Zeova i “sa Enn Ki anmenn delivrans” pour nou

“Zeova pou ed zot e delivre zot.”—PS. 37:40.

1, 2. Ki sa laverite fondamantal lo Zeova ki en sours rekonfor ek lafors pour nou?

LONBRAZ ki larder soley i fer pa reste en sel pozisyon. Anmezir later i bouze, sa lonbraz i toultan bouze e sanze. Parkont, Kreater soley ek later pa zanmen sanze. (Mal. 3:6) Labib i dir ki avek li “napa menm lonbraz en sanzman.” (Zak 1:17) Sirtou kan nou rankontre bann defi ek leprev difisil, sa laverite fondamantal lo Zeova i vreman en sours rekonfor e i donn nou lafors. Akoz?

² Parey nou ti vwar dan lartik avan, Zeova ti prouve ki i “sa Enn ki [ti] anmenn delivrans” dan letan lontan. (Ps. 70:5) Denozour, son bann adorater i annan tou rezon pour annan konfyans dan li konman sa enn ki “pou ed zot e delivre zot” akoz i pa zanmen sanze e i touzour fer sa ki i dir i pou fer. (Ps. 37:40) Ki mannyer Zeova in delivre son bann serviter dan nou letan? Ki mannyer i kapab delivre nou personnelman?

Delivre kont bann ki opoz nou

3. Akoz nou kapab asire ki bann opozan pa pou kapab anpes bann serviter Bondye pres sa bon nouvel?

³ Nenport ki form lopozisyon ki Satan i servi avek bi pour anpes pep Zeova donn Bondye sa ladorasyon ki i merite, pa pou zanmen reisi. Parol Bondye i asir nou: “Nenport ki zarm ki pou ganny formen kont ou pa pou  reisi, e nenport ki lalang ki pou lev kont ou dan zizman ou pou kondannen.” (Iza. 54:17) Bann opozan in eseye fer pep Bondye aret prese, me zot pa’n reisi. Egzamin de legzanp.

4, 5. Ki lopozisyon pep Zeova ti fer fas avek an 1918 e avek ki rezilta?

⁴ An 1918, pep Zeova ti fer fas avek en gran kantite persekisyon, kot zeneralman bann sef relizye ki ti responsab pour sa, akoz zot ti anvi aret sa travay predikasyon. Le 7 Me sa menm lannen, lapolis ti siny plizyer warant pour larestasyon J. Rutherford, ki sa moman ti pe sirvey sa travay predikasyon dan lemonn antye, ensi ki lezot frer ki ti kot biro prensipal Temwen Zeova. Dan mwens ki de mwan, Frer Rutherford ek son bann asosye ti ganny akize inosaman konmkwa zot ti pe fer konplo e zot ti ganny en santans prizon pour en bon pe letan. Eski sa bann opozan ti’n reisi servi lakour pour aret net sa travay predikasyon? Byensir non!

⁵ Mazinen, Zeova ti promet: “Nenport ki zarm ki pou ganny formen kont ou pa pou reisi.” En sel kou tou keksoz ti sanze. Le 26 Mars 1919, nef mwan apre ki Frer Rutherford ek son bann asosye ti’n ganny kondannen, zot ti ganny large lo kosyon. Son lannen apre, le 5 Me 1920, bann sarz kont zot ti ganny retire. Bann frer ti profit zot liberte pour kontinyen fer sa travay predikasyon. Avek ki rezilta? Depi sa letan in annan en gran ogmantasyon! E tou loner pour bon rezilta sa travay i al pour “sa Enn ki anmenn delivrans.”—1 Kor. 3:7.

6, 7. (a) Ki kanpanny ki ti ganny fer kont bann Temwen Zeova Lalmanny dan letan Nazi e avek ki rezilta? (b) Ki listwar lo pep Zeova dan nou letan i prouve?

⁶ Aprezan egzamin en dezyenm legzanp. An 1934, Hitler ti pret serman ki i ti pou ekstermin tou Temwen Zeova Lalmanny. Sa pa ti zis en promes dan vid akoz apre sa lanons, bokou dimoun ti ganny arete e ganny met dan prizon. Plizyer milye Temwen ti ganny viktimize e plizyer santenn ti ganny touye dan bann kan konsantrasyon. Eski Hitler ti’n reisi dan son kanpanny pour elimin sa bann Temwen? Eski i ti reisi aret predikasyon sa bon nouvel Lalmanny? Non! Pandan persekisyon nou bann frer ek ser ti kontinyen fer sa travay an kasyet. Apre ki sistenm Nazi ti nepli egziste, sa bann frer ek ser ti servi zot liberte pour kontinyen prese. Ozordi i annan plis ki 165,000 proklanmater Rwayonm Lalmanny. Ankor enn fwa, “sa Enn ki anmenn delivrans” in fer egzakteman sa ki i ti promet i pou fer: “Nenport ki zarm ki pou ganny formen kont ou pa pou reisi.”

