Le kʼasaʼan máak ka wilik táan u tsikbal yéetel Jesús teʼ dibujoaʼ jach yaachajaʼan u yóol yoʼolal le baʼaloʼob kʼaastak u beetmoʼ. Letiʼeʼ tu kʼáat óoltaj tiʼ Jesús: «Kʼaʼajsen ken ookkech ta Reino». Jeʼex a wilik teʼ dibujoaʼ Jesuseʼ yaan baʼax táan u yaʼalik tiʼ le máakoʼ. ¿A kʼáat wa a wojéelt baʼax táan u yaʼaliktiʼ? *... Jesuseʼ táan u yaʼaliktiʼ: «Tu jaajil kin waʼaliktech bejlaʼeʼ: Yaan a wantal tin wéetel teʼ Paraísooʼ».

¿Bix a tuklik le Paraísooʼ?... Utiaʼal k-ojéeltik bixeʼ tuukulnakoʼon tiʼ le Paraíso tu beetaj Dios utiaʼal Adán yéetel Eva, le yáax wíinikoʼoboʼ. ¿Tuʼux yaan kaʼach le Paraísoeʼ? ¿Teʼ kaʼanoʼ wa way Luʼumeʼ?...

Wa ka waʼalik way Luʼumeʼ jaaj a tʼaan. Le oʼolaleʼ ken k-uʼuy u yaʼalaʼal yaan u yantal le kʼasaʼan máak «teʼ Paraísooʼ» k-ojleʼ way Luʼum kun kuxtal ken suʼutuk Paraísoiloʼ. ¿Bix túun le Paraísooʼ?... Koʼox ilik.

Le Bibliaoʼ ku yaʼalikeʼ le ka beetaʼab Adán yéetel Eva tumen Jéeobaoʼ tsʼaʼaboʼob ich junpʼéel Paraíso way Luʼumeʼ. Lelaʼ kʼaabaʼtaʼab ‹u kúuchil paakʼal Edén›. ¿Bix a tuklik ‹u kúuchil paakʼal Edén› kaʼachoʼ?... U jaajileʼ jeʼex le Paraísoaʼ tak bejlaʼa maʼ yanak uláakʼ kúuchil maas maʼalob yéetel maas jatsʼuts utiaʼal u kuxtal máakiʼ.

Techeʼ ¿bix a wilik? ¿Yaan wa u yantal Jesús way Luʼum yéetel le kʼasaʼan máak yaachaj u yóol yoʼolal u kʼebanoʼoboʼ?... Maʼ. Jesuseʼ desde teʼ kaʼan ken u gobernart le Paraíso kun antal way Luʼumaʼ. Yaan u yantal yéetel le kʼasaʼan máakoʼ tumen yaan u kaʼa kuxkíintik yéetel yaan u yilik ka u kanáant le Paraíso way Luʼumaʼ. Baʼaleʼ ¿baʼaxten  túun Jesuseʼ yaan u chaʼik u kuxtal le kʼasaʼan máak teʼ Paraísooʼ?... Koʼox ilik baʼaxten.

U jaajileʼ le máakaʼ yaan baʼaloʼob kʼaastak tu beetaj. Baʼaleʼ u millonesil máakoʼob way Luʼum tsʼoʼok u beetkoʼob xan beyoʼ. Yaʼabeʼ tu beetoʼob baʼal kʼaas tumen mix juntéen páajchaj u kaanbaloʼob tiʼ Jéeoba mix tiʼ le baʼax u kʼáat ka u beetoʼoboʼ.

Le beetkeʼ máakoʼob jeʼex leloʼobaʼ, tak le kʼasaʼan máak tsikbalnaj yéetel Jesús le táan u kíimiloʼ, yaan u kaʼa kuxkíintaʼaloʼob teʼ Paraíso way Luʼumaʼ. Ken tsʼoʼokkeʼ yaan u kaʼansaʼaltiʼob baʼax u kʼáat Dios. Beyoʼ yaan u páajtal u yeʼeskoʼob wa u yaabiltmoʼob Jéeoba.

¿A wojel wa baʼax jeʼel u beetkoʼob utiaʼal u yeʼeskoʼob leloʼ?... U kuxtaloʼob jeʼex u kʼáat Diosoʼ. ¡Bukaʼaj wal jatsʼutsil u kuxtal máak teʼ Paraíso yéetel máakoʼob u yaabiltmoʼob Jéeoba yéetel u yéet máakiloʼoboʼ!