¿Ka pʼektaʼal wa yoʼolal a raza wa yoʼolal uláakʼ baʼal? ¿Yaan wa kʼiin maʼ tsʼaʼabtech le baʼax ta kʼáatoʼ, maʼ áantaʼabechiʼ, pʼaʼastaʼabech yoʼolal u color a wíinklil, yoʼolal bix líiʼsaʼabikech, wa tumen óotsilech? Wa beyoʼ maʼ chéen tiʼ teech uchaʼaniʼ. Way Luʼumeʼ tuláakal tuʼux bey u yúuchloʼ, baʼaleʼ teʼ kaʼanoʼ maʼ beyiʼ. Apóstol Pedroeʼ yéetel u jaajil u yóol tu yaʼalaj: «Dioseʼ mix máak jelaʼan u paktik». (Xok Baʼaxoʼob 10:34, 35.)

Le ka tu yaʼalaj Pedro lelaʼ, tiaʼan kaʼach tu yotoch Cornelio, juntúul máak maʼ judíoiʼ. Pedroeʼ juntúul judío kuxlaj teʼ kʼiinoʼob jach jelaʼan u yilaʼal le j-táanxel luʼumiloʼob tumen le judíoʼoboʼ; maʼatech u biskubaʼob tu yéeteloʼob. ¿Baʼaxten túun bin yiknal Cornelio? U jaajileʼ Jéeoba Dios beet u biniʼ. Tiʼ junpʼéel náayeʼ aʼalaʼab tiʼ Pedro: «Xuʼuluk a waʼalik éekʼtak le baʼaloʼob tsʼoʼok u limpiokíintaʼal tumen Diosoʼ». Pedroeʼ maʼ u yojel kaʼachiʼ, baʼaleʼ junpʼéel áakʼab táanil tiʼ leloʼ juntúul angeleʼ tu yaʼalaj tiʼ Cornelio ichil junpʼéel náay ka u túuxt tʼanbil Pedro (Baʼaxoʼob 10:1-15). Ka tu tsʼáaj cuenta Pedro, Jéeoba beet u yúuchul tuláakaleʼ tu séebaʼanil bin u yile.

«Tsʼoʼok in kʼuchul in naʼateʼ —ku yaʼalik Pedro— Dioseʼ mix máak jelaʼan u paktik.» (Baʼaxoʼob 10:34.) Le tʼaan ku suʼutul «mix máak jelaʼan u paktik[oʼ]» ich griegoeʼ u kʼáat u yaʼal «j-chʼaʼ ich» (The Kingdom Interlinear Translation of the Greek Scriptures). Juntúul máak jach xooknajaʼaneʼ ku yaʼalik: «[Le tʼaanaʼ] ku meyaj ken úuchuk tʼaan tiʼ juntúul juez ku yilik u yich juntúul máak utiaʼal u juzgartik, maʼ yoʼolal le baʼax uchaʼanoʼ baʼaxeʼ chéen yoʼolal bix u yilik le máakoʼ». Dioseʼ maʼ tu yéeyik máax tiʼ ken u yeʼes u yutsil. Letiʼeʼ ku kʼamik tuláakal máak jeʼel baʼaxak u razaileʼ, kex óotsil wa ayikʼal, wa kex jeʼel bixak u yilaʼaleʼ.

Baʼax ku yilik Jéeobaeʼ letiʼe puksiʼikʼaloʼ (1 Samuel 16:7; Proverbios 21:2). Pedroeʼ tu yaʼalaj xan: «Tiʼ tuláakal kaajeʼ ku kʼamik jeʼel máax u chʼaʼamaj saajkil tiʼ yéetel ku beetik baʼax utseʼ» (Baʼaxoʼob 10:35). U chʼaʼabal saajkil tiʼ Dioseʼ u kʼáat u yaʼaleʼ u yeʼesaʼal tsiikil tiʼ, u nojbeʼenkúuntaʼal, u kʼubik u yóol máak tiʼ letiʼ, yéetel u náachtal máak tiʼ baʼax kʼaas. U beetaʼal baʼax utseʼ u kʼáat u yaʼaleʼ u beetaʼal baʼax toj yéetel maʼalob tu táan Dios. Tiʼ Jéeobaeʼ jach ku lúubul utsil le máaxoʼob ku yeʼeskoʼob tsiikil tiʼ letiʼoʼ; tumen le tsiikiloʼ letiʼe baʼax péeksik máak u beet baʼax tojoʼ (Deuteronomio 10:12, 13).

Wa yaan kʼiin ka mixbaʼalkúuntaʼal wa ka pʼektaʼaleʼ yaan u líiʼsik a wóol le baʼax tu yaʼalaj Pedrooʼ. Jéeobaeʼ táan u muchʼik máakoʼob tiʼ tuláakal kaajoʼob utiaʼal u adoraroʼob jeʼex unajoʼ (Juan 6:44; Baʼaxoʼob 17:26, 27). Letiʼeʼ ku yuʼubik yéetel ku núukik u oración le máaxoʼob adorartikoʼ, kex jeʼel baʼaxak razail, luʼumil, kex óotsiloʼob wa kex ayikʼaloʼob (1 Reyes 8:41-43). Ken paakatnak Jéeoba way Luʼumeʼ chéen junpʼéeliliʼ raza ku yilik: u raza wíinik. ¿Maʼ wa tu taaktal a kanik u maasil yoʼolal le Dios mix máak jelaʼan u paktikoʼ?