•  ¿Baʼaxten kʼaʼabéet in beetik ejercicio?

•  ¿Baʼaxten maʼ tin beetik?

•  ¿Baʼax jeʼel u yáantkeneʼ?

•  Tsʼáa u pʼiis

•  Baʼax ku yaʼalik uláakʼ paalaloʼob

 Yaan tuʼuxoʼobeʼ le táankelmoʼoboʼ maʼ suuk u beetkoʼob ejercicioiʼ, le oʼolal maas séeb u kʼojaʼantaloʼob. Baʼaleʼ le Bibliaoʼ ku yaʼalikeʼ u beetik ejercicio máakeʼ ku taasik utsil (1 Timoteo 4:8). Tukult lelaʼ:

•   Le ejerciciooʼ ku beetik a wuʼuyikaba maʼalob. Kéen u péeks u wíinklil máakeʼ ku yantal endorfinas tiʼ, lelaʼ junpʼéel baʼal yaan tu cerebro máak ku beetik u kiʼimaktal u yóol. Yaan máaxoʼob aʼalikeʼ u beetik máak ejercicioeʼ ku beetik maʼ u tsaʼayal depresión tiʼ.

   Reginaeʼ ku yaʼalik: «Wa kin jóokʼol áalkab chéen pʼel u sáastaleʼ maas maʼalob in wuʼuyikinba, yaʼab baʼaloʼob kin beetik yéetel maas kiʼimak in wóol».

•   Le ejerciciooʼ ku yáantkech utiaʼal u jatsʼutstal bix a wilaʼal. Kéen a beet ejercicioeʼ ku maas antal a muukʼ, ku jatsʼutstal a wíinklil yéetel maʼ saajkech u yaʼalaʼaltech baʼaliʼ.

   Oliviaeʼ ku yaʼalik: «Kaʼacheʼ maʼ tu páajtal mix in wutsʼik in wíinklil, bejlaʼeʼ maʼ yaj in wuʼuyik in beetkiʼ. Tsʼoʼoleʼ kiʼimak in wóol tumen ku yáantken utiaʼal maʼ in kʼojaʼantal».

•   Le ejerciciooʼ ku yáantaj utiaʼal maʼ a séeb kíimil. A beetik ejercicioeʼ ku yáantaj utiaʼal maʼ a kʼojaʼantal tiʼ a puksiʼikʼal wa a pulmón. Ku yáantaj xan utiaʼal u yáalkab maʼalob u kʼiʼikʼel máak tu venas. Le u xuʼulul u yáalkab maʼalob le kʼiʼikʼoʼ junpʼéel tiʼ le kʼojaʼaniloʼob maas ku kíimsik máakoʼ.

   Jessicaeʼ ku yaʼalik: «Wa k-jóoʼsik u tiempoil utiaʼal k-beetik ejercicioeʼ k-eʼesik tiʼ Jéeoba k-yaabiltmaj le kuxtal u tsʼaamajtoʼonoʼ».

 Baʼax k-kanik: Wa ka beetik ejercicioeʼ yaʼab utsiloʼob ken a kʼam bejlaʼeʼ bey xan tu paach kʼiin. Juntúul x-chʼúupal ku kʼaabaʼtik Tonyaeʼ, ku yaʼalik: «Mix juntéen ken a waʼal: ‹Baʼax tiaʼal ka binen in beet ejercicio›». Tsʼoʼoleʼ ku yaʼalik: «Maʼatech in arrepentir ikil in jóoʼsik u tiempoil in beetik ejercicio».

 Maʼ xaaneʼ yaʼab baʼax oʼolal:

•   Maʼ kʼaʼanaʼan in wilkiʼ. Sofíaeʼ ku yaʼalik: «Le paalaloʼoboʼ ku tuklikoʼobeʼ tuláakal baʼal jeʼel u beetkoʼobeʼ tumen yaan u muukʼoʼob. Maʼatech u tuklikoʼob wa yaan u kʼuchul u kʼiinil u kʼojaʼantaloʼob. Ku yaʼalikoʼobeʼ leloʼ chéen tiʼ chʼijaʼan máakoʼob ku yúuchul».

