SUMBALA o kubhukumuka kwa jitata jetu Adá ni Eva kwa bhekela o kituxi, kukuka ni kufwa mu ngongo yoso, né kiki Nzambi ka lungulula o vondadi yê ya lungu ni athu mu ngongo. Mu ithangana yoso Nzambi wene mu londekesa bhu kaxi ka Maka-mê o Bibidya kwila, o vondadi yê ki ya lunguluka kana.

• “Ixi-phe i xalela ku athu yá ayuka, ene a i lundula, mwene mwa tunga, o thembu yâ ki ibhu.” —Jisálamu 37:29.

• “O kalunga wa ka kà bhwisa-ku nzaká, kyenyiki Jihova wa kà kondona o masoxi mu pholo joso.”—Izaya 25:8.

• ‘O nguma i sukidila-ku o kalunga, a-nda ku ka bhwisa.’—1 Kolindu 15:26.

• “Ki ku kala dingi kùfwa, nè ngó mukôndo, mba kudila, mba kukata.”—Dijingunwinu 21:4.

Kyebhi Nzambi kya-nda tolola o nguma yetu o kalunga? Kala ki twa mono, o Bibidya izwela ni kidi kyoso kwila, “muthu wa yuka  . .o thembu yê ki ibhu”. Maji izwela we kwila, “kana-mu muthu wa yuka, u bhanga ngó mbote mu mbote.” (Ndongixi 7:20) Phala kuzubha o kalunga, o kwila Nzambi wa-nda kweha o itumu yê? Kikola! Mwene ka-nda bhanga kiki, mukonda “Nzambi ka moneka makutu.” (Titu 1:2) Mu kiki-phe, ihi ya-nda bhanga Nzambi phala kukumbidila o vondadi yê ya lungu ni athu mu ngongo?

Jihova Nzambi wa bhange kima phala kubhulula o athu ku kalunga​—bhu kaxi ka sata ya kukula. O kukula, kulombolola kima kya valolo ki tena kufuta phala kubhulula muthu. Athu oso akwa ituxi, a kingila o kufwa. Ni kidi kyoso o Bibidya yamba kwila: “A bhange yoso ya tena maji ki bhwala u tena kukula phang’yê, mba ku mu bhakela kwa Nzambi, ni kubhana kitadi, (Mukonda kukula, o mwenyu wa muthu, kwate kyavulu, jimbongo né ji vula ki ji tena-bhu, kuma jene ji dyanga kúbhwa).”—Jisálamu 49:7, 8.

Kyoso o muthu mukwa ituxi kyafwa, kifwa mwene wa mu futa ngó o ituxi yê, mwene ka tena kubhanga kima mba kufwa mukonda dya ituxi ya akwa. (Loma 6:7) Etu twa bhingile muthu wa yuka wa kambe kituxi phala kubhana o mwenyu wê kala sata, ki phala o ituxi yê kana, maji phala o ituxi yetu.—Jihebelewu 10:1-4.

Kyene mwene kya bhange Nzambi. Mwene wa tumikisa Monê Jezú phala ku mu vwala kala muthu wa yuka mu ixi. (1 Phetele 2:​22) Jezú wambe kwila mwene weza “phala kubhana o mwenyu wê mu ku kula mundu.” (Máluku 10:45) Mwene wafu phala kutolola o nguma o kalunga, phala etu tu kale ku mwenyu.—Nzwá 3:​16.

Lelu o ikanenu ya Bibidya ya mu di kumbidila, mukonda twala mu “jithembu jabhonzo.” Kiki kilondekesa kwila twala “mu izuwa isukidila-ku” wa mundu yu. (2 Timote 3:1) O izuwa i sukidila-ku ya-nda bhwa “bhu Kizuwa kya Kufundisa, kya kubwikisa athu abhumu.” (2 Phetele 3:3, 7) Maji o athu a zolo Nzambi, a-nda bhuluka ku dizubhilu ni kwila a-nda tambula o mabesá wa kukala ni ‘mwenyu ki wa ká bhwa.’—Matesu 25:46.

Mazunda a athu amukwá a-nda tambula o kidyelelu kya kukala ni mwenyu wa kalelaku, kyoso kya-nda ku a fukununa. Jezú wa londekesa kwila o muthu wafu u tena kufukunuka, kyoso mwene kyayi mu mbanza ya Nayíni. Kyoso o mona umoxi-élele wa mutudi kyafu, Jezú “henda ya mu kwata,” anga u mu fukununa. (Luka 7:11-15) O poxolo Phawulu wa soneka: “Ngala we ni kudyelela kwa Nzambi . . . kuma hádya kukala difukunukinu dya athu ayuka ni athu abhukumuka.” O kidyelelu kiki, kilondekesu kya henda ya Nzambi phala o athu.—Ikalakalu 24:15.

Mazunda a athu a tena kukingila kukala ni mwenyu wa kalela-ku. O bibidya yamba: “Ixi-phe i xalela ku athu yá ayuka, ene a i lundula, mwene mwa tunga, o thembu yâ ki ibhu.” (Jisálamu 37:29) Mu kithangana kyenyókyo, ene a-nda sanguluka mu kumona o di kumbidilu dya izwelu ya poxolo Phawulu yo soneke 2.000 a mivu ku dima: “Eye, kalunga, o kikôwe kyê kyebhi? Eye, kalunga, o nguzu yê ya kujibha yebhi?” (1 Kolindu 15:55) O nguma ya mundu, o kalunga, a-nda ku ka bhwika mwene!