Owo Emi Ekpekpebede​—Eyenan̄wan Shulam

Eyenan̄wan Shulam ọfiọk ke ikpanaha iyak ima abiat imọ ibuot. Enye ọdọhọ mme ufan esie ete: “Mmowụk mbufo nte ẹkûdomo ndidemede ima ke esịt mi tutu enye edemede ikpọn̄.” Eyenan̄wan Shulam ọfiọk ke ekikere ima ekeme ndisọp n̄kịm owo enyịn. Ke uwụtn̄kpọ, enye ọfiọk ke mbon en̄wen ẹkeme ndinyịk imọ ima owo oro mîdifọnke ye imọ. Esịt esie akam ekeme ndinam enye anam idiọk ubiere. Ntre, eyenan̄wan Shulam etie nte “ibibene.”​—Ikwọ Solomon 8:4, 10.

Ukem nte eyenan̄wan Shulam, ndi emesise ima ke enyịn akwa owo? Ndi emesida eti ibuot ebiere se akpanamde utu ke ndinam n̄kpọ ntiene nte etiede fi ke idem? (Mme N̄ke 2:​10, 11) Ndusụk ini, mbon en̄wen ẹkeme ndidomo ndinyịk fi ọtọn̄ọ ndinam ufan ye owo isio uduot ke ini mûben̄eke idem kan̄a. Akam ekeme ndidi afo anam n̄kpọ emi ọdọn̄ fi. Ke uwụtn̄kpọ, ke ini okụtde nte akparawa ye n̄kaiferi ẹmụmde ubọk ẹsan̄a, ndi esinen̄ede ọdọn̄ fi ndimụm owo ubọk n̄ko nsan̄a ntre? Ndi eyenyịme ndinam ufan ye owo oro mîkaha ido ukpono mbufo? Eyenan̄wan Shulam akanam n̄kpọ nte akwa owo ke n̄kpọ emi aban̄ade ima erenowo ye n̄wan. Afo n̄ko emekeme ndinam n̄kpọ nte akwa owo!