Génesis 2:1-25
2 Zacá nga guyáʼ guibáʼ, guidxilayú ne guiráʼ ni nuu lu ca ni.*
2 Ra bizaa gadxe dxi que, biluxe Dios dxiiñaʼ stiʼ. Ne lu gadxe dxi que, biziilaʼdxiʼ Dios de guiráʼ dxiiñaʼ ni biʼniʼ.
3 Óraque guluu Dios ndaayaʼ ra bizaa gadxe dxi que ne guniʼbe maʼ guleechube ni para laabe,* purtiʼ lu dxi riʼ caziilaʼdxiʼ Dios de guiráʼ ni maʼ bizáʼ ne guiráʼ ni gudixhe ique guni.
4 Ndiʼ nga historia stiʼ guibáʼ ne guidxilayú tiempu guyáʼcani, dxi bizáʼ Jehová* Dios guibáʼ ne guidxilayú.
5 Caʼruʼ guindani yaga lu guidxilayú ne caʼruʼ guindani xcaadxi yagahuiiniʼ luni, purtiʼ caʼruʼ gusaba Jehová Dios nisaguié lu guidxilayú ne guirutiʼ caʼruʼ guni dxiiñaʼ luni.
6 Peru riasa gupa lu guidxilayú ne ruzeeni layú.
7 De raqué bizáʼ Jehová Dios hombre de yu ne bichabe bi de guendanabani xii. Ne guca hombre que ti binni nabani.*
8 Ne laaca biʼniʼ preparar Jehová Dios ti jardín lu región stiʼ Edén, ladu rindani gubidxa, ne raqué guluube hombre ni bizaʼbe que.
9 Ne biʼniʼ Jehová Dios guindani guiráʼ clase yaga sicarú lu layú ne gudiicani cuananaxhi galán para gó binni. Laaca bíʼnibe igaa ti yaga stiʼ guendanabani* galaa jardín que ne ti yaga stiʼ guendananna ni jneza ne ni cadi jneza.*
10 Ne de Edén riree ti guiiguʼ ni ruzee jardín que ne de raqué rácani tapa guiiguʼ.
11 Primé guiiguʼ que láʼ Pisón. Laani nga guiiguʼ ni rudii vuelta guidubi región stiʼ Havilá, ra nuu oro.
12 Guizáʼ galán oro ni nuu región ca. Ne laaca nuu bedelio ne ónice raqué.
13 Guiropa guiiguʼ que láʼ Guihon. Laani nga guiiguʼ ni rudii vuelta región stiʼ Cus.
14 Guionna guiiguʼ ca láʼ Hidequel.* Laani nga guiiguʼ ni ridiʼdiʼ ladu rindani gubidxa stiʼ Asiria. Ne guidapa guiiguʼ ca nga Éufrates.
15 Yanna, guluu Jehová Dios hombre ndaaniʼ jardín de Edén para gudxiibaʼ yagahuiiniʼ luni ne gapa ni.
16 Laaca bidii Jehová Dios hombre que mandatu riʼ: «Zanda goloʼ ni rudii lu guiráʼ yaga stiʼ jardín ca dede ra guidxá ndaaniluʼ.
17 Peru cadi naquiiñeʼ diʼ goloʼ ni rudii lu yaga stiʼ guendananna ni jneza ne ni cadi jneza, purtiʼ dxi lii goloʼ ni dxandíʼ peʼ zátiluʼ».
18 Óraque guníʼ Jehová Dios: «Cadi galán diʼ chuʼ hombre ca stubi. Chiguzayaʼ ti compañera ni gacané laabe ne biaʼsi peʼ para laabe».
19 Yanna, biquiiñeʼ Jehová Dios yu para guni maniʼ duxhuʼ ne maniʼ ripapa guibáʼ. Ne yenebe laacame ra nuu hombre que para gúʼyabe ximodo cuee lá cada tobi de laacame, ne cada maniʼ* biree lá modo guníʼ hombre que.
20 Ngue runi gudixhe hombre que lá ca maniʼ nadóʼ, ca maniʼ ripapa guibáʼ ne ca maniʼ duxhuʼ. Peru qué gapa diʼ hombre que ti compañera ni gacané laa, ni biaʼsi peʼ para laa.
21 Nga runi, bisisiaasiʼ Jehová Dios hombre que, ne laga nisiaasibe, gulee ti biní xcustiabe ne despué biseeguʼ beela ládibe.
22 Ne, de custiá ni gulee Jehová Dios que, bizaʼbe ti gunaa ne yenebe laa ra nuu hombre que.
23 Óraque guníʼ hombre que:
«Yanna huaxa maʼ nuu tuuxa ni naca dxita de ca dxita ladeʼne beela de beela ladeʼ.
Zaree labe Gunaa,purtiʼ de hombre nga bireebe».
24 Nga runi, zusaana hombre bixhoze ne jñaa, ne ziaanané* xheelaʼ ne zácacaʼ tobi si.*
25 Peru xieeládiruʼ hombre que ne xheelaʼ. Neca zaqué, cadi catuí lúcabe.
Nota
^ Lit. «ne interu ejércitu stícani».
^ O «ne guniʼbe sagradu ni».
^ Ndiʼ nga primé biaje riete lá Dios lu Biblia, יהוה (YHWH). Biiyaʼ apén. A4.
^ O «Tigris».
^ O «alma nabani».
^ Diidxaʼ hebreu ni biquiiñeʼ raríʼ caniʼni iguiidiʼ xiixa, casi riguiidiʼ xiixa né pegamentu.
^ O «ti binni si». Lit. «ti beela si».
