KANBIỌ HE JỌJA LẸ NỌ KANSE
Nawẹ N’Gán Plọn Ayihadawhẹnamẹnu Ṣie Gbọn?
Etẹ to onú ehelẹ mẹ go wẹ a sọgan yí ayihadawhẹnamẹnu towe jlẹdo?
alidohiamẹnu de
mẹpọ́nnu de
họntọn de
whẹdatọ de
Gblọndo ẹnẹ lẹpo wẹ sọgbe. Hosọ ehe na dọhodo nuhewutu e do yinmọ ji.
Etẹwẹ ayihadawhẹnamẹnu yin?
Ayihadawhẹnamẹnu towe yin nugopipe homẹ tọn towe nado yọ́n dagbe dovo na oylan. Biblu dọ dọ e taidi ‘osẹ́n de he yè wlan do ayiha mẹ.’ (Lomunu lẹ 2:15, Biblu Wiwe lọ—Gun Alada) Ayihadawhẹnamẹnu dagbe de na gọalọna we nado gbeje nuhe a jlo na wà kavi nuhe a ko wà de pọ́n.
Ayihadawhẹnamẹnu towe taidi alidohiamẹnu de. E nọ deanana we gbọn aliho dagbe ji, na a nido sọgan dapana nuhahun.
Ayihadawhẹnamẹnu towe taidi mẹpọ́nnu de. E nọ do walọyizan towe hia, yèdọ mẹhe a yin to homẹ.
Ayihadawhẹnamẹnu towe taidi họntọn dagbe de. E gán na we ayinamẹ dagbe bo gọalọna we nado tindo kọdetọn dagbe—eyin a nọ dotoaina ẹn.
Ayihadawhẹnamẹnu towe taidi whẹdatọ de. E nọ gblewhẹdo we whenue a wà nue ma sọgbe de.
Ayihadawhẹnamẹnu dagbe de gán gọalọna we nado nọ basi nudide nuyọnẹn tọn lẹ
Nuagokun lọ die: Ayihadawhẹnamẹnu towe yin azọ́nwanu titengbe de he gán gọalọna we (1) nado nọ basi nudide nuyọnẹn tọn lẹ, podọ (2) nado nọ mọdọ nue a ṣiwà vẹna we bọ a na basi vọjlado.
Naegbọn a dona plọn ayihadawhẹnamẹnu towe?
Biblu dọ dọ mí ni “hẹn ayihadawhẹnamẹnu dagbe de go.” (1 Pita 3:16) Ehe wiwà nọ vẹawu, eyin a ma ko plọn ayihadawhẹnamẹnu towe.
“N’nọ dolalo na mẹjitọ ṣie lẹ gando fie n’nọ yì lẹ go bo nọ hẹn ehe di aṣli. To bẹjẹeji, ayihadawhẹnamẹnu ṣie nọ dowhẹ mi, amọ́ dile ojlẹ to yìyì, nue wà n’te masọ nọ di nude na mi sọmọ ba.”—Jennifer.
To godo mẹ, ayihadawhẹnamẹnu Jennifer tọn sisẹ́ ẹ nado dọ nue to jijọ na mẹjitọ etọn lẹ bọ e masọ nọ dolalo na yé ba.
Lẹnnupọndo ehe ji: Whetẹnu wẹ ayihadawhẹnamẹnu Jennifer tọn sọgan ko na ẹn avase jẹnukọn?
“Gbẹzan awe zinzan ma nọ bọawu bosọ nọ hẹn apọṣimẹ. Eyin a ko gbẹ́ dike bọ ayihadawhẹnamẹnu towe sisẹ́ we nado basi nudide he ma sọgbe dopo, e nọ bọawu nado basi nudide ylankan devo.”—Matthew.
