Mbiausọbọ ẹdọhọ ke enyene n̄kpọ emi esinamde owo enen̄ede okop inemesịt, idịghe ndinyene enyọn̄ ye isọn̄. Ntem mme owo ẹsiyom n̄kpọ ẹnam m̀mê ẹyekop inemesịt. Ndusụk owo ẹtuak ibuot ẹnọ owo, mîdịghe ẹkpono n̄kpọ, ke ini mbon eken ẹsịnde idem ẹkpep nsio nsio n̄kpọ nte ikwọ ye unek man ẹkop inemesịt. Edi kpukpru emi isinọhọ owo inemesịt ibịghi.

Mbon emi ẹsikotde Bible ẹnen̄ede ẹdiọn̄ọ ntak emi esidọn̄de mme owo ndisan̄a n̄kpere Abasi. N̄wed Genesis ọdọhọ ete ke Abasi ama okobot Adam ye Eve, enye ama esineme nneme ye mmọ ke ubọk ke ubọk, ayak mmọ ẹsan̄a ẹkpere imọ. (Genesis 3:8-10) Abasi emi okobotde owo ikoyomke enye ada ke idem, edi okoyom enye esinyene nneme ye imọ. Bible etịn̄ aban̄a emi ediwak ini.

Ke uwụtn̄kpọ, Jesus ọkọdọhọ ete: “Mmọ oro ẹkerede ẹban̄a unana mmọ ke n̄kan̄ eke spirit ẹkop inemesịt.” (Matthew 5:3) Se Jesus eketịn̄de mi owụt ke n̄kpọ Abasi esinen̄ede ọnọ owo inemesịt. Enye ama onyụn̄ ọdọhọ ke “idịghe uyo ikpọn̄ ke owo edida odu uwem, edi edida kpukpru ikọ eke ẹwọrọde Jehovah ke inua odu.” (Matthew 4:4) Didie ke Ikọ Abasi ekeme ndinọ nnyịn inemesịt nnyụn̄ nnam uwem nnyịn ọwọrọ n̄kpọ? Ẹyak ineme usụn̄ ita.

Mfịn, ata ediwak ntaifiọk ẹsinọ mme owo item ke nte ẹkpedude uwem ye ekemmọ owo, nte ẹkpekọkde mfịna, ẹtịn̄ se owo akpanamde man okop inemesịt, uwem esie onyụn̄ ọwọrọ n̄kpọ. Edi afo ekere ke anie enen̄ede odot ndinọ owo utọ item emi? Ndi idịghe Jehovah Abasi emi okobotde nnyịn?

 Ke uwụtn̄kpọ, edieke afo edepde obufa fon, n̄kpọ usio ndise, TV, m̀mê n̄kpọ ntre, ẹyesịn n̄wed emi ediwụtde nte akpakamade se edepde ẹnọ fi. Bible onyụn̄ etie nte n̄wed emi. Abasi emi okobotde nnyịn ọnọ nnyịn Bible man ifiọk nte ikpodude uwem.

Bible etịn̄ se nnyịn ikpanamde ye se nnyịn mîkpanamke. Item emi mme owo ẹnọde ekeme nditie nte ọfọn mîdịghe emem utom akan eke Bible, edi item owo ikemeke-keme ndifọn nte item Abasi.

Kpa ye oro Jehovah Abasi owụtde nnyịn nte ikpodude uwem, enye inyịkke-nyịk nnyịn ndinam se imọ idọhọde. Utu ke oro, enye akam ọdọhọ nnyịn ete: “Ami Jehovah, ndi Abasi fo, Enye emi ekpepde fi man afo ọbọ ufọn, Enye emi anamde fi asan̄a ke usụn̄ emi afo akpasan̄ade. Afo akpakam akpan̄ utọn̄ ke mme ewụhọ mi! Do emem fo ekpetie nte akpa mmọn̄, edinen ido fo okponyụn̄ etie nte mbufụt inyan̄.” (Isaiah 48:17, 18) Emi owụt ke item Abasi anam owo okop inemesịt. Omokụt do ke imoyom Abasi edieke anade ikop inemesịt.

