Sa ki nou aprann avek Zezi

Konman pour tret lezot?

Akoz labonte i enportan?

Eski ou demontre labonte menm ler lezot pa demontre labonte anver ou? Si nou anvi imit Zezi, nou devret demontre labonte menm anver bann ki ay nou. Zezi ti dir: “Si ou kontan zis sa bann ki kontan ou, ki rekonpans ou merite? Menm bann move dimoun zot kontan sa ki kontan zot. . . . Me ou, kontan ou bann lennmi . . . e ou a vin zanfan Bondye Tre-O, parski i bon anver bann dimoun engra e move.”—Lik 6:32-36; 10:25-37.

Akoz i enportan pour pardonnen?

Kan nou fer bann fot, nou anvi ki Bondye i pardonn nou. Zezi ti ansennyen ki i neseser pour nou priye pour Bondye pardonn nou. (Matye 6:12) Parkont, Zezi ti osi dir ki Bondye pou pardonn nou si selman nou osi nou volonterman pare pour pardonn lezot. I ti dir: “Si zot pardonn bann ki’n fer zot ditor, zot Papa ki dan lesyel i a osi pardonn zot. Me si zot pa pardonn lezot ki’n fer zot ditor, zot Papa osi pa pou pardonn zot zot pese.”—Matye 6:14, 15.

 Ki mannyer bann fanmir i kapab ere?

Menm si Zezi pa ti zanmen marye, nou kapab aprann en kantite avek li lo ki mannyer pour fer lavi fanmir ere. Atraver son parol ek aksyon, i’n kit en model pour nou imite. Egzamin sa trwa pwen swivan:

1. En zonm i devret kontan son madanm parey son prop lekor. Zezi ti kit en legzanp pour bann mari. I ti dir avek son bann disip: “La mon donn zot en konmannman nouvo: kontan kanmarad.” Ziska ki degre? I ti dir: “Parey mwan mon’n kontan zot.” (Zan 13:34) Ler pe aplik sa konsey avek bann mari, Labib i dir: “Zot, bann mari, kontan zot madanm parey Kris in kontan [“kongregasyon,” NW] e in donn son lavi pour li. . . . Bann zonm devre alor, kontan zot madanm parey zot kontan zot prop lekor. Sa ki kontan son madanm, i kontan son prop lekor. Annefe napa personn ki’n deza ay son prop lekor, o kontrer, i nouri li e pran byen swen avek li, parey Kris i fer pour [“kongregasyon,” NW].”—Efezyen 5:25, 28, 29.

2. Bann ki’n marye i devret reste fidel avek kanmarad. Annan relasyon seksyel an deor sa laranzman maryaz i en pese dan lizye Bondye e i kas lavi fanmir. Zezi ti dir: “Zot pa’n lir . . . ‘Pour sa rezon, en zonm pou kit son papa ek son manman pour ini avek son madanm, e toulede zot vin en sel laser.’ Zot nepli de me en sel. Alor sa ki Bondye in ini ansanm zonm pa devre separe. . . . Mon dir zot, si en zonm i divors son madanm pour okenn rezon, eksepte si i’n tronp li, e i marye avek en lot madanm, i komet adilter.”—Matye 19:4-9.

3. Zanfan i devret obeir zot paran. Menm si Zezi ti parfe e son paran ti enparfe, konman en zanfan i ti obeir zot. Kan Zezi ti annan 12 an, Labib i dir: “Zezi ti retourn Nazaret avek [son paran]. I ti kontinyen obei zot.”—Lik 2:51; Efezyen 6:1-3.

Akoz i enportan pour aplik sa bann prensip?

Konsernan bann leson ki i ti ansenny son bann disip, Zezi ti dir: “Aprezan ki zot konn sa, zot ere si zot met li an pratik.” (Zan 13:17) Pour vin en vre Kretyen nou devret aplik sa konsey ki Zezi ti donn nou konsernan konman nou devret tret lezot. I ti dir: “Dimoun pou war ki zot mon bann disip si zot kontan kanmarad.”—Zan 13:35.

Pour plis lenformasyon, vwar sapit 14 dan liv Ki Labib i vreman dir?

[Portre lo paz 18]

Parabol Zezi konsernan garson perdi e retrouve i ansenny nou lenportans demontre labonte e pour pardonnen.—Lik 15:11-32

[Portre lo paz 19]

Bann ki marye i devret fidel avek kanmarad