Pwäppwäralo Kilisou
Aülüngätin Napanap
Pwäppwäralo Kilisou
IFA ALON EWE PAIPEL? “Oupwe kilisou lon mettoch meinisin.”—1 Tesalonika 5:18.
IFA EWE MINEN EPPET? Sia nom lein aramas mi lamalam tekia me rese meefi kilisou, iwe epwe tongeni fis pwe sipwe pwal äppirü napanaper. (2 Timoti 3:1, 2) Pwal eü, a fen chommong ach angang nge sia pwal apachaatä pwal ekkoch. Iwe mwiriloon, sipwele choutiw ren osukosuk me chechchei pwisin mochenich, iwe esap chüen wor ach fansoun le aücheani minne mi nom rech are kilisou ngeni ekkewe aramas mi föfföröch ngenikich.
MET KA TONGENI FÖRI? Awora fansoun le ekkekieki woon ekkewe mettoch mi mürinnö ka pwapwaiti iei. Pwüngün, eli ka choutiw ren om kewe osukosuk. Nge nengeni mwo än King Tafit ei leenien äppirü. Fän ekkoch a meefi weiresin tatakkisin letipan me riäfföü ren ekkewe sossot a küna. Iwe nge, a chüen iotek ngeni Kot: “Üa . . . ekieki usun mine ka fen föri. Üa ekieki usun om kewe föför.” (Kölfel 143:3-5) Inaamwo fän sossot, a chüen menemenöch me pwäralo kilisou.
Ekieki föfföröchün ekkewe ekkoch ngonuk me apasa om kilisou ngeniir. Jises, i ewe leenien äppirü mi fokkun mürinnö ren ei napanap. Äwewe chök, atun chienan we Meri a epiti ngeni möküran me pechen kewe ewe lö mi mömmong, ekkewe aramas ra eis: “Pwota a asolapala ei lö?” * Ekkena chon esiit ra ekieki pwe a tongeni amömölo ewe lö me fangolo ewe moni ngeni ekkewe chon wöüngaw. Nge Jises a ereniir: “Oupwe likitala neminei. Pwata oua osukosuka?” Mwirin a pwal apasa: “Neminei a föri ükükün met a tongeni.” (Mark 14:3-8; Jon 12:3) Jises a pwäratä an kilisou ren minne Meri a föri, lap seni an ekilapei minne ese föri.
Ekkoch repwap kerän meefi aüchean famili, chiechi, are pwal ekkoch feiöch lupwen a fen pöüt seniir. Ika kopwe ekkekieki ekkewe mettoch mi mürinnö ka pwapwaiti iei, iwe, esap fis ngonuk ena. Pwata kese ekieki are fen makkeei met ekkewe ka meefi kilisou ren?
Pokiten “lifang mi mürina meinisin” ra feito seni Kot, mi öch ach sipwe apasatä ach kilisou ngeni lon iotek. (Jemes 1:17) Ach föfföri ei iteitan epwe älisikich le pwäppwäralo kilisou me ämääraatä ewe napanap menemenöch.—Filipai 4:6, 7.
[Pwóróus fan]
^ Lon fansoun ekkewe aposel, än emön epiti ngeni lö möküren emön wasöla a pwäratä an awasölaöchü, me an epiti pechen ngeni lö a pwäratä tipetekison.
[Sasing lon pekin taropwe 6]
En mi kan pwäralo om kilisou ren met ekkewe ekkoch ra föri fän itom?