30 MEI 2023 | BYGEWERK: 6 MAART 2024
RUSLAND

JONGSTE NUUS – BOETES GEGEE | Broers in Teikowo fokus op Jehovah se ondersteuning

SPEEL

Op 29 Februarie 2024 het die Teikofski-distrikshof van die Iwanowo-streek broer Sergei Galjamin, Anatoli Ljamo, Wladimir Spiwak en Aleksandr Wasitjkin skuldig bevind. Die broers het elkeen ’n boete gekry. Wladimir is ’n boete van 600 000 roebel (meer as R120 000) gegee, Sergei is ’n boete van 650 000 roebel (meer as R130 000) gegee en Aleksandr en Anatoli is elkeen ’n boete van 1 100 000 roebel (meer as R220 000) gegee.

Profiel

Sergei Galjamin

Gebore: 1967 (Teikowo, Iwanowo-streek)

Agtergrond: Hy besit en werk by ’n besigheid wat skoene regmaak

Trou met Ljoedmila in 1991. Hulle het drie dogters

Was verbaas toe hy leer dat God ’n naam het. Het ’n vergadering van Jehovah se Getuies bygewoon en die vriendelikheid wat hulle aan hom gewys het, het gehelp om hom te oortuig dat hy die waarheid gevind het. Sergei is in 2001 gedoop, en Ljoedmila in 2002

Persoonlike kommentare

Watter belangrike les het jy geleer as gevolg van hierdie moeilike situasie?

Toe ek die eerste keer hoor hoe ons broers en susters behandel word, het ek baie kwaad geword. En ek het natuurlik begin angstig voel oor my eie toekoms. Maar ek het gedink aan die woorde in Psalm 73:26: “My liggaam en my hart mag dalk ingee, maar God is . . . die rots van my hart.” Dit was net wat ek nodig gehad het. Ek het besef dat dit nie sal help om ontsteld te raak deur te dink aan al die slegte dinge wat dalk kan gebeur nie. Die beste ding vir my is om aan te hou om my verhouding met Jehovah te versterk en om ten volle op hom te vertrou.

Anatoli Ljamo

Gebore: 1963 (Pogar, Briansk-streek)

Agtergrond: Het gewerk in konstruksie om ondergrondse spoorweë te bou

Trou met Galina in 1993. Hulle het twee kinders en twee kleinkinders

Het gesoek na die waarheid en was beïndruk met hoe logies die Bybel is. Anatoli is in 1995 gedoop, en Galina in 1997

Persoonlike kommentare

Hoe het jou geestelike familie jou ondersteun?

Ek het my geestelike broers en susters nou meer lief en waardeer hulle meer as ooit tevore. Ek kan nie in woorde beskryf hoe baie Jehovah my broers gebruik het om my te help nie. Gedurende hierdie ondersoek het ek baie uitdagings gehad, maar Jehovah het my broers en susters gebruik om na my gesin om te sien. Hulle kom ook hof toe om my te ondersteun, wat baie moed verg. En ek kry elke dag boodskappe wat sê dat hulle vir my en my gesin bid. Dit het my gemotiveer om ander te help wat deur moeilike tye gaan.

Wladimir Spiwak

Gebore: 1955 (Litin, Oekraïne)

Agtergrond: Het in die weermag gedien voordat hy een van Jehovah se Getuies geword het

Trou met Nellie in 1979. Sy het eerste die Bybel begin studeer. Hulle het in 1992 saam ’n streekbyeenkoms van Jehovah se Getuies bygewoon. Wladimir was beïndruk met wat hy gesien en gehoor het. Nellie is 1994 gedoop, en Wladimir in 1997

Persoonlike kommentare

Wat help jou om teen ontmoediging te stry?

Een van die dinge wat ek regtig baie mis, is om die kring- en streekbyeenkomste by te woon. Dit, saam met die beperkings, kan my partykeer swak en ’n bietjie mismoedig laat voel. Maar ek weet ek is nie alleen nie. Jehovah en my dierbare broers en susters is altyd daar vir my. Ek is seker dat Jehovah my altyd sal ondersteun, beskerm en help om te volhard.

Aleksandr Wasitjkin

Gebore: 1969 (Briansk, Briansk-streek)

Agtergrond: Het in die weermag gedien voordat hy een van Jehovah se Getuies geword het. Het meer onlangs as ’n tuinier gewerk

Trou met Natalija in 1993. Hulle het twee kinders

Was beïndruk met die vriendelikheid wat hy ondervind het toe hy die vergaderinge van Jehovah se Getuies bygewoon het. Het die Bybel as ’n paartjie begin studeer. Natalija is in 1994 gedoop, en Aleksandr in 1995

Persoonlike kommentare

Wat help jou om nie te veel op jou uitdagings te fokus nie?

Ek het agtergekom dat wanneer ek vir myself begin jammer voel, dit die tye is wanneer ek baie mismoedig word. In plaas daarvan om te dink aan hoekom dit met my gebeur, fokus ek op die voorreg wat ek het om ’n getuienis oor Jehovah te gee. Ek herinner myself ook daaraan dat die dinge waardeur ek nou gaan, net tydelik is. Hierdie dinge sal binnekort tot ’n einde kom. As ek getrou bly, sal ek vir ewig ’n goeie verhouding met Jehovah en my broers en susters kan geniet.

Ons weet dat enige uitdagings wat ons nou in hierdie stelsel verduur, net tydelik is wanneer dit vergelyk word met die ewige seëninge wat Jehovah in gedagte het vir sy getroue knegte. – 2 Korintiërs 4:17, 18.

Tydlyn

10 April 2020

Kriminele saak word gemaak
11 April 2020

Huise word deursoek
16 April 2020

Word onder reisbeperkings geplaas
2 Februarie 2023

Kriminele verhoor begin

Jy sal dalk ook hiervan hou

NUUSBERIGTE

In die tronk weens hulle geloof – Rusland

Jehovah se Getuies in Rusland is in die tronk weens hulle geloof. Vind uit wat hulle geskiedenis is, en kry ’n lys van al die Getuies wat tans in die tronk is.

NUUSBERIGTE