•   Minaʼanten tiempo. Clarissaeʼ ku yaʼalik: «Yaʼab baʼaloʼob yanen in beeteʼ, istikyaj tak in jóoʼsik tiempo utiaʼal in janal yéetel in wenel, le oʼolal minaʼanten tiempo utiaʼal in beetik ejercicio».

•   Minaʼanten taakʼin utiaʼal in bin gimnasio. Ginaeʼ ku yaʼalik: «Jach koʼoj u jóokʼol u kanáantik u wíinklil máak. Wa a kʼáat bin gimnasioeʼ yaan a boʼotik».

 Tukult lelaʼ:

 Techeʼ, ¿baʼax oʼolal maʼ ta beetik ejerciciooʼ? Kex maʼ chéen chʼaʼabileʼ wa ka beetik ejercicioeʼ jach yaan a wuʼuyikaba maʼalob.

 Koʼox ilik jujunpʼéel baʼaloʼob:

•   Chʼaʼtukult a beetik ejercicio, maʼ a páaʼtik ka aʼalaʼaktech (Gálatas 6:5).

•   Maʼ a kaxtik baʼal a waʼal utiaʼal maʼ a beetik ejercicio (Eclesiastés 11:4). U jaajileʼ maʼ tsaaj a bin gimnasioiʼ. Tukult baʼax ejercicioil wa baʼax deporteil uts ta wich yéetel beete.

•   Kʼáat tiʼ u maasil baʼax ejercicioil ku beetkoʼob (Proverbios 20:18).

•   Jóoʼs u yorail. Tukult baʼax oʼolal ken a beete. Utiaʼal maʼ a pʼatkeʼ tsʼíibt le utsiloʼob ka jóoʼsik ikil a beetik ejerciciooʼ (Proverbios 21:5).

•   Kaxt máax yéetel ken a beet ejercicio. Letiʼeʼ jeʼel u líiʼsik a wóoleʼ yéetel jeʼel u yáantkech utiaʼal maʼ u xuʼulul a beetkeʼ (Eclesiastés 4:9, 10).

•   Yaan kʼiineʼ yaan a wuʼuyik taak a xulik a beetik ejercicio, chéen baʼaleʼ maʼ a pʼatik (Proverbios 24:10).

 Le Bibliaoʼ ku yaʼalikeʼ máakeʼ unaj u «tsʼáaik u pʼiis tuláakal baʼax ku beetik» (1 Timoteo 3:2, 11). Le oʼolaleʼ kéen a beet ejercicioeʼ unaj a tsʼáaik u pʼiis. Yanoʼobeʼ jach ku píitmáanoʼob, chéen baʼaleʼ ku tuklaʼaleʼ le máakoʼob beyaʼ chéen ku tuukuloʼob tiʼ bix u yilaʼaloʼob. Juliaeʼ ku yaʼalik: «Maas jatsʼuts in wilik juntúul xiʼipal ku yeʼesik yaan u naʼat ke u muukʼ».

 Kanáantaba tiʼ le baʼaxoʼob ku yaʼalaʼal utiaʼal maʼ a xulik a beetik ejerciciooʼ. Maʼ xaaneʼ yaan kʼiineʼ jeʼel u yaʼalaʼaltecheʼ: «Kex táan a jíiltik a choocheleʼ maʼ a pʼatik». Wa ka beetik lelaʼ jeʼel u bintech kʼaasileʼ yéetel jeʼel a tuʼubsik «le baʼaloʼob maas kʼaʼanaʼantakoʼ» (Filipenses 1:10).

 Tsʼoʼoleʼ le baʼaloʼob ku yaʼalaʼaloʼ jeʼel u lúuʼsik u yóol máakeʼ. Veraeʼ ku yaʼalik: «Yaʼab x-chʼúupalaloʼobeʼ utiaʼal u taaktal u beetkoʼob ejercicioeʼ ku chaʼantikoʼob u foto le máaxoʼob jatsʼuts u wíinkliloʼoboʼ. Chéen baʼaleʼ le kéen u yiloʼob maʼ bey u wíinkliloʼoboʼ ku lúubul u yóoloʼob. Le oʼolaleʼ maas maʼalob ka u yil máak u beetik ejercicio utiaʼal u kanáantik u toj óolal, maʼ chéen utiaʼal u jatsʼutskíintik u wíinkliliʼ».