Ang unang 60 minutos sa kinabuhi sa bata human siya ipanganak maoy importanteng yugto sa pagpasibo sa bag-ong kahimtang. Ngano? Importante kaayo nga kugoson sa inahan ang bag-ong natawo nga bata nianang panahona kay dako nag ikatabang sa pagtubo ug pag-uswag sa bata. *

Unsay nagpalihok sa inahan sa pagpakitag pagmahal ug pagtagad ngadto sa iyang bag-ong natawo nga bata? Gipatin-aw ni Propesor Jeannette Crenshaw diha sa The Journal of Perinatal Education nga ang hormone nga gitawag ug oxytocin “magpalihok sa inahan human sa pagpanganak sa paghapohap, pagsud-ong, ug pagpasuso sa iyang anak.” Human sa pagpanganak, duna poy i-release nga laing hormone nga “motabang sa inahan aron matagad ang panginahanglan sa iyang anak” ug motabang sa iyang pagpakiglabot sa bata. Nganong importante ni?

Ang suod nga relasyon sa inahan ug bata gidisenyo sa atong mahigugmaong Maglalalang, si Jehova nga Diyos. * Gihisgotan ni Haring David nga ang Diyos maoy ‘nagpagula kaniya gikan sa tagoangkan’ ug nagpabati niyang luwas pinaagi sa gakos sa iyang inahan. Siya miampo: “Sukad sa akong pagkatawo, gisalig na ko sa imong pag-atiman; gikan sa tagoangkan sa akong inahan, ikaw na ang akong Diyos.”—Salmo 22:9, 10.

HUNAHUNAA KINI: Kon gihimo sa Diyos ang maong komplikadong sistema aron maseguro nga ang inahan magtagad gyod sa iyang anak ug magtagana sa mga panginahanglan niini, dili ba makataronganon lang nga ang Diyos may pagtagad sab sa matag usa nato ingong ‘mga anak sa Diyos’?—Buhat 17:29.

Si Jesu-Kristo, nga mas nakaila sa Maglalalang kay ni bisan kinsa, nagtudlo: “Dili ba ang duha ka goryon ginabaligya lang ug usa ka sensilyo nga gamayg bili? Apan walay usa kanila ang mahulog sa yuta nga dili mahibaloan sa inyong Amahan. Nahibalo pa gani siya sa gidaghanon sa buhok sa inyong ulo. Busa ayaw mog kahadlok; mas labaw mog bili kay sa daghang goryon.”—Mateo 10:29-31.

Gamay ra nato ang makamatikod sa matag gagmayng langgam nga atong makita, ug dili gani nato mamatikdan dihang dunay usa kanila nga mahulog sa yuta. Pero ang atong Amahan sa langit nakamatikod sa matag usa kanila! Ug ang mga langgam—bisan ang daghang langgam—dili makatumbas sa bili sa tawo diha sa iyang panan-aw. Busa klaro ang leksiyon: ‘Ayawg kahadlok’ kay ang Diyos nakamatikod nimo. Gani, siya may pagtagad gayod kanimo!

 Ang Bibliya nagpasalig nato

• “Ang mga mata ni Jehova naa sa tanang lugar, nga nagtan-aw sa daotan ug sa maayo.”—PROVERBIO 15:3.

• “Ang mga mata ni Jehova anaa sa mga matarong, ug ang iyang mga dalunggan namati sa ilang pagtuaw alang sa tabang.”—SALMO 34:15.

• “Magsadya ko pag-ayo sa imong maunongong gugma, kay nakita nimo ang akong kasakitan; nasayod ka sa akong grabeng kagul-anan.”—SALMO 31:7.

Duna bay maayong epekto sa atong kinabuhi kon nahibalo ta nga ang Diyos interesado sa atong kaayohan ug mahigugmaong nag-atiman kanato? Duna gayod, sama kang Hannah, * nga taga-England, kinsa miingon:

“Sa daghang higayon, gibati nako nga wala ko mahala ni Jehova ug nga wala niya tubaga ang akong mga pag-ampo. Naghunahuna ko nga tungod to sa kakulang nakog pagtuo. Gibati nako nga gisilotan ko o gipasagdan kay dili ko importante, ug walay pagtagad ang Diyos kanako.”

Pero karon, wala na magduhaduha si Hannah nga si Jehova interesado ug nagmahal niya. Unsay nakapausab sa iyang gibati? “Anam-anam to nga kausaban,” siya miingon. “Nahinumdom ko sa usa ka pakigpulong base sa Bibliya daghang tuig nang milabay, nga naghisgot sa lukat nga gihalad ni Jesus nga dako kaayog epekto nako. Nakatabang to nako nga mobating gimahal ko ni Jehova. Ug dihang natubag ang akong mga pag-ampo, sagad makahilak ko sa kalipay kay gibati nakong gimahal gyod diay ko ni Jehova. Pinaagi sa pagtuon sa Bibliya ug pagtambong sa Kristohanong mga tigom, nakakat-on kog dugang bahin kang Jehova, sa iyang personalidad, ug sa iyang pagbati alang kanato. Karon, kombinsido ko nga si Jehova motabang ug nagmahal kanatong tanan ug siya interesado sa atong kaayohan ingong indibiduwal.”

Makapadasig ang giingon ni Hannah. Pero sa unsang paagi makaseguro ka nga ang Diyos nakasabot ug interesado sa imong mga gibati? Tubagon kana sa sunod nga artikulo.