Kestyon lekter

Dan son let pour bann Ebre, zapot Pol ti koz lo “lenpozisyon [oubyen poz] lanmen.” Eski i ti pe refer avek bann ansyen ler zot ganny apwente ouswa en lot keksoz?—Ebr. 6:2.

I pa vedir ki nou devret panse ki sa pratik i ankor pe ganny fer, me i tre probab ki Pol ti pe refer avek ler lanmen ti ganny poze lo en dimoun pour transfer don lespri sen.

I vre ki plizyer fwa Labib i koz lo poz lanmen pour refer avek ler en dimoun i ganny apwente dan en fason teokratik. Moiz “ti poz son lanmen lo” Zozye kan i ti pe apwent li konman son sikseser. (Det. 34:9) Dan kongregasyon Kretyen, serten zonm kalifye ti ganny apwente kan lanmen ti ganny poze lo zot. (Akt 6:6; 1 Tim. 4:14) Pol ti konsey Timote pour pa prese pour poz lanmen lo personn.—1 Tim. 5:22.

Parkont, Pol ti ankouraz bann Kretyen Ebre pour “avanse pour ariv dan en matirite” la ki zot ti’n les deryer “sa lansennyman elemanter.” Ki sa bann keksoz elemanter? Pol ti enkli “renons travay initil . . . , lafwa dan Bondye, ensi ki lansennyman lo bann batenm, [ek] seremoni lenpozisyon [oubyen poz] lanmen” parmi sa bann keksoz elemanter. (Ebr. 6:1, 2, nou ki’n met an italik.) Eski ganny apwente konman ansyen i zis en keksoz elemanter ki bann Kretyen i devret avanse oubyen progrese pour atenn? Non. Vin en ansyen dan kongregasyon i en lobzektif ki bann frer ki matir i devret fer zefor pour atenn e apre sa zot devret kontinyen apresye sa privilez, i pa zis en keksoz elemanter.—1 Tim. 3:1.

Poz lanmen lo en dimoun ti annan en lot sinifikasyon. Dan premye syek, Zeova ti rezet nasyon Izrael konman son pep e i ti swazir en lot group pour li donn son benediksyon e sa i Izrael spirityel ouswa bann Kretyen swazir. (Mat. 21:43; Akt 15:14; Gal. 6:16) Bann don lespri sen, parey koz dan diferan langaz ti ganny transmet atraver mirak e i ti levidans pour sa sanzman. (1 Kor. 12:4-11) Kan Korney ek tou bann ki ti dan son lakaz ti vin Kretyen, i evidan ki zot ti’n ganny lespri sen akoz zot ti konmans “koz dan bann langaz etranze.”—Akt 10:44-46.

Parler, bann don mirakile ti ganny transmet kan zot ti poz lanmen lo en dimoun. Kan Filip ti pres sa bon nouvel Samari, en kantite dimoun ti batize. Konsey direkter ti anvoy zapot Pyer ek Zan laba. Akoz? Nou lir: “Alor [sa de] ti enpoz lanmen lo [sa bann ki ti’n fek batize] e zot ti resevwar Sent-Espri.” Sa ti vedir ki zot ti’n ganny don lespri sen, bann abilite ki lezot ti kapab vwar. Nou konn sa akoz Simon ki oparavan ti pratik mazik ti vwar travay lespri sen e son vorasite ti pous li pour ofer bann zapot en sonm larzan afen ki i ti ava kapab ganny sa abilite pour poz lanmen lo lezot pour zot ganny lespri sen e pour ki lezot osi ti ava kapab fer bann mirak. (Akt 8:5-20) Pli tar, 12 dimoun Efez ti batize. Nou lir: “Kan Pol ti enpoz lanmen lo zot, Sent-Espri ti desann lo zot, e zot ti konmans koz bann lalang etranze, pour anons mesaz ki Bondye ti donn zot.”—Akt 19:1-7; konpar 2 Timote 1:6.

Alor, dan Ebre 6:2 Pol ti pe aparaman refer avek ler zot ti poz lanmen lo bann nouvo Kretyen pour transfer don lespri sen.