Mbori akparanga aboro te na ko naida ka fu maku fu aboro dunduko.

Mbori akido gu nebi nangia Abarayama ki ya, “mbiko ro i ka fu maku ti ni fu angbatunga aboro zegino dunduko.”—Bambata Pai 12:3.

Ginipai ani awirikaha? Mbori ima kpinyemu rani gbe na ko naida ka fu maku fu ngbatunga aboro dunduko—akumba, adee, gbiati agude—nga aguyo nagia sangbako.

Mbori na inapai tiko na ko nafu maku fu agu aboro namanga ome tipa ka ino ko.

Gu Mbori du na Tanduapai Dũ afu ome fu gu nebi nangia Moize tipa ko mangi iiriwoapai. Ono wa si avura du wo, Moize akparikpee ki ya: “Mo yúgu gamo agene fere awere ya mi ini ro ki ngba bangiro a.” (Gate 33:13) Rago angba ti Mbori na ga Moize kparakpee ko ki fu maku fuko tipa ko du na bakere inohe na ko rugu tiko na ga Yekova agene gbiati gako asino. Ni kpiapai, Moize awiriki gupai nga Bakusiahe nga “Mbori du adu na nunga aboro na undahe ti ko.”—Gate 34:6, 7.

Ginipai ani awirikaha? Mbori naida ka fu maku furani dunduko wadu ani nga akumba, adee, gbiati agude, ka ani mangi ome ka kaye ka ino ko wenengai. Ko nayugo wai furani rogo Ziazia Kekeapai yo si aida ani irisiko na ko nga regerege ka yugo gako inapai furani na ka fu maku furani.

Ani ima rengba ka gbia ga Mbori nyenye amaku ka ani wirikipai tipa Yesu na tipa agu apai ko amangihe na gu ko ayuguhe.

Ani ima rengba ka wirika dungu apai rogo Fugo Mbori yo tipa ga Yesu raka na gako Yugopai. Mbori afu ome fu Yesu tipa ko mangi badungu iiriwoapai, wa gu nga husa airavurari, airangbiängä, gbiati gbarĩgbarĩ aboro. Ko azingisi aboro a be kpio. Ngba gi gene re, Yesu ayugupa agu amaku Mbori nika ye na ni fu aboro dunduko kumbatayo. Ko ima sakapa wai rengbe ani nibasasa ka gbia ngbarago be agi amaku re: “Nyenye unga nga gere, nga i ini ro nga bangisa ndikidi Mbori, na gu ko mo akedi ko, nga Yesu Kristo.”—Yoane 17:3.

Yesu adu na nunga tiko, undohe gbiati weneringise. Akumba na adee, paranga aboro na sosono yo, adunguratiyo fuoko mbiko gu gako wene yambahe nga gu naya: “[Oni] wiriki pare; bambiko bayee boro nga mi nga irazerangbaduse, oni ki bi ongoda tipa mbisimoroni.” (Matayo 11:29) Yesu aadunga wa agu aboro nadu ti ragoko naamangapai na adee gbegberẽ te, ko anaamangapai na adee rogo weneringise, kikii, gbiati irisa.

Ginipai ani awirikaha? Yesu ayugu dudunguro nyemuse tipa aboro, na ko amoi bawene kpiapai tipa wai si aida ani mangipai na aboro.

Ziazia Kekeapai nayugo gupai nga “tipa rani Mbori du ho sa” na Yesu Kristo nga ga Mbori bangbasia borosunge. (1 AKorindo 8:6) Yesu aima pe gupai gbaiga nga Mbori kii tiko na Mbori du nakedi ko ku auru kpotosende no.—Yoane 11:41, 42; 14:28. *