Sesent minut de goló ral toib badaʼ nigolú rasacni. ¿Xigony? Portín mod radzak buñgonaʼ né xpadaʼ sacnéni badaʼ reʼ niʼsbu né gacbu mbiox nasac. *

¿Xí rony que toib buñgosann gonladx xpadaʼyen? Guiich The Journal of Perinatal Education, mextra ni laa Jeannette Crenshaw rabexa que órni rál xiin toib buñgonaʼ, napbu toib hormona ni laa oxitocina «ndeʼ rony que buñgonaʼ gap galrronladx órni rabiʼbu, raguʼdxbu né ragachbu xpadaʼbu». Órni buñgonaʼ rony guirá ndeʼ, laidybu rareʼ stoib hormona «ni racné láabu kitbu né xiimbu» né modreʼ ronladxyibu saʼyibu. ¿Xigony nigolú rasac ndeʼ?

Órni toib buñgonaʼ radzak xiin raslooyni que Jehová ni nap galrronladx Bisaʼ buñgudxlio. * Rey David biduidybu guixquix Dios por ni goleʼbu David lainy bidzan né por ni bunybu que xinaʼ David naguʼdx láabu. Né láaca biduidybu guixquix Jehová por ni xinaʼbu cualainy láabu. Goniʼbu que Jehová gon láabu dzú golbu. Órni goninébu Dios goniʼbu ndeʼ: «Desde lainy xpidzan xinaʼya looy naclo Dios xtuni» (Salmo 22:9, 10).

BUNYSI PENSARY: Pal Dios bisaʼbu buñgonaʼ modreʼ par gan xpadaʼyen né gonladx xiin, ¿diti raslooyni que Dios láaca rioʼ galrrasaʼ por tigaagano ni nacno xiimbu la? (Hechos 17:29).

Jesucristo, ni rimbutzaay ni Bisaʼ guirá cós ni noʼ, goniʼbu ndeʼ: «¿Diti radoʼ chop manybiguin por toib nilas ni diti rasac la? Per, ni toib de layimu riab layoo sin gan Bixiosto láani. Per guitzguic guirácato láaca ma bigapni. Por ngú, diti guidzuibyto; lóoto rasacto más que xidal manybiguin» (Mateo 10:29-31).

Guxeesi buñ rabiʼ manybiguinien né máspa órni manybiguinien riab layoo, sigory buñ diti raduidy cuent. Per Bixiosno ni noʼ guibá rioʼ galrrasaʼ por tigaagayimu. Ná noʼ xidalguixo manybiguinien, diti rasacyimu más par Dios que toib buñgudxlio. Scú láani, nandxichno que Dios rioʼ galrrasaʼ por looy. Né nigolú ronladxbu looy.

 La Biblia raiby lóono:

• «Portín Jehová, bisalóbu cabiʼ guirá ni cayac ló guidopynac gudxlio par guislooybu xcalnadipbu a guirá ni rony ni nábu né guidopy galnabany» (2 CRÓNICAS 16:9).

• «Bisaló Jehová cabiʼ buñ ni rony xinésni, né guidiagbu cacadiag a buñ ni ranab xcalrracnébu» (SALMO 34:15).

• «Nigolú sioʼya nakit né sabaladxi ló xcalnadxiʼlo ni diti raché né ni diti radudy xtzú, portín looy ma bibiʼlo xiroʼ galnabann xtuni; ma gonlo galrrasaʼ ni noʼya ló» (SALMO 31:7).

¿Noʼ pu raquiin ganno que Dios rioʼ galrrasaʼ né ranbu lóono né galrronladx la? Scú. Hannah, * de Inglaterra, raniʼ:

«Xidal buelt buni pensary que Jehová diti ronladx naʼ né que diti racapybu órni raninéya láabu portín biatz fe naʼ. Buni pensary que cayony castigarbu naʼ o diti ragoʼbu cuent naʼ portín diti rasaca par láabu. Gosaca que diti rioʼbu galrrasaʼ por naʼ».

Per nigoreʼ, Hannah nandxich que Jehová ronladx né rioʼ galrrasaʼ por láabu. ¿Xigony bitzaʼbu mod góc xpensarybu? Láabu raniʼbu: «Diti bitzaʼya tisintiempsi. Ma xidzú bicadiaga toib discurs ni bisetlaa que Jesús goity por lóono, ndeʼ bidxin lainy xcalnabani né gocnéni naʼ par guiduidy cuent que Jehová nadxiʼ naʼ. Láaca biduidy cuent que nadxiʼbu naʼ portín racapybu ni ranába láabu, né por ngú xidal buelt gorudxaʼya. Láaca ni rasudi la Biblia né ni riaʼya reunión ma gocnéni naʼ guimbutzaya Jehová né ma bienna xi rasacbu por lóono. Nigoreʼ ma naana que Jehová ronladx, racné né raniiny láabu ganbu lóono».

¡Diitzreʼ nigolú racnéni lóono! Per ¿ximod labúu ganlo pal Dios rioʼ galrrasaʼ por looy né nan xí rasaclo? Ló stoib artículo cuéxano galrranabdiitz reʼ.