⁷ Listwar lo Temwen Zeova dan nou letan i prouve ki Zeova pa pou zanmen permet ki son pep i ganny eliminen konman en group.  (Ps. 116:15) Alor, eski Zeova pou protez nou endividyelman? Ki mannyer i anmenn delivrans pour nou personnelman?

Proteksyon personnel

8, 9. (a) Ki mannyer nou konnen ki Zeova pa garanti nou proteksyon fizik? (b) Ki nou devret rekonnet?

⁸ Nou konnen ki Zeova pa’n promet ki i pou azir vitman pour toultan protez nou personnelman la konmela. Nou pran menm pozisyon avek sa trwa Ebre ki ti fidel e ki ti refize salye stati annor Lerwa Neboukadnetsar. Sa trwa zenn onm ki ti annan lakrent pour Bondye pa ti prezimen ki Zeova ti pou fer mirak pour protez zot. (Lir Danyel 3:17, 18.) Me parey sa resi i montre, Zeova ti delivre zot pour zot pa ganny brile avek laflanm dan sa four dife. (Dan. 3:21-27) Menm dan letan lontan i ti rar pour ganny delivre par mirak. Bokou serviter fidel Zeova ti mor dan lanmen bann ki ti opoz zot.—Ebr. 11:35-37.

⁹ Me ozordi? Konman “sa Enn ki anmenn delivrans,” sirman Zeova i kapab delivre bann endividi dan bann sityasyon danzere. Eski nou vreman kapab dir si Zeova in azir ouswa non dan bann sityasyon spesifik? Non. Kantmenm sa, en endividi ki’n reisi sirmont en sityasyon danzere i kapab santi ki Zeova in entervenir. I ti pou mal pour lezot pa dakor avek son santiman. Me an menm tan nou devret rekonnet ki zis parey dan letan Nazi, bokou Kretyen fidel in mor akoz persekisyon. Lezot in mor dan lezot sirkonstans. (Ekle. 9:11) Nou kapab demande, ‘Eski Zeova pa ti reisi vin “sa Enn ki anmenn delivrans” pour sa bann serviter fidel ki’n mor san ekspekte?’ Sa pa ditou leka.

10, 11. Akoz en dimoun pa kapab anpes li mor, me ki Zeova i kapab fer konsernan lanmor?

¹⁰ Reflesir lo sa: En dimoun pa kapab anpes son lekor mor akoz napa okenn imen ki kapab “delivre son lekor dan lanmen Seol,” oubyen Lades setadir latonm bann imen an zeneral. (Ps. 89:48) Me Zeova alors? En ser ki ti sirviv sa moman efreyan dan letan Nazi i rapel sa ki son manman, ki en Temwen, ti dir li en fwa pour rekonfort li apre ki bann ki i kontan ti mor dan kan konsantrasyon: “Si lanmor ti dir pour touzour i ti pou pli for ki Zeova, non?” Sirman lanmor pa pli for ki sa enn pwisan ki Sours lavi? (Ps. 36:9) Tou bann ki dan Seol oubyen Lades i dan memwar Bondye e i pou anmenn delivrans pour sakenn ant zot.—Lik 20:37, 38; Rev. 20:11-14.

¹¹ Antretan Zeova i direkteman enplike dan lavi son bann adorater fidel ozordi. Annou aprezan vwar trwa fason kot i sirman “sa Enn ki anmenn delivrans” pour nou.

Proteksyon spirityel

12, 13. Akoz i vreman enportan pour annan proteksyon spirityel e ki mannyer Zeova i donn nou sa proteksyon?

¹² Zeova i donn nou sa proteksyon pli enportan e sa se proteksyon spirityel. Konman vre Kretyen nou konpran ki i annan en keksoz ki annan plis valer ki sa lavi ki nou pe viv. Nou relasyon personnel avek Zeova i sa keksoz pli presye. (Ps. 25:14; 63:3) San sa relasyon, nou lavi ki nou pe viv la konmela pa ti pou vo lapenn e nou ti pou napa en lespwar pour lavenir.

