Icipandwa 37

Bushe Nkabatishiwe?

Conga pa mashiwi yakonkapo nga cishinka nelyo bufi:

Abena Kristu bafwile ukubatishiwa.

□ Cishinka

□ Bufi

Icikalamba ico ulingile ukubatishiwilwa, ni pa kuti wikalacita ulubembu.

□ Cishinka

□ Bufi

Ulubatisho kuti lwalenga waisapusuka.

□ Cishinka

□ Bufi

Nga taubatishiwe ninshi Lesa te kuti akupeele umulandu pali fyonse ifyo ucita.

□ Cishinka

□ Bufi

Abanobe nga babatishiwa, ninshi na iwe wine naulinga ukubatishiwa.

□ Cishinka

□ Bufi

NGA ca kuti ulomfwila amafunde ya kwa Lesa, walitendeka no kuba cibusa wakwe, kabili ulebako na bambi pali Lesa, ninshi ulingile fye kubatishiwa. Kuti waishiba shani ukuti naulinga ukubatishiwa? Pa kuti twasuke ici cipusho, natumone ifyo ucongele pa muulu pa mashiwi ya kuti, cishinka nelyo bufi.

 ● Abena Kristu bafwile ukubatishiwa.

Cishinka. Yesu alandile ukuti abasambi bakwe bafwile ukubatishiwa. (Mateo 28:19, 20) Na kuba, Yesu umwine alibatishiwe. Nga ulefwaya ukupashanya Kristu, na iwe wine nga wamona ukuti naulinga ukubatishiwa, ukabatishiwe.

● Icikalamba ico ulingile ukubatishiwilwa, ni pa kuti wikalacita ulubembu.

Bufi. Ulubatisho cilangililo ca kuti nauipeela kuli Yehova. Nga waipeela tacilepilibula ukuti nomba wacingililwa, te kuti ucite ifyo wingatemwa ukucita mu bumfisolo. Lelo, icilenga ukuipeela kuli Yehova ni co ulafwaya ukucita ifyo Lesa afwaya.

● Ulubatisho kuti lwalenga waisapusuka.

Cishinka. Baibolo itila ulubatisho lwalicindama sana, kuti lwalenga umo ukupusuka. (1 Petro 3:21) Kwena tacipilibula ukuti ulubatisho lwaba kwati ni ndalama isho balipila ku kampani ka inshuwalanshi pa kuti nga baba mu bwafya shaisabafwa. Icilenga ukuti ubatishiwe ni co walitemwa Yehova kabili ulafwaya ukumubombela no mutima onse ku ciyayaya.—Marko 12:29, 30.

 ● Nga taubatishiwe ninshi Lesa te kuti akupeele umulandu pali fyonse ifyo ucita.

Bufi. Pali Yakobo 4:17 patila: “Umuntu nga alishiba ukucita icalungama lelo tacita, ninshi alebembuka,” nangu alibatishiwa nelyo iyo. Kanshi nga walishiba icalungama naukwata na mano ya kwishiba ifyo ulecita, nalimo ino e nshita ya kuti ulande pali ili lyashi na bafyashi bobe nelyo no Mwina Kristu umbi uwakosoka. Nga wacite fi, ukeshiba ifyo wingacita pa kuti ubatishiwe.

● Abanobe nga babatishiwa, ninshi na iwe wine naulinga ukubatishiwa.

Bufi. We mwine, ni we ufwile ukumona ukutila naulinga ukubatishiwa. (Amalumbo 110:3) Nga waishiba ififwaikwa pa kuba Inte ya kwa Yehova na lintu washininkisha ukuti ukacita fyonse ifyo walaya, e lyo  wingabatishiwa.—Lukala Milandu 5:4, 5.

Ukubatishiwa Kukaalula Ubumi Bobe

Ulubatisho lulaalula umuntu no kumulenga aipakisha amapaalo ayengi. Pa nshita imo ine, ufwile no kubombesha, pa kuti wingafikilisha ifyo walaya kuli Yehova.

Bushe ulefwaya ukuipeela kuli Lesa? Nga e fyo ulefwaya ukucita, ulingile ukuba ne nsansa. Umulimo uli no kubomba walicindama nga nshi, pantu wa kubombela Yehova no mutima onse e lyo no kulaikala ukulingana ne fyo walaya.—Mateo 22:36, 37.

IFILI MU CIPANDWA CIKONKELEPO

Uletontonkanya pa fyo ukacita ku ntanshi pa kuti ukekale bwino.

ILEMBO

“Mutuule imibili yenu nge lambo ilituntulu, ilyasanguluka, ilingapokelelwa kuli Lesa, e kutila ukubombela Lesa na maka yenu aya kupelulula.”—Abena Roma 12:1.

IFYO WINGACITA NI FI

Nga ulefwaya ukubatishiwa, eba abafyashi bobe pa kuti bakwafwe ukusanga uwingakwafwa mu cilonganino.—Imilimo 16:1-3.

NAWISHIBA . . . ?

Nga ulefwaya ‘ukushilwako akashilwa’ akengalenga waisapusuka, ulingile ukubatishiwa.—Esekiele 9:4-6.

IFYO NDEFWAYA UKUCITA!

Pa kuti nkabatishiwe, mfwile ukwishibilapo na fimbi pa masambililo ya mu Baibolo ayakonkapo: ․․․․․

Ifyo ningatemwa ukwipusha abafyashi bandi pali ili lyashi ni fi ․․․․․

ULETIPO SHANI?

● Mulandu nshi ukubatishiwa kwacindamina sana?

