Enimuen Napanap

Pwäkini Om Osupwang lon Pekin Lükü Kot

IFA ALON EWE PAIPEL? ‘Ra feiöch chon silei pwe ra wöüngau lon pekin lükü.’​—Mattu 5:3.

IFA EWE MINEN EPPET? Chommong sokkopaten lamalam ra eäni sokkopaten afalafal ren ifa usun kopwe pwäkini om osupwang lon pekin lükü. Nge ifa usun kopwe silei menni leir a pwüng me wesewesen apwapwaai Kot? Ekkoch soumak mi iteföülo ra apasa pwe esap alen tipatchem are mi fen efeiengaw än emön epwe lükü me tuppwöl ngeni Kot. Lon eü puk itan Maclean a mak meefien emön mi iteföülo ese lükü woren kot, a erä: “Lüküen chon Kraist pwe mei wor och mettoch mi lamot seni mettochun aion a chök ekisaalo aüchean manau. Än aramas lükü ena a amwökütüür le föri föfförün mwänesol.”

MET KOPWE TONGENI FÖRI? Etittina ekkewe pisekin ännet usun woren Kot. (Rom 1:20; Ipru 3:4) Kosap mut ngeni aramas ar repwe pinei om kütta pölüwen ekkewe kapas eis mi lamot usun choweän: Met popun sia manau? Mi wor sopwosopwoloon manauen aramas mwirin mälo? Pwata sia küna chommong riäfföü? Met Kot a kütta seniei? A mmen lamot om silei pölüwen ekkena kapas eis pwe kopwe küna pwapwa.

Iwe nge, kosap mwittir lükü met emön a erenuk. Än Kot we Kapas a peseok om kopwe pwisin ännetaöchü ngonuk met Kot a pwapwaiti. (Rom 12:1, 2) Om achocho epwe atoto ngonuk feiöch. Ika kopwe awora fansoun le käeö ewe Paipel me apwönüetä ekkewe kapasen emmwen, iwe, epwe tümünuk seni osukosuk, akükkünalo om aürek, me epwe lapolo pwapwa lon manauom. Kopwe lükülük woon ena. Fite million sokkopaten aramas ra küna feiöch ren ar silei ewe enlet usun Kot me an kewe kokkot.

Atun ka küna feiöchün om akkapwönüetä än Paipel emmwen, epwe wattelo om tuppwöl ngeni Kot. Ika Chon Pwärätä Jiowa ra etiwok le käeö ewe Paipel rer, pwata kese fen etiwa? Iwe, ese mwääl kopwe tipeeü ngeni makkeien aposel Paul ei: “Ach soulang eu win mi lapalap are a wor rech menemenöch.”​—1 Timoti 6:6.

[Sasing lon pekin taropwe 8]

Pwisin änneta ngonuk met Kot a pwapwaiti