birooto. Emirundi egimu Katonda yaleka abawandiisi abo okuwandiika obubaka bwe nga bakozesa ebigambo byabwe, ate emirundi emirala yabategeezanga ebigambo byennyini bye baalina okuwandiika. Obubaka ka babe nga baabufuna mu ngeri ki, byonna bye baawandiika byava eri Katonda.

Tukakasa tutya nti Katonda ye yaluŋŋamya abawandiisi ba Bayibuli? Ka tulabeyo obukakafu bwa mirundi esatu.