Hia nuhe jọ do Karina go bo yí nukun homẹ tọn do pọ́n dọ gowe wẹ e to jijọ do. Eyin hiẹ wẹ, etẹwẹ a na wà?

 Karina: “N’to mọto kùn po wezun po zẹjlẹgo jei wehọmẹ bọ ponọ de do mi te bo na mi tike akuẹgbònamẹ tọn. Adi do mi taun! N’dọna Mama bọ ewọ dọna mi dọ n’dona dọna Papa, amọ́ e ma jlo mi nado wàmọ.”

  Etẹwẹ a na wà?

1.  Nudide A: Nabọẹ po linlẹn lọ po dọ Papa ma na wá sè gbede.

2.  Nudide B: Dọ nuhe jọ lọ pẹpẹ na Papa.

 A sọgan yin whiwhlepọn nado de Nudide A. Vlavo onọ̀ towe sọgan ko lẹndọ a ko yì dọna otọ́ towe. Amọ́, whẹwhinwhẹ́n dagbe lẹ tin nado yigbe nuṣiwa towe lẹ tọn—vlavo e yin osẹ́n aliji tọn de wẹ a gbà kavi nudevo depope wẹ jọ.

1.  1. Na nuhe sọgbe nado wà lọ niyẹn. To whenue Biblu to hodọdo nujinọtedo Klistiani lẹ tọn ji, e dọmọ: “Mí jlo nado nọ yinuwa po ahundopo po to nulẹpo mẹ.”​—Heblu lẹ 13:18.

    “N’ko dovivẹnu sinsinyẹn nado nọ dọ nugbo bo kẹalọyi awugbopo ṣie lẹ bosọ yigbena nuṣiwa ṣie lẹ tlolo he yé jọ.”​—Alexis.

2.  2. Na gbẹtọ lẹ nọ saba jona mẹhe yigbena nuṣiwa yetọn lẹ. Biblu dọmọ: “Mẹhe to nuṣinyọndo nuṣiwa etọn lẹ ma na tindo kọdetọn dagbe, ṣigba, mẹdepope he nọ yigbe yetọn bo nọ jo yé do wẹ lẹblanu na yin didohia.”​—Howhinwhẹn lẹ 28:13.

    “E nọ biọ adọgbigbo nado yigbena nuṣiwa de, ṣigba enẹ nọ zọ́n bọ mẹdevo lẹ nọ dejido mẹgo. Yé na mọdọ a nọ dọ nugbo. Eyin a yigbena nuṣiwa towe, a na diọ nuylankan de zun nudagbe”​—Richard.

3.  3. Hú popolẹpo, e nọ hẹn homẹhun Jehovah Jiwheyẹwhe. Biblu dọmọ: “Jehovah gbẹwanna mẹhe nọ yinuwa po oklọ po, ṣigba, nugbonọ lẹ wẹ nọ jihọntọn pẹkipẹki hẹ Ẹ.”​—Howhinwhẹn lẹ 3:32.

    “Eyin n’ko ṣì nude wà, n’nọ jẹ mimọ ji dọ n’dona yigbe nuṣiwa ṣie tọn. Jehovah ma sọgan dona mi gbede, eyin n’ma to nulẹ wà sọgbe hẹ ojlo etọn.”​—Rachel.

 Enẹwutu, etẹwẹ Karina wà gando nuṣiwa etọn go? E tẹnpọn nado whlá tike akuẹ he yè gbò na ẹn tọn lọ do baba etọn. Amọ́ e ma sọgan whlá ẹ kakadoi. Karina dọmọ: “Nudi owhe dopo godo, baba ṣie to kandai owù-nujijọ mítọn lẹ tọn gbeje pọ́n bo doayi tike akuẹgbònamẹ tọn he yinkọ ṣie to e ji lọ go. N’biọ nuhahun sinsinyẹn mẹ—adi sọ do onọ̀ ṣie badabada dọ n’ma yinuwa sọgbe hẹ nuhe e dọna mi!”

 Nuhe ehe plọn mí: Karina dọmọ: “Nuṣiwa lẹ whiwhla ma nọ jla nude do. E nọ wá gbà janwẹ!”

 Mẹlẹpo wẹ nọ ṣinuwa. (Lomunu lẹ 3:23; 1 Johanu 1:8) Dile mí ko mọ do, e nọ biọ dọ mẹde ni whiwhẹ ede bo whèwhín nado yigbe nuṣiwa etọn lẹ tọn—podọ nado wàmọ to afọdopolọji.

 Onú devo wẹ nado nọ plọnnu sọn nuṣiwa mítọn lẹ mẹ. E blawu dọ jọja delẹ ma nọ yí dotẹnmẹ hundote enẹ zan ganji! Yé sọgan tindo numọtolanmẹ he jọja de he nọ yin Priscilla tindo to ojlẹ de mẹ. E dọmọ: “Nuṣiwa ṣie lẹ nọ saba hẹn mi gbọjọ taun. N’nọ gblewhẹdo dee zẹjlẹgo bọ nuṣiwa ṣie lẹ nọ taidi agbàn pinpẹn tlala de he nọ húagbọ́ mi. E nọ hẹn mi gbọjọ sọmọ bọ n’nọ mọ dee taidi nuvọ́nọ he ma tindo todido.”

 Be a nọ tindo numọtolanmẹ mọnkọ to whedelẹnu ya? Eyin mọ wẹ, flindọ: Ayiha zizedo nuṣiwa hoho lẹ ji nọ taidi mẹpọ́nnu he nọ pọ́n godo de pinpọn mapote to whenue a to mọto kùn. Ayiha zizedo nuṣiwa hoho lẹ ji na nọ hẹn we gbọjọ sọmọ bọ a ma na tindo huhlọn nado pehẹ avùnnukundiọsọmẹnu he to nukọn ja lẹ.

 Kakatimọ, naegbọn a ma na nọ tindo pọndohlan jlẹkaji tọn?

 “Nọ pọ́n nuṣiwa towe he wayi lẹ hlan to aliho de mẹ nado nọ plọnnu sọn yé mẹ. Ṣigba, ma nọ ze ayidonugo do yé ji sọmọ bọ yé nado hẹn we gbọjọ blo.”​—Elliot.

 “N’nọ tẹnpọn nado plọnnu sọn nuṣiwa dopodopo mẹ, bo nọ dike e ni gọalọna mi nado lẹzun mẹhe whèwhín dogọ nado didẹ ninọmẹ mọnkọtọn to aliho devo mẹ to whedevonu. Pọndohlan he e jẹ dọ mí ni tindo niyẹn, na e nọ gọalọnamẹ nado whèwhín dogọ.”​—Vera.