Le ka tsʼoʼok u beetik Dios le xiib yéetel le koʼoleloʼ tu tsʼoʼoksaj u beeloʼob. Dioseʼ u kʼáat kaʼach ka pʼáatkoʼob junpʼéeliliʼ familia yéetel maʼ u pʼatkubaʼob mix bikʼin (Génesis 1:27, 28; 2:18).

 Dioseʼ u kʼáat ka kiʼimakchajak u yóol le máaxoʼob tsʼokaʼan u beeloʼoboʼ (Proverbios 5:18). Le Bibliaoʼ ku taasik consejoʼob jach jeʼel u yáantik le máaxoʼob tsʼokaʼan u beeloʼoboʼ.

Teʼ xookaʼ yaan u núukaʼal le preguntaʼobaʼ:

•  ¿Bix u yilik Dios le tsʼoʼokol beeloʼ?

•  ¿Bix u yilik Dios le u pʼatkuba máak yéetel u divorciarkubaoʼ?

•  ¿Jach wa kʼaʼanaʼan u juʼunil u tsʼoʼokol u beel máak utiaʼal ka kʼaʼamak tumen Dios?

•  Según le Bibliaoʼ, ¿baʼax ku páaʼtaʼal tiʼ juntúul íichamtsil yéetel tiʼ juntúul atantsil?

•  ¿Ku obligartik wa Dios le tsʼokaʼan u beeloʼob utiaʼal ka yanak u paalaloʼoboʼ?

•  Le Bibliaoʼ, ¿jeʼel wa u tsʼáaik maʼalob consejoʼob tiʼ le tsʼokaʼan u beeloʼoboʼ?

•  Tekstoʼob ku tʼaanoʼob tiʼ le tsʼoʼokol beeloʼ

 Dioseʼ ku yaʼalikeʼ chéen unaj u tsʼoʼokol u beel juntúul xiib yéetel juntúul koʼolel (Génesis 2:24). Dioseʼ maʼ maʼalob u yilik ka yanak maas tiʼ juntúul u yatan máakiʼ, maʼ maʼalob u yilik le homosexualidadoʼ mix ka kajlak juntúul xiib yéetel juntúul koʼolel wa maʼ tsʼokaʼan u beeloʼobiʼ (1 Corintios 6:9; 1 Tesalonicenses 4:3). Jesúseʼ tu kaʼansaj tiʼ u discípuloʼobeʼ le máaxoʼob tsʼokaʼan u beeloʼoboʼ jach kʼaʼabéet u beetkoʼob baʼax ku yaʼalik Dios (Marcos 10:6-8).

 Dioseʼ ku yaʼalikeʼ le máaxoʼob tsʼokaʼan u beeloʼoboʼ maʼ unaj u pʼatkubaʼobiʼ. Le kéen tsʼoʼokok u beel juntúul xiib yéetel juntúul koʼoleleʼ tu táan Dioseʼ ku prometerkoʼob mix bikʼin ken u pʼatubaʼob, yéetel mix juntúul ken u tus u núup yéetel yaanal máak. Dioseʼ u kʼáat ka u cumplirtoʼob le promesa tu beetoʼoboʼ (Marcos 10:9).

 Yaan kʼiineʼ juntúul íichamtsil wa juntúul atantsileʼ ku kʼaʼabéettal u jáan pʼatkubaʼob tumen juntúul tiʼ letiʼobeʼ kʼaʼabéet u bin u atendert juntúul u láakʼtsil kʼojaʼan. Pero le Bibliaoʼ maʼ tu yaʼalik ka u separartuba máak kéen yanak problemas tiʼ, baʼaxeʼ ku yaʼalik tiʼ le tsʼokaʼan u beeloʼoboʼ ka u yutskíintoʼob le problemas ku yantaltiʼoboʼ (1 Corintios 7:10).

 Le Bibliaoʼ ku yaʼalikeʼ jeʼel u páajtal u divorciarkuba máakeʼ, pero chéen wa tu tusaj u núup yéetel máax maʼ u núupiʼ (Mateo 19:9). Le oʼolaleʼ wa le máaxoʼob tsʼokaʼan u beeloʼob ku chʼaʼtuklikoʼob u divorciarkubaʼob yoʼolal yaanal baʼaxeʼ mix juntúul tiʼ letiʼob ku páajtal u kaʼa tsʼoʼokol u beeloʼob (Mateo 5:32; 1 Corintios 7:11).

 Dioseʼ ku yaʼalikeʼ le máaxoʼob meyajtikoʼ unaj u beetkoʼob le baʼax ku yaʼalik le autoridadoʼob yoʼolal le tsʼoʼokol beeloʼ (Tito 3:1). Le oʼolaleʼ jach maʼalob ka yanak u acta de matrimonio le máaxoʼob ku tsʼoʼokol u beeloʼoboʼ. Beyoʼ ku yeʼeskoʼob ku respetarkoʼob baʼax ku yaʼalik le autoridadoʼoboʼ, ku yeʼeskoʼob jach importante u yilkoʼob le tsʼoʼokol beeloʼ yéetel ku yilkoʼob jeʼex u yilik Dioseʼ. a

•   Baʼax unaj u beetik tu kaʼatúulaloʼob. Le íichamtsil yéetel le atantsiloʼ unaj u paklan yaabiltikubaʼob yéetel u respetarkubaʼob (Efesios 5:33). Tiʼ tuláakal súutukileʼ unaj u yeʼeskoʼob u yaabiltmubaʼob, tak kéen núup chilakoʼob wa kéen yanaktiʼob relaciones sexuales (1 Corintios 7:3; Hebreos 13:4). Tsʼoʼoleʼ wa yaan u paalaloʼobeʼ tiʼ tu kaʼatúulaloʼob yaan u responsabilidadil u kanáantkoʼob yéetel u líiʼskoʼob tubeel (Proverbios 6:20).

