Kosap Alöllöok ngeni Ekkewe Ekkoch
Oruuen Napanap
Kosap Alöllöok ngeni Ekkewe Ekkoch
IFA ALON EWE PAIPEL? “Eman me eman epwe püsin apwüngü an föför. Are a mürina, mürin a tongeni pwapwa ren met a föri, nge esap awewei met i a föri ngeni met eman a föri.”—Kalesia 6:4.
IFA EWE MINEN EPPET? Eli fän ekkoch sia kan alöllökich ngeni ekkewe rese lien tufich, nge fen fän chommong sia alöllökich ngeni ekkewe mi pöchökkül, pisekisek are lipwäköch senikich. Ese lifilifil ewe popun sia mochen alöllö, nge ese fokkun öch ena napanap. Sia ekieki pwe aüchean emön a longolong woon tufichin are wöün, iwe nge, mi mwääl ena ekiek. Ena napanap mochen alöllö a tongeni efisi lolowo me emisfengen.—Än Salomon Afalafal 4:4.
MET KOPWE TÖNGENI FÖRI? Eäni än Kot ekiek usum. Itä ina met epwe ämmeef ngonuk aücheaom. “Aramas ra nenengeni lapalapen mesen eman, nge ngang üa nennengeni leluken aramas.” (1 Samuel 16:7) Jiowa * a silei aücheaom, esap ren an apöpö en ngeni ekkewe ekkoch, nge ren an älleani masouen letipom, etittina om ekiek, om memmeef me met a kan amwökütuk le föri mettoch. (Ipru 4:12, 13) Jiowa a weweiti ükükün om tufich me a pwal mochen kopwe mirititi ena. Ika ka apöpööi aücheaom ngeni ekkewe ekkoch, iwe, kosap menemenöch iteitan are kopwe fen lamalam tekia. Ina popun, kopwe tipetekison me ekieki pwe kese tongeni angöch lon mettoch meinisin minne ka föri.—Än Salomon Fos 11:2.
Met kopwe föri pwe kopwe aüchea mwen mesen Kot? Iei alon ewe soufos Mika: “En aramas, ewe Samol mi Lapalap a aiti ngonuk mine a murina. Met a mochen pwe kopwe fori? A mochen pwe kopwe fori mine a pwung o eani kirikiroch, kopwe pwal tipetekison fan mesen om we Kot.” (Mika 6:8) Ika ka apwönüetä ena, iwe Kot epwe tumunuk. (1 Piter 5:6, 7) Ina ewe äkkäeüin popun kopwe meefi menemenöch.
[Pwóróus fan]
^ Ina usun iten Kot lon Paipel.
[Sasing lon pekin taropwe 5]
Aücheaom me ren Jiowa a longolong woon minne a nom lon letipom