¹³ Granmersi Zeova i donn nou tou sa led ki nou bezwen pour gard en bon relasyon avek li. Nou annan son Parol, son lespri sen ek son kongregasyon dan lemonn antye pour ed nou. Ki mannyer nou kapab profit tou sa bann keksoz ki Zeova in donn nou? Kan nou regilyerman e seryezman etidye son Parol, nou lafwa ek lespwar pou ranforsi. (Rom. 15:4) Si nou senserman priye pour ganny son lespri sen, sa pou ed nou reziste sa tandans pour fer sa ki mal. (Lik 11:13) Kan nou reste azour avek konsey ki lesklav fidel i donn nou atraver bann piblikasyon ki baze lo Labib ensi ki bann renyon ek lasanble, nou pou ganny nouri avek bann “manze [spirityel] kan i ler.” (Mat. 24:45) Sa bann provizyon i protez nou  spirityelman e i ed nou pour reste pros avek Bondye.—Zak 4:8.

14. Rakont en leksperyans pour montre proteksyon spirityel ki Zeova i donn nou.

¹⁴ Pour montre konman Zeova i protez nou spirityelman, eski ou rapel sa paran ki ti ganny mansyonnen dan lentrodiksyon lartik presedan? Detrwa zour apre ki zot fiy Theresa ti ganny raporte manke, zot ti ganny en move nouvel: I ti’n ganny touye. * Sa papa i rapel: “Mon ti’n priy Zeova pour protez li. Mon admet ki o konmansman ler zot ti vwar son lekor mon ti demann mon lekor akoz Zeova pa ti’n reponn mon lapriyer. I vre, mon konnen Zeova pa garanti ki i pou fer mirak pour protez son pep endividyelman. Mon ti kontinyen priye pour mwan ganny en konpran. Mon’n ganny rekonforte par lefet ki mon konnen ki Zeova i protez son pep spirityelman, setadir i donn nou sa ki nou bezwen pour protez nou relasyon avek li. Sa kalite proteksyon i pli enportan akoz i kapab annan lefe lo nou lavenir. Dan sa sans, Zeova in protez Theresa akoz i ti pe servi Li fidelman avan i mor. Mon santi mwan pli anpe pour konnen ki sa lespwar ki Theresa ti annan lo lavenir i dan son lanmen.”

Zeova i soutenir bann ki malad

15. Dan ki fason Zeova i kapab ed nou kan nou’n seryezman ganny afekte avek en maladi?

¹⁵ Parey i ti fer avek David, Zeova i kapab soutenir nou “pandan ki [nou] malad lo en divan.” (Ps. 41:3) Zeova i touzour ed nou menm si i pa pe fer mirak pour geri nou dan nou letan. Ki mannyer? Dan son Parol i annan bann prensip ki kapab ed nou pour fer bann desizyon saz lo bann tretman medikal e lo lezot keksoz ankor. (Prov. 2:6) Nou kapab ganny lenformasyon efikas ek bann sizesyon pratik ki diskit spesifikman lo sa problenm lasante ki nou pe eksperyanse, dan bann lartik Awake! ek Latour Veyer. Zeova i kapab donn nou “sa pisans ki napa son parey” atraver son lespri sen e sa i kapab ed nou pour fer fas avek nou sityasyon e reste fidel malgre sa ki kapab arive. (2 Kor. 4:7) Avek sa kalite led, nou pou evite les nou maladi preokip nou ziska ki i fer nou perdi nou lobzektif spirityel.

16. Ki mannyer en frer in reisi fer fas avek son maladi?

¹⁶ Egzamin legzanp sa zenn frer ki ti ganny mansyonnen o konmansman sa lartik avan sa enn. An 1998, i ti dekouver ki i ti annan amyotrophic lateral sclerosis ouswa ALS ki finalman ti fer li konpletman paralize. * Ki mannyer in reisi fer fas avek son maladi? I ti eksplike: “Mon’n eksperyans bann moman kot mon ganny bokou douler e fristre sirtou kan mon santi ki zis lanmor ki pou kapab tir  mwan dan tousala. Sak fwa mon santi koumsa mon priy Zeova pour li donn mwan trwa keksoz: lape lespri, pasyans ek landirans. Mon santi ki Zeova in reponn sa bann lapriyer. Lape lespri i ed mwan reflesir lo bann pwen ki rekonfort mwan, par egzanp mon reflesir lo konman mon lavi pou ete dan nouvo lemonn kot mon pou kapab marse, apresye en manze byen goute e koz avek mon fanmir ankor. Lefet ki mon paralize, pasyans i ed mwan sirmont bann lenkonvenyans ek defi. Landirans i permet mwan reste fidel e pa perdi mon lekilib spirityel. Mon sirman dakor avek psalmis David akoz mon santi ki Zeova in soutenir mwan pandan ki mon malad.”—Iza. 35:5, 6.

