2 Timote 2:1-26
2 E ico, we mwana wandi,+ ulekosa+ mu cikuuku ca kwa Lesa+ ico na Kristu Yesu akwata,
2 kabili ifintu ifyo waumfwile kuli ine ifyo ne nte+ ishingi shashininkisha, ifi fintu ufipeele ku ba cishinka, abakafikapo bwino bwino ukusambilisha bambi.+
3 Apo uli mushilika+ umusuma uwa kwa Kristu Yesu, ucule ku bubi.+
4 Takwaba umushilika+ nangu umo uitumpa mu fya kucitacita ifya muli cino calo pa kuti apange indalama.+ Pantu afwaya ukucita ifya kuti asekeshe uwamwingisha ubushilika.
5 Kabili, umuntu uulebutuka mu kucimfyanya mu mangalo,+ tapoka icilambu kano abutuka ukulingana na mafunde.
6 Umulimi uubombesha afwile ukuba e wa kubalilapo ukulyako ifisabo.+
7 Lyonse uletontonkanya pa co ndesosa; cine cine Shikulu akalenga ukuti wiluke+ ifintu fyonse.
8 Ibukisha ukuti Yesu Kristu alibuushiwe ku bafwa+ kabili ali pa bana+ ba kwa Davidi, ukulingana ne mbila nsuma iyo nshimikila;+
9 iyo ndeculila ukufika na ku kukakwa+ kwati ndi cipondo. Lelo, icebo ca kwa Lesa tacakakwa.+
10 E co nshipikishisha ifintu fyonse pa mulandu wa basalwa,+ ukuti na bo bakapusukile muli Kristu Yesu e lyo no kucindamikwa umuyayaya.+
11 Ya cishinka aya mashiwi ayatila:+ Nga cine cine twafwilile pamo nankwe, tukaba no mweo pamo nankwe;+
12 nga twatwalilila ukushipikisha, tukaba ishamfumu no kutekela capamo nankwe;+ nga twamukaana,+ na o akatukaana;
13 nga twabulwa icishinka, ena atwalilila uwa cishinka,+ pantu te kuti aikaane umwine.
14 Ulebebukishako+ pali ifi fintu, kabili ulebakonkomesha+ pa ntanshi ya kwa Lesa nge nte,+ ukuti tabafwile ukulakansanina pa mashiwi,+ icintu icishafwa kantu nakalya pantu ciwisha icitetekelo ca baleumfwa.
15 Uibikilisheko ukuipeela kuli Lesa ngo muntu uo asuminisha,+ umubomfi+ uushingaba ne nsoni pa mulimo wakwe,+ uulungika pa kusambilisha icebo ca cine.+
16 Lelo taluka ku milandile ya buwelewele iishumfwana ne fya mushilo;+ pantu abalanda iyo milandile bakaya balebipilako fye mu kucita ifyabipa,+
17 kabili amashiwi yabo yakasalangana nge cilonda icishipola.+ Bamo pali aba ni Humenai na Filete.+
18 Aba bene bantu balipaasuka ku cine,+ pa kusosa ukuti ukubuuka kwa bafwa kwalicitika kale;+ kabili baleonaula icitetekelo ca bamo.+
19 Pali fyonse ifi, umufula uwakosa uwa kwa Lesa walikalilila,+ umufula apafwatikwa amashiwi ayatila: “Yehova aishiba abakwe,”+ na yatila: “Onse uulumbula ishina lya kwa Yehova+ ataluke ku cabipa.”+
20 Awe mu ng’anda iikalamba tamwaba fye ifipe fya golde na silfere lelo mwaba ne fya fimuti ne fye bumba, kabili fimo fya mulimo wa mucinshi lelo fimbi na fyo fya mulimo uwabula umucinshi.+
21 E ico, umuntu nga aitalusha ku fipe ifyabula umucinshi, akaba icipe ica mucinshi kabili ica mushilo, ico umwine engalabomfya, icalinga ukubomba umulimo onse uusuma.+
22 Kanshi fulumuka ulunkumbwa lwa mu bulumendo,+ lelo konkelela ubulungami,+ icitetekelo, ukutemwa, umutende,+ kabili uleba pamo na balilila kuli Shikulu ne mitima iyasanguluka.+
23 Kabili ukaane ifipusho fya buwelewele kabili ifishalolamo,+ pantu walishiba ukuti fiimya fye ulubuli.+
24 Lelo umusha wa kwa Shikulu tafwile ukucita ulubuli,+ lelo afwile ukuba uwanakilila kuli bonse,+ uwafikapo ukusambilisha,+ uushishimisha ububi,+
25 uufunda mu kunakilila abasuusha;+ nalimo Lesa kuti abasuminisha ukulapila+ pa kuti beshibe icine bwino bwino,+
26 kabili beluke no kufuma mu citeyo+ ca kwa Satana Kaseebanya, apo alibekata abatuntulu+ pa kutila balecita ukufwaya kwakwe.
