Kyebhi ki u Tena Kukala ni Mwenyu wa Beta-o-Kota?
LELU, o mwenyu ki wala kala kya mesenene Nzambi. O ixi hinu yezala ni athu a xila o itumu ya Mubhangi wetu, ni kukatula mbote mu milongi, ni kukayela o henda yê ni idifwa ya kamukwa ya yuka. Nzambi wa mesenene kwila ene a sanguluka kumoxi , kala mwiji, kwijiya ima ya kamukwa, ni kubhanga o ixi kukituka palayízu.
NZAMBI WA KANENA MWENYU WAMBOTE MU IXI KALA KYA MESENENE KU DIMATEKENU
“Ita wa i swikika katé ku maxokolo a’xi.”—Jisálamu 46:9.
“Kithangana kyé . . . ya bhixila-bhu kyá, ya kubwikisa oxi.”—Dijingunwinu 11:18.
“Ki bhwa kà kala mukwa-bhata wila: ‘Nga mu kata.’”—Izaya 33:24.
“A kà kemba ni ikalakalu ya maku mâ katé ku hádya-ni-hádya.”—Izaya 65:22.
Kyebhi kya-nda di kumbidila o ikanenu yiyi? Nzambi wa solo Mon’ê, Jezú, kala Sobha ya utuminu wê wa yuka. Mwene wa-nda tumina o ixi tunde ku dyulu. O Bibidya i tumbula o utuminu yú, kala Utuminu wa Nzambi. (Daniyele 2:44) O Bibidya i zwela ya lungu ni Jezú kwila : “Nzambi wa ka mu bhanga sobha . . . , mwene wa ka tumina.”—Luka 1:32, 33.
Kyoso kyexile mu ixi, Jezú wa bhange madiwanu avulu phala kulondekesa kwila, kala Sobha, mwene wa-nda bhanga o mwenyu kuyuka, o mwenyu u twala na-u kindala ndenge.
JEZÚ WA LONDEKESA O IMA YAMBOTE YA-NDA BHANGA KU ATHU A LENDUKA
Mwene wa sake o mawukexilu oso a mawuhaxi, phala kulondekesa kyebhi kya-nda zubha o mawuhaxi moso mu ngongo.—Matesu 9:35.
Mwene wa batamesa o musanza wa kalunga, wa londekesa kwila wa-nda langa kyambote o athu, mu kukala ni kutena kwa ibhangelu.—Máluku 4:36-39.
Mwene wa disa mazunda a athu, phala kulondekesa kwila mwene wa-nda dikila o athu ni kudya kwa vulu.—Máluku 6:41- 44.
Mwene wa bhangesa menya ku bhiluka vinyu mu fesa ya ukaza, phala kulondekesa kwila wa-nda kwatekesa o athu kukala ni mwenyu wa sanguluka ku hádya.—Nzwá 2:7-11.
Kyebhi ki u tena kukala ni mwenyu wa mesenene Nzambi phala o athu a mu zolo? Sayi kima ki wa tokala o kubhanga. O Bibidya i jimbulula kwila sayi ‘njila yòfele, kaya ku mwenyu; athu ofele a ka sanga.’—Matesu 7:14.
SANGA O NJILA YA MWENYU WA BETA-O-KOTA
Ihi ilombolola o njila ya mwenyu? Nzambi wambe kwila: “Eme Jihova Nzambi yé, u ku longa kyoso kya wabha, hé u ku endesa mu njila i wa fwama kwenda mu ku di-tela.” (Izaya 48:17) Se u kayela o itendelesu yiyi, wa-nda kala ni mwenyu wambote.
Jezú wambe: “Eme ngi njila, ngi kidi, ngi mwenyu.” (Nzwá 14:6) Se tu bhanga kala kya tu tumu Jezú ni kukayela o phangu yê, twa-nda zukama dingi kwa Nzambi ni kukala ni mwenyu wa yuka.
Kyebhi ki u tena ku sanga o njila ya mwenyu? Kuma kwala jingeleja javulu, Jezú wa tendelesa: ‘Ki ene oso a ng’ila Ngana, Ngana, a kà bokona mu Utuminu wa dyulu; kikale ngó yó u bhanga o vondadi ya Tata yami wene mu dyulu.’ (Matesu 7:21) Mwene wambe wé: “Mu ejidila ku ibundu yâ.” (Matesu 7:16) O Bibidya i tena ku ku kwatekesa kwijiya o ubhezelu wa kidi ni ku tungula o ubhezelu wa makutu.—Nzwá 17:17.
Kyebhi ki u tena kumateka kwenda mu njila ya mwenyu? Kiki kilombolola kwijiya o Mubhangi wa mwenyu. O mubhangi yú nanyi mwene? Dijina dyê nanyi? Mwene wa difu kyebhi? Ihi yene mu bhanga? Mwene wa mesena kwila tu bhanga ihi? *
Nzambi wa mesena kwila o athu a kalakala, a dya, a tonoka ngó ni kukala ni mwiji. Etu tu tena kwijiya o Mubhangi wetu ni kukituka makamba mê. Etu tu tena kulondekesa kwila twa mu zolo, mu ku bhanga o vondadi yê. Jezú wambe: “O mwenyu ki wábhwa wenyú: Kwila oso a ku ijiye eye u Nzambi ya kidi imoxi-èlele.”—Nzwá 17:3.
BHU KAXI KA BIBIDYA, NZAMBI U KULONGA “KYOSO KYA WABHA.”—IZAYA 48:17
KIMA KYBHI KYA DYANGA KI WA TOKALA O KUBHANGA KU MWENYU WÉ
Phala kusangulukisa o Nzambi ya kidi, nange kubhinga kulungulula ima ku mwenyu wetu. Kubhanga kiki nange kubhonza. Mu kidi, kiki kilombolola kwila, o mwenyu wetu u tena kuyuka, kyoso ki tu kala mu kwenda mu njila ya mwenyu. Phala ku kukwatekesa kusanga o itambwijilu ya lungu ni Nzambi, o Jimbangi ja Jihova a tena ku kulonga o Bibidya mu ola ni kididi ki wa mesena se kufuta kima. Eye we u tena kudikunda n’etu bhu kaxi ka www.isa4310.com.