Nzambi anga wambela Adá wixi: “O kizuwa ki wa kà dya [ku muxi yu] ijiya na-kyu kuma wa kà fwa mwene.” (Dimatekenu 2:17) Se Nzambi wa bhangele Adá phala kukuka ni kufwa, keji bhinga ku mu bhana o kitumu kiki. Adá wejidile kwila se mwene ka dile ku kibundu keji fwa.

Adá ni Eva ka bhingile kudya ku kibundu phala kukala ku mwenyu. Kwexile mixi yexile ni ibundu yavulu yawabha mu njaludim. (Dimatekenu 2:9) Se ene ka dile o kibundu, eji londekesa o kubelesela kwâ, kwa Yó wa a bhana o mwenyu. Eji londekesa we kwila, a mu xila Nzambi ni kwila mwene ngó wa tokala ku a endesa.

Phala kutendela kyambote se mukonda dyahi Adá ni Eva afu, twa bhingi kutonginina kyambote kyebhi o maka yá alungu n’etu. Satanaji, o Dyabhu, wa bhangesa o nyoka kuzwela o makutu. O Bibidya yamba: “Tala, o nyoka-phe i beta kudimuka, jixitu joso ja yangu ndenge, ja bhanga Jihova Nzambi. Nyoka anga i ambela muhatu, ixi: ‘Kifwa Nzambi wa mi kidika kudya ku mixi yoso ya díbhya?’”​—Dimatekenu 3:1.

Eva anga wa tambwijila wixi: “Ku ibundu ya mixi yoso mu díbhya tudyetu; maji muxi ngó umoxi wala mu kaxi ka díbhya, wene wa tu kidika kudya ibundu yê; kuma Nzambi wambe, wixi: Kana kudya-ku, mba kukwata-ku ngó, phala ki mu fwe.” Nyoka-phe anga u ambela muhatu, wixi: “Makutu, ki mwa-nda kufwa. Mukonda Nzambi wa k’ijiya kuma kizuwa ki mu dya-ku, mwa-nda kutona mesu, mu sokela ni Nzambi, mu ijiya kyawabha ni kyayibha.” Satanaji wa tatela Jihova kwila, mwene mukwa makutu, wa sweka kima kyambote ku jitata jetu ja dyanga.—Dimatekenu 3:2-5.

Eva wa xikana mu ima yevu. Mwene wa tonginina o kibundu. Kuma muxi wa mbote phala kudya, wa wabha we ku mesu! Mwene wa kwata o kibundu, anga u mateka o kudya. O Bibidya yamba: “U bhana we mwadi wê, mwene we anga u dya.”​—Dimatekenu 3:6.

Nzambi, mu ku mona mon’ê wa kazola ku mu bhukumukina, wa luwala kyavulu! Ihi ya bhange Nzambi? Jihova wambela Adá wixi: “Wa kà . . . vutuka ku mavu, mukonda kwene ku wa tundile. Kuma eye wala u mavu, ku mavu kwene ku wa kà vutukila.” (Dimatekenu 3:17-19) Mukonda dya kiki, “izuwa yoso ya Adá mu ngongo, anga i tena konda ya hama’vwa ya mivu ni makwinyi atatu; anga u fwa.” (Dimatekenu 5:5) Adá kayi ku dyulu mba mu kididi kyengi. Ande dya Jihova ku mu bhanga, mwene kexile hanji ku mwenyu. Kyoso mwene kyafu, mwene wa kituka mavu. Mwene kala dingi ku mwenyu. Ndolo ya dikota!

Mukonda dya kubhukumuka kwâ, Adá ni Eva a texi o mwenyu wâ wa yuka ni kidyelelu kya kukala ku mwenyu ku hádya ni hádya. Mikutu yâ ya mateka kulunguluka, ene a kituka akwa ituxi. O kituxi kya te mukonda dya kubhukumuka, ki kya xalela ngó phala ene kana, o twana twâ a lundula we o kituxi. O divulu dya Loma 5: 12 dyamba: “Mukwâ ni kya bokona o ituxi mu ngongo ku muthu umoxi, o kufwa kù kwejila mu ituxi; kyene we kya bhiti o kufwa ku thandu dya athu oso, kuma ene oso ituxi a i te.”

O Bibidya i zwela kwila o kituxi ni kalunga kya di fu ni “O kivunga kya pholo mwene wa kà ki bhwisa-ku ku mulundu wenyú, kyoso ki ene ku di vunga na-kyu ifuxi yoso, ni kivunga-mútwe mwa mu swamena akwa jixi.” (Izaya 25:7) O kivunga kiki kyedi kala o mundu woso a u jingi ku nyoka ka tena ku i lenga, ya-nda numata enyoso, sé ku muthu u tena ku tunda-mu. Mu kidi “oso a fwila mwa Adá.” (1 Kolindu 15:22) Kala kya dibhwidisa poxolo Phawulu, tu tena we kudibhwidisa: “Nanyi u ngi kudila ku mukutu yú wa mu ngi bheka mu kalunga?” Sayi muthu weji tena? —Loma 7:24.