Mẹdelẹ nọ dovọ́na ayihadawhẹnamẹnu yetọn pete. Biblu dọ dọ omẹ enẹlẹ “jẹgló.” (Efesunu lẹ 4:19) Biblu lọ Alẹnu Yọyọ Do Gungbe Mẹ lilẹ́ hogbe enẹ dole: “Winyan ma nọ hù yé depope.”
Lẹnnupọndo ehe ji: Be mẹhe ma nọ tindo numọtolanmẹ whẹhuhu tọn gando nuylankan he yé nọ wà lẹ go lẹ ka nọ vò nugbo ya? Nuhahun tẹlẹ wẹ yé ma gán dapana pọ́n gbede?
Nuagokun lọ die: Nado hẹn ayihadawhẹnamẹnu dagbe de go, a dona “plọn huhlọn wuntuntun tọn [towe] nado nọ yọ́n vogbingbọn to dagbe po oylan po ṣẹnṣẹn.”—Heblu lẹ 5:14.
Nawẹ a gán plọn ayihadawhẹnamẹnu towe gbọn?
Nado plọn ayihadawhẹnamẹnu towe, a dona tindo nujinọtedo de he go a na nọ yí walọyizan towe lẹ jlẹdo. Mẹdelẹ nọ hodo nujinọtedo he yin zizedai gbọn mẹhe kavi nuhe bọdego ehelẹ dali lẹ:
whẹndo po aṣa po
hagbẹ lẹ
aihundatọ he diyin lẹ
Amọ́, nujinọtedo he gando gbẹninọ go bo to Biblu mẹ lẹ yiaga taun hugan devo depope. Enẹ ma paṣamẹ, to whenuena e yindọ Biblu yin “gbigbọdo sọn Jiwheyẹwhe dè,” yèdọ Mẹlọ he dá mí bo yọ́n nuhe na wà dagbe na mí hugan.—2 Timoti 3:16.
Pọ́n apajlẹ delẹ.
NUJINỌTEDO: “Mí jlo nado nọ yinuwa po ahundopo po to nulẹpo mẹ.”—Heblu lẹ 13:18.
Nawẹ nujinọtedo enẹ gán yinuwado ayihadawhẹnamẹnu towe ji to whenue a yin whiwhlepọn nado finwepọ́n to tẹnpọn de whenu, dolalo na mẹjitọ towe lẹ kavi jẹajo gbọn?
Eyin ayihadawhẹnamẹnu towe nọ sisẹ́ we nado yin nugbonọ to nulẹpo mẹ, dagbe tẹwẹ a lẹndọ enẹ na wà na we todin, podọ to sọgodo?
NUJINỌTEDO: “Mì họ̀nna fẹnnuwiwa zanhẹmẹ tọn.”—1 Kọlintinu lẹ 6:18.
Nawẹ nujinọtedo enẹ gán yinuwado ayihadawhẹnamẹnu towe ji to whenue a yin whiwhlepọn nado pọ́n yẹdide fẹnnuwiwa tọn kavi tindo kọndopọ zanhẹmẹ tọn jẹnukọnna alọwle gbọn?
Eyin ayihadawhẹnamẹnu towe nọ sisẹ́ we nado họ̀nna fẹnnuwiwa zanhẹmẹ tọn, dagbe tẹwẹ enẹ na wà na we todin, podọ to sọgodo?
NUJINỌTEDO: “Mì lẹzun homẹdagbenọ hlan ode awetọ bo gọ́ na awuvẹmẹ sisosiso bosọ nọ jona ode awetọ sọn ojlo mẹ wá.”—Efesunu lẹ 4:32.
Nawẹ nujinọtedo enẹ gán yinuwado ji we to whenue wiwọ́ fọ́n to hiẹ po nọvi towe de kavi họntọn de po ṣẹnṣẹn gbọn?
Eyin ayihadawhẹnamẹnu towe nọ sisẹ́ we nado do lẹblanu po awuvẹmẹ po hia, dagbe tẹwẹ enẹ na wà na we todin, podọ to sọgodo?