   ¿Tu kaʼatúulaloʼob wa unaj u jóokʼloʼob meyaj? ¿Unaj wa u paklan áantkubaʼob yéetel le meyaj ku beetkoʼob ichil u yotochoʼoboʼ? Le Bibliaoʼ maʼ tu yaʼalik jach baʼax unaj u beetaʼal, baʼaxeʼ cada familia unaj u chʼaʼtuklik bix ken u yáantilubaʼob.

•   Baʼax ku páaʼtaʼal ka u beet le íichamtsiloʼ. Le Bibliaoʼ ku yaʼalikeʼ «le íichamtsiloʼ letiʼ u poolil u yatan» (Efesios 5:23). Como letiʼ u poolileʼ unaj u kanáantik u familia yéetel u chʼaʼik maʼalob decisiónoʼob utiaʼal u yutsil u yatan bey xan u paalal.

   Kʼaʼabéet u tsʼáaik baʼax kʼaʼabéet tiʼ u familia, u naʼatik bix u yuʼubikubaʼob yéetel u yáantkoʼob u yaabiltoʼob Dios (1 Timoteo 5:8). Kéen u chʼaʼa junpʼéel decisióneʼ ku chʼaʼik en cuenta bix u tuukul u yatan, beyoʼ ku yeʼesik u yaabiltmaj yéetel ku valorartik le meyaj ku beetkoʼ (Proverbios 31:11, 28). Le Bibliaoʼ ku yaʼalikeʼ le íichamtsiloʼ jach unaj u yeʼesik yaabilaj tiʼ tuláakal baʼax ku beetik (Colosenses 3:19).

•   Baʼax ku páaʼtaʼal ka u beet le atantsiloʼ. Le Bibliaoʼ ku yaʼalikeʼ le atantsiloʼ «unaj u jach respetartik u yíicham» (Efesios 5:33). Dioseʼ jach ku kiʼimaktal u yóol kéen u yil juntúul atantsileʼ ku respetartik u yíicham yéetel ku tsʼáaikuba yáanal u autoridad.

   Le atantsiloʼoboʼ jeʼel u páajtal u yáantik u yíichamoʼob u chʼaʼob junpʼéel maʼalob decisióneʼ beyoʼ ku yeʼeskoʼobeʼ ku respetarkoʼob le autoridad yaan tiʼ u yíichamoʼoboʼ (Génesis 2:18). Le Bibliaoʼ ku yaʼalikeʼ le atantsiloʼob ku beetkoʼob baʼax ku yaʼalik Diosoʼ jach koʼoj u tojoloʼob (Proverbios 31:10).

 Maʼatech. Úuchjeakileʼ Dioseʼ tu yaʼalaj tiʼ jujuntúul máakoʼob ka yanak u paalaloʼob, pero bejlaʼeʼ maʼ obligadoʼon k-beet beyoʼ (Génesis 1:28; 9:1). Jesúseʼ maʼ tu yaʼalaj tiʼ u discípuloʼob ka yanak u paalaloʼobiʼ, u discípuloʼob xaneʼ maʼ tu yaʼaloʼob tiʼ le máaxoʼob tsʼokaʼan u beeloʼob baʼax unaj u beetkoʼobiʼ. Le máaxoʼob tsʼokaʼan u beeloʼoboʼ letiʼob unaj u chʼaʼtuklikoʼob wa yaan u yantal u paalaloʼob wa maʼ.

 Jeʼeleʼ. Teʼ Bibliaoʼ yaʼab consejoʼob yaan jach jeʼel u yáantik le máaxoʼob tsʼokaʼan u beeloʼoboʼ. Jeʼel u yáantkoʼob utiaʼal maʼ u yantal problemas tiʼobeʼ yéetel u yutskíintikoʼob le problemas ku yantaltiʼoboʼ.

 Le Bibliaoʼ jeʼel u yáantik le tsʼokaʼan u beeloʼob utiaʼal:

•   U yaabiltikubaʼob (1 Corintios 13:4-7; Colosenses 3:14).

•   U yutskíintoʼob le problemas ku yantaltiʼoboʼ (1 Corintios 10:24).

•   U paklan chʼenxikintikubaʼob (Santiago 1:19).

•   U paklan respetarkubaʼob (Romanos 12:10).

•   U perdonarkubaʼob (1 Pedro 4:8).

•   Maʼ u tusik u núupoʼob yéetel yaanal máak (Marcos 10:9).

•   U yeʼeskoʼob paciencia (Efesios 4:2, 3).

•   U kankoʼob múul meyaj (Eclesiastés 4:9).

•   U maas yaabiltikubaʼob yéetel maʼ u pʼatkubaʼob mix bikʼin (El Cantar de los Cantares 8:7).