Nte ufen okponde ke ererimbot anam ndusụk owo ẹkere m̀mê nso idi ufọn Abasi. Ke uwụtn̄kpọ, in̄wan̄ake ediwak owo ntak emi nti owo ẹsibọde ufen, ntak emi ndusụk nditọwọn̄ ẹsimanade ye ndo, ye se inamde uwem etie ufen ufen ntem. N̄kpọ emi enen̄ede afịna ediwak owo, ndien ndifiọk ntak emi n̄kpọ etiede ntem ekeme ndinam esịt ana owo sụn̄. Edi utu ke ndisọsọp ndọhọ ke Abasi edi ntak, ẹyak ise se Bible etịn̄de.

Genesis ibuot 3 etịn̄ nte Satan akadade urụkikọt anam Adam ye Eve ẹdia mfri eto emi Abasi akakpande. Satan ọkọdọhọ Eve ete: “Mbufo idikpaha n̄kpa. Koro Abasi ọmọfiọk ete ke usen eke mbufo ẹdidiade, enyịn mbufo ẹyetara, mbufo ẹyenyụn̄ ẹtie nte Abasi, ẹfiọk eti ye idiọk.”—Genesis 2:16, 17; 3:4, 5.

Ikọ Satan emi ọkọwọrọ ke Abasi okosu nsu, ye nte ke enye ikarake ọfọn. Devil ọkọdọhọ ke n̄kpọ ọyọfọn ye Adam ye Eve edieke mmọ ẹkopde uyo imọ. Utọ ikọ oro ikedịghe n̄kpọ emi ẹdade usen kiet ẹbiere. Ntre, Jehovah ayak ediwak isua ẹbe man kpukpru owo ẹkụt m̀mê se Satan eketịn̄de edi akpanikọ. Abasi ọnọ Satan ye kpukpru mbon emi ẹkedade ye enye ifet ndiwụt m̀mê n̄kpọ ekeme ndifọn ye owo edieke mmọ mîyomke Abasi.

Ndi ekere ke Satan eketịn̄ akpanikọ? Ndi n̄kpọ ekeme ndifọn owo edieke enye mîyomke Abasi? Kpukpru ufen, ufịk, udọn̄ọ, n̄kpa, idiọkn̄kpọ, ekọn̄, uwotowo, ye kpukpru afanikọn̄ ererimbot emi ẹwụt ke owo ikemeke ndinam n̄kpọ ndomokiet ke ẹsiode Abasi  ẹfep. Owo edi ntak ofụri afanikọn̄ emi isobode mi, idịghe Abasi. Bible ama etetịn̄ ke ‘owo ayakara owo tutu ọnọ enye unan.’—Ecclesiastes 8:9.

Ndi emi iwụtke ke Abasi kpọt ekeme ndikọk kpukpru mfịna nnyịn? Nso ke Abasi edinam?

Mme owo ẹyom nte ẹkpedude uwem, idọn̄ọke, isọn̄ke, inyụn̄ ikpaha. Mmọ ẹbiat ata ediwak okụk ye ini ẹyom utọ uwem emi, edi ikwe. Ndusụk ẹsimen ibọk emi ẹkerede ke ayanam mmimọ idu uwem ke nsinsi, edi kpukpru emi ọwọrọ ikpîkpu.

