“Oh Jehova, hangtod kanus-a ko mangayog tabang ug dili ka maminaw? Hangtod kanus-a ko magpakitabang nimo tungod sa kapintasan ug dili ka molihok?” (Habacuc 1:2, 3) Kini maoy mga pulong ni Habacuc, usa ka maayong tawo nga giuyonan sa Diyos. Ang iya bang gisulti nagpakita nga kulang siyag pagtuo? Wala! Gipasaligan sa Diyos si Habacuc nga Siya dunay gitakdang panahon aron taposon ang pag-antos.—Habacuc 2:2, 3.

Kon ikaw o ang mga suod nimo mag-antos, makaingon tingali ka nga langayan ang Diyos, nga angay unta siyang molihok dayon. Pero gipasaligan ta sa Bibliya: “Si Jehova dili langayan sa pagtuman sa iyang saad, sama sa gihunahuna sa ubang tawo, apan nagpailob siya ninyo kay dili niya gusto nga naay malaglag kondili gusto niya nga ang tanan maghinulsol.”—2 Pedro 3:9.

Hapit na! Gihisgotan ni Jesus ang usa ka kaliwatan nga makakita sa talagsaong mga panghitabo nga magpaila sa kataposang mga adlaw sa “sistema sa mga butang.” (Mateo 24:3-42) Ang katumanan sa tagna ni Jesus sa atong panahon nagpakita nga hapit nang molihok ang Diyos sa pagtapos sa tanang pag-antos. *

Pero unsaon pagtapos sa Diyos ang tanang pag-antos? Dihang dinhi si Jesus sa yuta, iyang gipakita ang gahom sa Diyos pinaagi sa paghatag ug solusyon sa pag-antos sa tawo. Tagda ang pipila ka pananglitan:

Kalamidad: Samtang si Jesus ug ang iyang mga apostoles naglawig sa Dagat sa Galilea, usa ka kusog kaayong unos ang mikusokuso sa ilang sakayan. Pero gipakita ni Jesus nga siya ug ang iyang Amahan makakontrolar sa kinaiyahan. (Colosas 1:15, 16) Si Jesus igo lang miingon: “Hilom! Hunong na!” Unsay resulta? “Milurang ang hangin, ug milinaw ang dagat.”—Marcos 4:35-39.

Sakit: Nailhan si Jesus tungod sa iyang katakos sa pag-ayo sa buta ug bakol, apil kadtong nag-antos sa patol, sanla, o uban pang sakit. Iyang “giayo ang tanang nag-antos.”—Mateo 4:23, 24; 8:16; 11:2-5.

Kanihit sa Pagkaon: Gigamit ni Jesus ang gahom nga hinatag sa iyang Amahan sa pagpadaghan sa diyutayng pagkaon. Ang Bibliya nag-ingon nga panahon sa iyang ministeryo, duha ka beses siyang nagpakaon ug libolibo ka tawo.—Mateo 14:14-21; 15:32-38.

Kamatayon: Ang tulo ka pagkabanhaw nga gihimo ni Jesus klarong nagpakita nga si Jehova dunay gahom sa pagwagtang sa kamatayon. Usa sa mga gibanhaw ni Jesus upat ka adlaw nang patay.—Marcos 5:35-42; Lucas 7:11-16; Juan 11:3-44.