Ang ubang gasa bililhon kay gihatag kini sa usa ka tawo nga may awtoridad o sa tawo nga atong gitahod pag-ayo. Pero ang ubang regalo usab, bisag dili mahal, atong pabilhan kay kini gihatag sa atong minahal nga sakop sa pamilya o suod nga higala. Ingon usab niana ang regalo ni Russell para kang Jordan, nga gihisgotan sa nag-unang artikulo. Sa unsang paagi nahisama niini ang gasa nga lukat?

Una, ang Bibliya nag-ingon nga “gipadala sa Diyos ang iyang bugtong nga Anak nganhi sa kalibotan aron kita makabaton ug kinabuhi pinaagi kaniya.” (1 Juan 4:9) Kini nga kamatuoran maoy nakapahimo niini nga gasa nga bililhon kaayo. Wala nay makalabaw pa sa awtoridad sa Diyos. Bahin kaniya, ang Hebreohanong salmista miingon: “Ikaw, kansang ngalan mao si Jehova, ikaw lamang ang Labing Hataas ibabaw sa tibuok nga yuta.” (Salmo 83:18) Wala nay makalabaw pa sa Diyos nga makahatag kanato ug ingon niana nga gasa.

Ikaduha, ang Diyos mao ang atong “Amahan.” (Isaias 63:16) Ngano? Siya ang naghatag kanato ug kinabuhi. Ginaatiman kita niya samag mapinanggaong amahan nga nag-atiman sa iyang mga anak. Gipangutana sa Diyos ang uban niyang karaang katawhan nga gitawag ug Epraim: ‘Efraim, dili ba, ikaw man ang pinangga kong anak, nga akong gikalipayan? Ang akong kasingkasing naghandom niya. Ako gayod nga ipakita niya ang akong kaluoy.’ (Jeremias 31:20, Biblia sa Kristohanong Katilingban) Busa gimahal usab sa Diyos ang iyang mga magsisimba karon. Siya ang atong gamhanang Maglalalang ug ang atong maunongong Amahan ug Higala. Dili ba kana igong rason aron pabilhan pa natog maayo ang iyang gasa?

Ang ubang gasa bililhon kay kini gihatag, dili tungod kay napugos lang, kondili tungod sa tinuod nga gugma. Ang tinuod nga manggihatagon dili magpaabot ug balos.

Gihatag sa Diyos ang iyang Anak alang kanato kay iya kitang gihigugma. “Pinaagi niini ang gugma sa Diyos gipadayag sa atong kahimtang, tungod kay gipadala sa Diyos ang iyang bugtong nga Anak,” nag-ingon ang Bibliya. Ngano? “Aron kita makabaton ug kinabuhi pinaagi kaniya.” (1 Juan 4:9) Obligado ba ang Diyos sa paghimo niana? Dili! Ang “lukat nga gibayad ni Kristo Jesus” maoy kapahayagan sa “dili-takos nga kalulot” sa Diyos.—Roma 3:24.

Nganong ang gasa sa Diyos maoy kapahayagan sa “dili-takos nga kalulot”? Ang Bibliya nagpatin-aw: “Ang Diyos nagrekomendar sa iyang kaugalingong gugma kanato sa pagkaagi nga, samtang kita mga makasasala pa, si Kristo namatay alang kanato.” (Roma 5:8) Tungod sa dakong gugma sa Diyos, napukaw siya sa pagluwas sa maluya, walay mahimo, ug makasasalang katawhan. Dili kita takos niana ug dili sab nato siya mabayran. Sa tibuok nga kasaysayan, ang iyang gasa mao ang kinadak-ang kapahayagan sa gugma.

Ang ubang regalo bililhon kay dunay dako nga gisakripisyo ang naghatag niini. Kon ang usa ka tawo gustong mohatag ug butang nga bililhon kaayo kaniya ug ihatag kana kanato ingong regalo, seguradong ato gayod kanang pabilhan tungod sa iyang gihimong sakripisyo.

“Gihatag [sa Diyos] ang iyang bugtong nga Anak.” (Juan 3:16) Puwedeng dili niya ihatag kanato ang bisan kinsa nga gimahal niya pag-ayo. Sa panahon nga gihimo sa Diyos ang uniberso, si Jesus mitabang sa paglalang ug siya “gikahinangpan pag-ayo” sa Diyos. (Proverbio 8:30) Si Jesus mao ang pinalanggang Anak sa Diyos ug “ang larawan sa dili-makita nga Diyos.” (Colosas 1:13-15) Wala nay makalabaw pa sa kasuod niining duha ka intelihenteng persona.

Pero wala ihikaw sa Diyos ang iyang kaugalingong Anak. (Roma 8:32) Gihatag ni Jehova ang iyang kinamaayohan ingong gasa alang kanato.

Ang ubang gasa bililhon kay kini gihatag sa panahon nga gikinahanglan pag-ayo. Ingnon ta nga wala kay kuwarta nga igasto sa pagpatambal, pero dunay miboluntaryo sa pagbayad sa galastohan aron ka maayo. Dili ba mapasalamaton kaayo ka sa maong gasa?

“Ingon nga diha kang Adan ang tanan nangamatay, sa ingon usab diha kang Kristo ang tanan pagabuhion.” (1 Corinto 15:22) Kay mga kaliwat ni Adan, kitang tanan ‘mamatay,’ ug dili makaikyas sa sakit ug kamatayon o dili makapasig-uli sa atong kaugalingon ngadto sa Diyos ug dili makapabiling walay sala sa iyang atubangan. Ug kita dili makahatag ug kinabuhi sa atong kaugalingon o sa uban. Ang Bibliya nag-ingon: “Walay usa kanila sa bisan unsang paagi ang makatubos bisan sa usa ka igsoon, ni makahatag sa Diyos ug usa ka lukat alang kaniya.” (Salmo 49:7, 8) Kita nagkinahanglan gayod ug tabang kay dili kita makaarang sa pagbayad sa bili sa lukat. Kon walay tabang sa Diyos, kita wala gayoy mahimo.

Tungod sa iyang dakong gugma, kinabubut-ong gibayran ni Jehova ang “pagpatambal” nga atong gikinahanglan aron kita mabuhi, aron nga pinaagi kang Jesus “ang tanan pagabuhion”. Sa unsang paagi nahimo kini sa lukat? “Ang dugo ni Jesus nga iyang Anak nagahinlo kanato gikan sa tanang sala.” Ang pagtuo sa giula nga dugo ni Jesus nagpaposible nga mapasaylo ang atong mga sala ug makabatog kinabuhing walay kataposan. (1 Juan 1:7; 5:13) Ug  unsay mahimo sa lukat alang sa atong patay nang mga minahal? “Sanglit ang kamatayon pinaagi man sa usa ka tawo, ang pagkabanhaw sa mga patay pinaagi usab sa usa ka tawo [si Jesus].”—1 Corinto 15:21. *

Walay gasa nga nahatag sukad ang makalabaw sa nahatag ni Jehova. Ug walay gasa nga nahatag sukad tungod sa dakong gugma ang makalabaw sa sakripisyo ni Jesus. Walay nakasakripisyo ug labaw pa niana gawas kang Jehova nga Diyos. Ug walay gasa ang makatagana sa atong dakong panginahanglan gawas sa usa ka sakripisyo nga magpahigawas kanato sa sala ug kamatayon. Oo, walay bisan unsang gasa ang makatumbas sa bili sa lukat.