Abasi oyom mme owo ẹkop inemesịt. Se enye okoyomde edi oro tọn̄ọ usen emi enye okobotde owo, enye inyụn̄ ikpụhọke ekikere. (Genesis 1:27, 28; Isaiah 45:18) Jehovah Abasi on̄wọn̄ọ ke Bible ete ke iyanam se ededi emi imọ itịn̄de. (Isaiah 55:10, 11) Bible ọdọhọ ke Abasi ayanam isọn̄ emi afiak eketie nte Paradise oro ẹkebịnde Adam ye Eve ẹsio. Ediyarade 21:4 ọdọhọ ke Jehovah Abasi “ọyọkwọhọde kpukpru mmọn̄eyet ke enyịn [mme owo] efep, n̄kpa idinyụn̄ idụhe aba, mfụhọ m̀mê ntuan̄a m̀mê ubiak idinyụn̄ idụhe aba. N̄kani n̄kpọ ẹma ẹbe ẹfep.” Didie ke Abasi edinam emi, ndien nso ke ikpanam man itiene idu ke Paradise emi?

Jesus Christ Eyen Abasi ama ekpep mme anditiene enye ete ẹbọn̄ akam ẹte ẹnam uduak Abasi. Mme owo ẹsiwak ndibọn̄ akam emi, ndusụk mmọ ẹkot enye Akam Ọbọn̄. Ẹsibọn̄ enye ntem: “Ete nnyịn emi odude ke heaven, yak ẹnam enyịn̄ fo asana. Yak obio ubọn̄ fo edi. Yak uduak fo ada itie, nte edide ke heaven, yak edi ke isọn̄ kpasụk ntre.” (Matthew 6:9, 10) Obio Ubọn̄ emi ke Jehovah Abasi edida isio kpukpru ufen emi ibọde mi ke ntak ukara owo onyụn̄ ada obufa ererimbot emi enye ọkọn̄wọn̄ọde edi. * (Daniel 2:44; 2 Peter 3:13) Nso ke ikpanam man itiene idu ke obufa ererimbot emi?

Jesus Christ ama etịn̄ se ikpanamde ete: “Nsinsi uwem ọwọrọ mmọ ndikọ ifiọk emi aban̄ade fi, ata Abasi kierakiet, ye enye emi afo okosiode ọdọn̄, kpa Jesus Christ.” (John 17:3) Omokụt do ke Abasi ekeme ndinam fi odu uwem ke nsinsi ke obufa ererimbot emi enye ọn̄wọn̄ọde. Emi ekeme ndinam okụt ntak en̄wen emi anade iyom Abasi.

Paul ọkọdọhọ mbon Athens n̄kpọ nte isua tọsịn iba emi ẹkebede ete: “[Abasi] ọnọ kpukpru owo uwem ye ibifịk ye kpukpru n̄kpọ.  Koro ebe ke enye ke nnyịn inyene uwem inyụn̄ isan̄a inyụn̄ idu uwem, kpa nte ndusụk mme ewet uto ke otu mbufo ẹdọhọde ẹte, ‘Koro nnyịn n̄ko idi nditọ esie.’”—Utom 17:25, 28.

Se Paul eketịn̄de ọnọ mbon Athens edi akpanikọ. Abasi ọnọ nnyịn ofụm emi in̄wekde, udia emi idiade, ye mmọn̄ emi in̄wọn̄de. Jehovah mîkpọnọhọ nnyịn mme n̄kpọ emi, nnyịn ikpodụhe uwem. Edi ntak emi Abasi ọnọde kpukpru owo mme n̄kpọ emi edide mmọ ẹyom enye m̀mê iyomke? Paul ọdọhọ ke Abasi anam emi “man mmọ ẹyom Abasi, ẹfiọn̄ọ ubọk ẹyom ẹnyụn̄ ẹkụt enye, okposụkedi enye ke akpanikọ mîyomke usụn̄ ikpọn̄ nnyịn owo kiet kiet.”—Utom 17:27.

Ndi akpama ndinen̄ede mfiọk Abasi, mfiọk se enye aduakde, ye nte enye oyomde fi odu uwem idahaemi man ekeme ndidu ke nsinsi? Ke edide ntre, mbọk nyene nneme ye owo emi ọkọnọde fi magazine emi mîdịghe wet m̀mê kot mme andisio magazine emi. Mmọ ẹyekop inemesịt ndin̄wam fi.