● Cinshi nalimo cingalenga umwaice ukubatishiwa bwangu?

● Cinshi nalimo icingalenga ukuti uwacaice, apabula no mulandu wine wine, aleshingashinga ukuipeela kuli Lesa no kubatishiwa?

[Amashiwi pe bula 306]

“Ukulaibukisha ukuti nalibatishiwa kwanengele ukulacita ifintu ifisuma kabili nalilekele ukulacita ifyabipa ifingandetelela.”—E fyalandile Holly

 [Akabokoshi ne Cikope pe bula 307]

Ifipusho Ifyo Abengi Bepusha pa Lubatisho

Bushe ulubatisho lwalola mwi? Nga bakwibisha mu menshi no kukwimya cipilibula ukuti nomba waleka ukulabika sana amano ku fyo watemwa, watendeka no kulacita ifyo Yehova afwaya.

Calola mwi ukuipeela kuli Yehova? Cipilibula ukuba umusha wa kwa Lesa, no kulaya ukuti wakulabika umulimo wa kwa Lesa pa ntanshi. (Mateo 16:24) Kanshi e co cacindamina wabala wapepa ipepo lya kuipeela kuli Yehova ilyo ushilaya ku kubatishiwa.

Finshi ulingile ukulacita ilyo ushilabatishiwa? Ufwile ukulacita ifyo Icebo ca kwa Lesa cisosa kabili ulingile no kulaebako bambi ifyo wasambilila. Pa kuti wingaba cibusa wa kwa Lesa, ufwile ukulapepa no kulasambilila Icebo cakwe. Ulingile ukulabombela Yehova, te pa mulandu wa kuti bambi balekupatikisha, lelo pantu e fyo usalilepo ukucita.

Bushe kwaliba icipimo ca myaka iyo ulingile ukukwata pa kubatishiwa? Te myaka bakonka sana. Na lyo line, ulingile ukuba umukuluko, ukufika pa mushinku uwa kwishiba ico uleipeelela kuli Yehova.

Inga ca kuti ulefwaya ukubatishiwa lelo abafyashi bobe batila uloleleko, kuti wacita shani? Nalimo ico bengakwebela ifyo ni co balefwaya ukuti wishibilepo na fimbi pa fyo Umwina Kristu alingile ukuba. Konka ifyo bakweba, kabili inshita ulelolela e lyo ufwile ukuba sana cibusa wa kwa Yehova. —1 Samwele 2:26.

 [Akabokoshi pe bula 308, 309]

Ifya Kutontonkanyapo

Bushe Ulefwaya Ukubatishiwa?

Pa kumona nga ca kuti naulinga ukubatishiwa asuka ifipusho fili pe samba no kulemba ifyo wala-asuka. Ilyo ushila-asuka ifi fipusho ubale ubelenge amalembo ayalipo.

Ni muli finshi umo ulelanga ukuti nomba walicetekela Yehova?—Amalumbo 71:5. ․․․․․

Bushe finshi ucita ifilanga ukuti walikwata amano aya kulekanya icalungama ne calubana?—AbaHebere 5:14. ․․․․․

Bushe ulapepa lyonse? ․․․․․

Bushe nga ulepepa ulalungatika pa kulanda, kabili ifyo ulanda nga ulepepa bushe filanga ukuti walitemwa Yehova?—Amalumbo 17:6. ․․․․․

Lemba pe samba ifyo wakulacita pa kuti amapepo yobe yaleba bwino. ․․․․․

Bushe ulabelenga Baibolo lyonse?—Yoshua 1:8. ․․․․․

Bushe finshi fimbi ifyo ubelenga pe sambililo lya pa lobe? ․․․․․

 Lemba pe samba ifyo wakulacita pa kuti isambililo lya pa lobe lileba bwino. ․․․․․

Bushe ulashimikila fye bwino? (Ica kumwenako: Bushe kuti walondolwelako abanobe amasambililo ya kubalilapo aya mu Baibolo? Bushe ulabwelelako ku balefwaya ukusambilila Baibolo? Bushe ulefwaya ukutampa ukulasambilisha umo Baibolo?)

□ Ee □ Awe

Bushe ulaya mu kushimikila nangu abafyashi bobe tabeleko?—Imilimo 5:42.

□ Ee □ Awe

Lemba pe samba ifyo wakulacita pa kuti uleshimikila bwino.—2 Timote 2:15. ․․․․․

Bushe kuti watila ulasangwa lyonse ku kulongana nangu usangwako fye limo limo?—AbaHebere 10:25. ․․․․․

Ucita shani pa kuti na iwe uleyasukapo pa kulongana? ․․․․․

Nga nabakusuminisha ukuya mu kulongana, bushe ulaya nangu abafyashi bobe tabeleko?

□ Ee □ Awe

Bushe we mwine kuti walanda ukuti walitemwa ukucita ukufwaya kwa kwa Lesa?—Amalumbo 40:8.

□ Ee □ Awe

Lemba ifyo wacitile ilyo wakeene ukukonkelela abanobe.—Abena Roma 12:2. ․․․․․

Finshi ukacita pa kuti ukatwalilile ukutemwa sana Yehova?—Yuda 20, 21. ․․․․․

Bushe kuti watwalilila ukubombela Yehova nangu ca kuti abafyashi bobe ne fibusa fyobe baleka ukumubombela?—Mateo 10:36, 37.

□ Ee □ Awe

[Icikope pe bula 310]

Nga filya fine icupo calula umuntu, e fyaba no lubatisho, kanshi ilyo taulabatishiwa ufwile ukutontonkanyapo sana