Le yáax 60 minutos kéen tsʼoʼokok u síijil juntúul chaambaloʼ jach kʼaʼanaʼan ichil u kuxtal. ¿Baʼaxten? Tumen le bix kun tratartbil tumen u maamaoʼ yaan u yáantaj tiʼ bix ken u yuʼubiluba jeʼex u bin u nojochtaloʼ. *

¿Baʼax péeksik juntúul maamatsil u kanáant yéetel yaabilaj u paal táant u síijileʼ? Juntúul profesora ku kʼaabaʼtik Jeannette Crenshaw ku yaʼalikeʼ ken tsʼoʼokok u síijil juntúul chaambaleʼ «yaan junpʼéel baʼax péeksik le maamatsil u pakt yéetel yaabilaj u chan hijooʼ, u méekʼe yéetel u tséente». Teʼ súutuk xanoʼ le maamatsiloʼ yaan baʼax péeksik utiaʼal ka u maas bisuba yéetel ka u yaabilt u chaambal. ¿Baʼaxten kʼaʼanaʼan k-ojéeltik lelaʼ?

Le yaabilaj ku yuʼubik juntúul maamatsil yoʼolal u chaambaloʼ junpʼéel baʼax ku taal tiʼ Jéeoba, le Máax beetmiloʼonoʼ. * Le rey Davidoʼ tu tsʼáaj u graciasil tiʼ Dios úuchik u síijil yéetel u kanáantaʼal tumen u maama. Letiʼeʼ tu yaʼalaj: «Maʼiliʼ síijikeneʼ, tsʼaʼaben tu yáanal a kanan; [mientras] yanen tu jobnel in maamaeʼ techeʼ in [Diosech]» (Salmo 22:9, 10).

TUKULT LELAʼ: Jéeoba Dios tsʼáa tu tuukul le maamatsil u kanáantik yéetel u yaabiltik u chaambaloʼ, ¿máasaʼ lelaʼ ku yeʼesik u yaabiltmaj cada juntúul tiʼ toʼon? (Baʼaxoʼob [Hechos] 17:29).

Jesús, le máax jach u kʼaj óol Diosoʼ, tu yaʼalaj: «¿Maʼ wa tu koʼonol kaʼatúul mejen chʼíichʼoʼob chéen tu yoʼolal junpʼéel chan taakʼin? Kex beyoʼ, mix juntúul tiʼ letiʼob ku lúubul luʼum wa maʼ u yojéeltaʼal tumen a Taataʼex yaan teʼ kaʼanoʼ. Tsʼoʼoleʼ tak u tsoʼotsel a pooleʼexeʼ láaj xokaʼanoʼob. Le oʼolaleʼ, maʼ chʼaʼikeʼex saajkil, teʼexeʼ maas koʼoj a tojoleʼex tiʼ yaʼab mejen chʼíichʼoʼob» (Mateo 10:29-31).

Yaʼab máakeʼ maʼatech u beetik u cuentail le mejen chʼíichʼoʼob kuxaʼanoʼoboʼ, le oʼolal menos u beetkoʼob u cuentail le kimenoʼoboʼ. Chéen baʼaleʼ Jéeobaeʼ jach ku chʼaʼik en cuenta cada juntúul tiʼ letiʼob. Kex yaʼab mejen chʼíichʼoʼob yaneʼ, tu táan Dioseʼ maas koʼoj u tojol u kuxtal wíinik. Lelaʼ ku  yeʼesikeʼ letiʼeʼ ku yilik baʼaxoʼob k-beetik yéetel jach u yaabiltmoʼon.

Le Bibliaoʼ ku kaʼansik:

• «Yuumtsileʼ tuláakal tuʼux ku yantal táan u kanáantik le utsoʼoboʼ bey le kʼasaʼanoʼoboʼ.» (PROVERBIOS 15:3.)

• «Yuumtsileʼ u tsʼaamaj u paakat yóokʼol le utsil máakoʼoboʼ yéetel ku chʼenxikintik u yawatoʼob.» (SALMO 34:15.)

• «A yaakunajeʼ ku taasik teen kiʼ óolal yéetel kiʼimak óolal. Techeʼ tsʼoʼok a wilik in okʼom óolaloʼob, a kʼaj óol in muʼyajoʼob.» (SALMO 31:7.)

¿Ku taasik wa utsil u yojéeltik máak ku kanáantaʼal yéetel yaabiltaʼan tumen Dios? Ku taasik. Hannah, kajaʼan Inglaterraeʼ, * ku yaʼalik:

«Yaʼab u téenel tin tuklaj maʼ u yaabiltmen Diosiʼ, maʼ tu núukik kaʼach in oración tumen minaʼanten fe. Kin tuklik kaʼacheʼ táan u castigarken yéetel chéen ku yilik baʼax ku yúuchulten tumen mix baʼalen tu táan.»

Chéen baʼaleʼ letiʼeʼ tu kʼexaj bix u tuukul, bejlaʼeʼ ku yuʼubik yaabiltaʼan yéetel ku kanáantaʼal tumen Dios. ¿Baʼax áant u kʼex u tuukul? Letiʼeʼ ku yaʼalik: «Jujunpʼíitil úuchik in kʼexik in tuukul. Juntéenjeakeʼ tin wuʼuyaj u tsoʼolol yéetel le Biblia le baʼax anchaj u beetik Jesús utiaʼal u salvartikoʼonoʼ, leloʼ tu yáanten in wil yaabiltaʼanen tumen Jéeoba. Kéen in wil bix u núukik in oracioneʼ yaʼab u téeneleʼ kin wokʼol tumen kin tsʼáaik cuenta u yaabiltmen. In xokik le Biblia yéetel le in bin in wuʼuy u tsoʼolol teʼ najil Reinooʼ tu yáanten in maas kʼaj óolt Jéeoba yéetel in wojéelt baʼax ku yuʼubik tin woʼolal. Bejlaʼeʼ in wojel Jéeobaeʼ u yaabiltmoʼon yéetel u kʼáat u kanáantoʼon».

¡Jach túun jatsʼuts baʼax ku yaʼalik Hannah! ¿Bix jeʼel a wojéeltik wa u yaabiltmech Dios yéetel ku chʼaʼik en cuenta bix a wuʼuyikabaeʼ? Le xook ku segueroʼ yaan u tʼaan tiʼ leloʼ.