Twazyèm kanpay predikasyon Pòl la te fini nan vil Jerizalèm. Se la yo te arete l e yo te fèmen l nan prizon. Yon jou swa, Pòl te fè yon vizyon kote Jezi te di l: ‘Ou dwe al Wòm pou w preche.’ Yo te pran Pòl Jerizalèm mennen l Sezare kote li te pase dezan nan prizon. Pandan yo t ap jije Pòl devan gouvènè Festis, Pòl di: ‘Voye m Wòm pou Seza jije m.’ Festis di: “Piske w mande pou w al devan Seza, ou pral devan Seza.” Yo te mete Pòl nan yon bato ki t apral Wòm, e Lik ak Aristak, de kretyen, te ale avè l.

Te gen yon gwo tanpèt ki te dire plizyè jou ki te bare yo sou lanmè a. Tout moun te panse yo t apral mouri. Men sa Pòl te di: ‘Mesye, gen yon zanj ki di m nan yon rèv: “Pòl, ou pa bezwen pè. W ap rive Wòm e tout moun ki avè w nan bato a ap sove.” Pran kouraj! Nou pap mouri.’

Tanpèt la te dire 14 jou. Alafen, yo wè tè. Se te zile Malt. Bato a t al frape yon pil sab nan lanmè a e l te kraze fè plizyè moso. Men, tout 276 moun ki te nan bato a te rive atè san anyen pa t rive yo. Gen kèk nan yo ki te naje pou yo rive atè e gen lòt ki te rive sou moso bato ki te kraze a. Moun Malt yo te pran swen yo e yo te fè yon dife pou chofe yo.

Twa mwa annapre, sòlda yo te mennen Pòl nan vil Wòm nan yon lòt bato. Lè l rive, frè yo te vin rankontre l. Kou Pòl wè yo, li di Jewova mèsi e li pran kouraj. Byenke Pòl te yon prizonye, yo te kite l viv nan yon kay yo te lwe ak yon sòlda pou veye l. Li te rete la pandan dezan. Gen moun ki te konn vin wè l, li te konn preche yo sou Wayòm Bondye a e li te anseye yo sou Jezi. Epitou, Pòl te konn ekri lèt pou kongregasyon ki nan Azi Minè ak nan Jide yo. Vrèmanvre, Jewova te sèvi ak Pòl pou l gaye bon nouvèl la nan nasyon yo.