NUJINỌTEDO: “Jehovah . . . gbẹwanna mẹdepope he yiwanna danuwiwa.”—Salmu lẹ 11:5.
Nawẹ nujinọtedo enẹ dona yinuwado ojlo towe nado nọ pọ́n sinima, tito televiziọn ji tọn lẹ po aihundida video ji tọn lẹ po ji gbọn?
Eyin ayihadawhẹnamẹnu towe nọ sisẹ́ we nado dapana aihundida danuwiwa tọn lẹ, dagbe tẹwẹ enẹ na wà na we todin, podọ to sọgodo?
NUMIMỌ JỌNUN: “N’do họntọn delẹ he nọ daihun video ji tọn he bẹ danuwiwa hẹn lẹ podọ yẹnlọsu nọ wàmọ ga. Baba ṣie wá gbẹna mi dọ n’masọ dona nọ daihun enẹlẹ ba. Enẹwutu, n’nọ daihun enẹlẹ to whenue n’disa yì họntọn ṣie lẹ dè. Whenue n’lẹkọwa whégbè, n’nọ dómẹvọ dee taidi dọ n’ma wà nude nkọ. Eyin baba ṣie kanse mi dọ etẹwẹ jọ, n’nọ dọ poun dọ nude ma jọ. Amọ́ to gbèdopo, n’hia Salmu lẹ 11:5 bo wá jẹ mimọ ji dọ nue wà n’te ma yọ́n. N’wá mọdọ n’dona doalọtena aihun video ji tọn enẹlẹ didà. Nue n’sọ wà lọ niyẹn. To whenue dopo to họntọn ṣie lẹ mẹ mọ nuhe n’wà, ewọ lọsu doalọtena aihun danuwiwa tọn enẹlẹ didà.”—Jeremy.
Lẹnnupọndo ehe ji: Whetẹnu wẹ ayihadawhẹnamẹnu Jeremy tọn jẹ azọ́nwa ji, podọ whetẹnu wẹ e wá jẹ todoaina ẹn ji? Etẹwẹ a plọn sọn numimọ Jeremy tọn mẹ?
Nuagokun lọ die: Ayihadawhẹnamẹnu towe nọ do mẹhe nkọ a yin po nuhe nọ yin nujọnu na we po hia. Etẹwẹ ayihadawhẹnamẹnu hiẹ tọn nọ dọ gando go we?
A Gán Sọ Pọ́n Hosọ Ehelẹ
KANBIỌ HE JỌJA LẸ NỌ KANSE
Naegbọn N’Dona Nọ Dọ Nugbo?
Be e ma yin mẹhe nọ dolalo lẹ wẹ nọ mọaleyi hugan ya?
KANBIỌ HE JỌJA LẸ NỌ KANSE
Nawẹ N’Sọgan Yinuwa Gando Nuṣiwa Ṣie lẹ Go Gbọn?
Mẹlẹpo wẹ nọ ṣinuwa, amọ́ e ma yin mẹlẹpo wẹ nọ plọnnu sọn yé mẹ.
NUHE OGBẸ́ TOWE LẸ NỌ DỌ
Jọja lẹ Dọho Gando Biblu Hihia Go
Wehihia ma nọ bọawu to whelẹponu, amọ́ e jẹ dọ yè ni hia Biblu. Jọja ẹnẹ delẹ dọ lehe yé nọ mọaleyi sọn Biblu hihia mẹ do.
KANBIỌ HE JỌJA LẸ NỌ KANSE
Nawẹ Biblu Sọgan Gọalọna Mi Gbọn?—Adà 1: Jẹakọ hẹ Biblu Towe
Eyin a yì tọ́n jẹ adọkun potin hohowhenu tọn daho blibata de ji, be a ma na jlo na yọ́n nuhe to e mẹ lẹ ya? Adọkun potin mọnkọ pẹẹ wẹ Biblu yin. E bẹ nuyọnẹn họakuẹ susu hẹn.