Zeova i fourni sa ki neseser

17. Ki Zeova in promet i pou fer pour nou e ki sinifikasyon sa promes?

¹⁷ Zeova i promet ki i pou pran swen avek nou materyelman. (Lir Matye 6:33, 34 ek Ebre 13:5, 6.) Me sa pa vedir ki nou pou ganny sa ki nou bezwen materyelman par mirak ouswa nou devret refize travay. (2 Tesa. 3:10) La sinifikasyon sa promes: Si dan nou lavi nou premyerman rod Rwayonm Bondye e nou pare pour travay pour ganny nou neseser, nou pou kapab kont lo Zeova pour li ed nou pour ganny sa ki neseser dan lavi. (1 Tesa. 4:11, 12; 1 Tim. 5:8) I kapab fourni nou sa ki nou bezwen dan bann fason ki nou pa ti pe ekspekte, petet atraver en frer oubyen ser Kretyen ki ed nou materyelman oubyen ofer nou en plas travay.

18. Rakont en leksperyans pour montre ki nou kapab ganny sa ki neseser ler nou dan bezwen.

¹⁸ Ou rapel sa manman tousel ki ti ganny mansyonnen dan lentrodiksyon lartik presedan. Kan i ti al reste dan en lot rezyon ansanm avek son fiy, i ti vwar li difisil pour trouv en travay. I eksplike: “Dan bomaten mon ti al predikasyon e tou le apremidi mon ti rod louvraz. Mon rapel en zour ki mon ti’n al aste dile laboutik, laba mon ti debout e get bann legim, me mon ti napa ase larzan pour aste ni enn. Zanmen dan mon lavi mon’n deza santi mwan sitan deprimen. Sa menm zour kan mon ti retourn dan lakour apre ki mon ti sorti laboutik, mon lavarang deryer lakaz ti ranpli avek bann sak ki ti annan diferan kalite legim. I ti annan ase manze pour soutenir nou pour plizyer mwan. Mon ti zis plere e mon ti remersye Zeova.” Sa ser ti aprann pli tar ki sa bann sak legim ti sorti kot en frer dan son kongregasyon ki ti kiltiv sa bann legim dan son zarden. Pli tar sa ser ti ekrir li: “Menm si mon ti remersye ou en kantite sa zour, mon ti osi remersye Zeova lefet ki i’n servi ou labonte pour fer mwan rapel ki i kontan mwan.”—Prov. 19:17.

19. Ki konfyans serviter Zeova pou annan kan gran ladetres i arive e ki nou devret determinen pour fer depi la konmela?

¹⁹ I kler ki sa ki Zeova ti fer dan letan lontan ensi ki dan nou letan i donn nou rezon pour annan konfyans dan li konman sa Enn ki ed nou. Byento, kan gran ladetres i vin lo sa lemonn Satan, plis ki zanmen oparavan nou pou bezwen led Zeova. Deplis, avek konfyans total, bann serviter Zeova pou kapab depan antyerman lo li. Lefet ki zot pou konnen delivrans i pros zot pou nobou lev zot latet e rezwir. (Lik 21:28) Antretan, nenport ki defi nou kapab rankontre, annou reste determinen pour met tou nou konfyans dan Zeova, annan lasirans konplet ki nou Bondye ki pa zanmen sanze i sirman “sa Enn ki anmenn delivrans” pour nou.

[Not anba lo paz]

Eski ou rapel?

• Ki mannyer Zeova i kapab delivre bann ki’n mor san ekspekte?

• Akoz proteksyon spirityel i pli enportan?

• Ler Zeova i promet i pou pran swen avek nou materyelman, ki sa i vedir?

[Kestyon]

[Portre lo paz 14]

Frer Rutherford ek son bann asosye ti ganny arete an 1918, pli tar ganny large e bann sarz kont zot ti ganny retire

[Portre lo paz 16]

Zeova i kapab delivre nou “pandan ki [nou] malad lo en divan”