Ngɛ munyu nɛ ɔ mi ɔ

•  Ke a ke niheyo ko kɛ yiheyo ko ngɛ kpo jee ɔ mɛni e tsɔɔ?

•  Anɛ o kɛ nɔ ko ma nyɛ ma bɔni kpo jemi lo?

 Ni komɛ naa kpo nɛ niheyo ko kɛ yiheyo ko maa hi jee ɔ kaa hɛja jemi nɔ́ ko kɛkɛ. Se ngɛ munyu nɛ ɔ mi ɔ, a tsɔɔ kpo nɛ niheyo ko kɛ yiheyo ko maa je ɔ mi kaa e ji be nɛ a náa kɛ haa a sibi nɛ a kɛ hyɛɛ ke ji mɛ ni enyɔ ɔmɛ a maa sa kɛ ha gba si himi lo. Lɔ ɔ yi mi tomi ngɛ kpo nɛ niheyo ko kɛ yiheyo ko maa je ɔ he. Pi nɔ́ ko kɛkɛ nɛ a peeɔ konɛ a kɛ gbla a sibi a juɛmi kɛ ba a nɔ.

 Ke be ngɛ mi pue ɔ, e sa nɛ a mwɔ a yi mi kpɔ ke ji a maa sɛ gba si himi mi aloo a maa po a nyɛɛmi ɔ mi. Ke o kɛ nɔ ko bɔni kpo jemi ɔ, e sa nɛ o dla o he kɛ ha níhi enyɔ nɛ ɔmɛ a kpɛti eko fɛɛ eko nɛ maa ba a.

 Nɔ́ nɛ e sa kaa o kadi: Ke o susu kaa o dla o he nɛ́ o kɛ nɔ ko ma bɔni kpo jemi ɔ, e sa nɛ o hyɛ hu kaa o pee klaalo kɛ ha gba si himi mi sɛmi lo.

 Ke o kɛ nɔ ko ngɛ kpo jee ɔ, kɛ yaa kɛ yaa a, lɔ ɔ ma nyɛ ma ha nɛ nyɛɛ mwɔ nyɛ yi mi kpɔ kaa nyɛ maa sɛ gba si himi mi, lɔ ɔ e sa nɛ o susu suhi nɛ o ngɛ nɛ ma nyɛ maa ye bua nyɛ huɛ bɔmi ɔ, aloo e ma nyɛ ma puɛ nyɛ kpɛti ɔ he. Kaa nɔ hyɛmi nɔ́ ɔ, mo susu níhi nɛ nyɛɛ se nɛ ɔmɛ a he nɛ o hyɛ:

•   Bɔ nɛ o kɛ o weku ɔ hiɔ si ha. Behi fuu ɔ, bɔ nɛ o kɛ o fɔli kɛ o nyɛmimɛ hiɔ si ha, titli ɔ, ke nɔ́ ko gba o nya a, maa tsɔɔ bɔ nɛ o kɛ o he piɛɛlɔ maa hi si ha.

   Baiblo sisi tomi mlaa: “Nyɛ je ninyɛ nɛ nya wa fɛɛ ninyɛ nɛ nya wa, abofu, mi mi la, ngmlaa kpami kɛ nɔ jɛmi munyuhi, kɛ nɔ́ fɛɛ nɔ́ nɛ yeɔ nɔ awi ɔ kɛ je nyɛ he ngɔ fɔ he.”​—Efeso Bi 4:31.

   Mo bi o he ke: ‘Anɛ ye fɔli kɛ ye nyɛmimɛ ma nyɛ ma de ke i kɛ mɛ yeɔ ngɛ bumi mi lo? Ke i kɛ a kpɛti nɔ ko kpa we gbi ngɛ nɔ́ ko he ɔ, anɛ i toɔ ye tsui si nɛ i kɛ lɛ susuɔ níhi a he aloo ye mi mi fuɔ nɛ i kɛ lɛ sãa nya lo?’

•   He kɛ afɔle sami. Ke o sɛ gba si himi mi ɔ, be komɛ ɔ, e ma bi nɛ o kɛ ní komɛ nɛ o bua jɔ a he ɔ nɛ pɔ afɔle sami ha o he piɛɛlɔ ɔ.

   Baiblo sisi tomi mlaa: “Ha nɛ nɔ fɛɛ nɔ nɛ e ya nɔ nɛ e hla nɔ́ nɛ maa hi kɛ ha nɔ kpa, se pi kɛ ha lɛ nitsɛ e he.”​—1 Korinto Bi 10:24.

   Mo bi o he ke: ‘Anɛ be fɛɛ be ɔ, i suɔ kaa a pee níhi bɔ nɛ i suɔ lo? Anɛ nihi naa mi kaa i nuɔ nɔ́ sisi lo? Mɛni blɔhi a nɔ i gu kɛ tsɔɔ kaa i ngɔɔ ni kpahi a hiami níhi kɛ yeɔ kekle blɔ he?’

•   He si bami. Gba si himi he piɛɛlɔ kpakpa kplɛɛɔ e tɔmihi a nɔ nɛ e jeɔ e tsui mi kɛ kpaa a he pɛɛ.

   Baiblo sisi tomi mlaa: “Wɔ tsuo wa tɔ̃ɔ si abɔ.”​—Yakobo 3:2, sisi ningma.

   Mo bi o he ke: ‘Anɛ i kɛ oya yemi kplɛɛɔ ye tɔmi nɔ, aloo i kɛ níhi jeɔ ye nya? Anɛ ke nihi wo mi ga ngɛ nɔ́ ko nɛ e sa kaa ma pee tsakemi ngɛ he ɔ he ɔ, ye mi mi fuɔ lo?’

•   Sika he blɔ nya tomi. Sika sane ji nɔ́ kake nɛ haa nɛ gba si himi he piɛɛli sãa nya. Enɛ ɔ he ɔ, ke o kɛ sika tsuɔ ní ngɛ nile mi ɔ, e ma nyɛ maa tsi nyagba nɛ ɔ nya.

   Baiblo sisi tomi mlaa: “Nyɛ ti mɛnɔ lɛ ke e ngɛ hlae maa ma mɔ ɔ, kekleekle ɔ, e be si hie nɛ e maa bu nya nɛ e maa hyɛ kaa e ngɛ ní bɔ nɛ sa nɛ maa su nya gbemi lo?”​—Luka 14:28.

   Mo bi o he ke: ‘Anɛ ma nyɛ ma ye ye he nɔ ngɛ bɔ nɛ i kɛ sika heɔ ní ha a mi lo, aloo daa nɛ ɔ i ye hiɔ? Mɛni blɔ nɔ i gu kɛ tsɔɔ kaa ma nyɛ ma hyɛ sika nɔ saminya?’

•   Huɛ bɔmi kpakpa nɛ maa hi o kɛ Mawu nyɛ kpɛti. Ke o ji Yehowa Odasefo no ɔ, e sa nɛ o to blɔ nya nɛ o kase Baiblo ɔ daa, nɛ o ya asafo mi kpehi be fɛɛ be.

   Baiblo sisi tomi mlaa: “Nihi nɛ a le kaa a hia mumi mi níhi ɔ ngɛ bua jɔmi.”​—Mateo 5:3.

   Mo bi o he ke: ‘Anɛ i peeɔ níhi nɛ ma ha nɛ huɛ bɔmi kpakpa maa hi i kɛ Mawu wa kpɛti lo? Anɛ níhi nɛ i peeɔ konɛ huɛ bɔmi kpakpa nɛ hi i kɛ Mawu wa kpɛti ɔ he hia mi wawɛɛ, aloo i haa nɛ ní kpahi gblaa ye juɛmi kɛ jeɔ nɔ?’

 Nɔ́ nɛ e sa kaa o kadi: Nɔ nɛ o kɛ maa sɛ gba si himi mi ɔ, hia he piɛɛlɔ kpakpa. Ke o ngɛ o he mɔde bɔe konɛ o pee he piɛɛlɔ kpakpa a, lɔ ɔ ma ha nɛ nɔ nɛ lɛ hu e ngɛ e he mɔde bɔe konɛ e pee he piɛɛlɔ kpakpa a bua maa jɔ o he.