Dioseʼ jach jatsʼuts bix u beetmil u wíinklil máak tumen u tsʼaamaj u páajtalil u tsʼakikuba tu juunal. Jeʼex juntúul máak kéen u xotuba, kéen u lomuba wa kéen úuchuk uláakʼ wa baʼax tiʼeʼ, u wíinklileʼ tu séebaʼanil ku káajal u tsʼakikuba. Yéetel ku káajal u beetik u xuʼulul u tuul le kʼiʼikʼ utiaʼal u tsutsik le yajiloʼ.

TUKULT LELAʼ: Wa Dios u tsʼaamaj u páajtalil tiʼ le wíinklil utiaʼal u tsʼakikuba tu juunaloʼ, ¿máasaʼ jeʼel xan u yáantkoʼon yéetel le baʼaxoʼob chiʼichnakkúuntikoʼonoʼ? Juntúul salmista jach ku confiar tiʼ Dioseʼ tu yaʼalaj: «Letiʼ tsʼakik máaxoʼob kʼilaʼan u puksiʼikʼaloʼob[,] ku toʼik xan u yajiloʼob» (Salmo 147:3). Wa yaan baʼaxoʼob beetik u yaatal a wóoleʼ, ¿baʼaxten jeʼel u béeytal a creertik Dioseʼ yaan ‹u toʼik xan a yajiloʼob› teʼ kʼiinoʼobaʼ bey xan le ku taaloʼoboʼ?

Dioseʼ ku yaʼalik: «Maʼ a chʼaʼik saajkil, tumen teneʼ tiʼ yanen ta wéeteleʼ; maʼ u péek a wóol[,] tumen teneʼ a [Diosen]. Teen tsʼáaik a muukʼ, teen áantkech» (Isaías 41:10). K-ojéeltik Jéeoba u yaabiltmoʼoneʼ ku beetik k-uʼuyikba tubeel yéetel ku yáantkoʼon k-aktáant le problemaʼob yaan ichil k-kuxtaloʼ. Le apóstol Pablooʼ tu yaʼaleʼ Dioseʼ jeʼel u tsʼáaiktoʼon le jeetsʼelil «ku táatsʼmáansik tuláakal tuukuloʼob[oʼ]». Tsʼoʼoleʼ tu yaʼalaj xan: «Yaanten u muukʼil utiaʼal in beetik tuláakal baʼal, tu yoʼolal le Máax tsʼáaikten u páajtalil in beetkoʼ» (Filiposiloʼob 4:4-7, 9, 13).

Le Bibliaoʼ ku beetik u maas nojochtal k-fe tiʼ le baʼaxoʼob ku yaʼalik u beetik Jéeoba tu yoʼolal tuláakal máakoʼ. Apocalipsis wa Revelación 21:4 yéetel 5, ku yaʼalik baʼax ken u beet Dios yéetel baʼaxten jeʼel u béeytal k-confiar tiʼ letiʼeʼ:

• «Letiʼeʼ yaan xan u choʼik tuláakal u jaʼil u yichoʼob». Jéeobaeʼ yaan u láaj luʼsik le baʼaxoʼob chiʼichnakkúuntikoʼon yéetel ku beetkoʼob k-muʼyaj teʼ kʼiinoʼobaʼ, kex jeʼel bukaʼaj u nojchil le baʼax k-muʼyajtikoʼ.

• «Le Máax kulukbal teʼ trono[oʼ]» Jéeoba, letiʼeʼ minaʼan u xuul u páajtalil le oʼolal jeʼel u yáantkoʼon utiaʼal maʼ k-muʼyaj tu kaʼatéen yéetel maʼ ken u pʼatoʼon t-juunal kéen kʼaʼabéetchajak.

• Jéeobaeʼ ku yaʼalikeʼ «le tʼaanoʼobaʼ jaajtak yéetel jach yaan u béeytaloʼob». Utiaʼal maʼ u pʼáatal kʼaasil u kʼaabaʼeʼ, letiʼeʼ yaan u láaj béeykuntik baʼax u yaʼalmaj.

«Letiʼeʼ yaan xan u choʼik tuláakal u jaʼil u yichoʼob, maʼ tun yantal kíimil, mix okʼol, mix yaj óolal, mix kʼiʼinamil. Le baʼaxoʼob yanoʼob kaʼachoʼ tsʼoʼok u máanoʼob. Le Máax kulukbal teʼ trono xanoʼ, tu yaʼalaj: ‹¡Ile!, yaan in túumbenkuntik tuláakal baʼal›. Ku yaʼalik xan: ‹Tsʼíibte, tumen le tʼaanoʼobaʼ jaajtak yéetel jach yaan u béeytaloʼob.›» (Apocalipsis 21:4, 5.)

Le Biblia bey xan le baʼaxoʼob u beetmoʼ ku yáantkoʼon k-kʼaj óolt Dios tubeel bey xan u jatsʼuts modos. Le Bibliaoʼ ku tsʼáaiktoʼon junpʼéel jatsʼuts invitación: «Natsʼabaʼex tiʼ Dios, letiʼ túuneʼ bíin u natsʼuba tiʼ teʼex» (Santiago 4:8). Baʼaxoʼob wa Hechos 17:27, ku yaʼalik xan: «Letiʼeʼ maʼ náach yanil tiʼ cada juntúul tiʼ toʼoneʼexiʼ».

Jeʼex u bin a maas kʼaj óoltik Dioseʼ yaan a tsʼáaik cuenta letiʼeʼ jach tu jaajil taak u yáantkech (1 Pedro 5:7). ¿Baʼax utsil ku taasik k-confiar tiʼ Jéeoba?

Koʼox ilik baʼax úuch yéetel Toru, kajaʼan Japón. Kex u maama tu kaʼansaj tiʼ yoʼolal Dioseʼ, baʼaleʼ ka nojochchajeʼ tu yoksuba yéetel le yakuzaʼoboʼ, letiʼobeʼ máakoʼob jach kʼaas bix u kuxtaloʼob. Letiʼeʼ ku yaʼalik: «Teneʼ kin tuklik kaʼacheʼ Dioseʼ u pʼekmen le oʼolal ku castigarken kéen u beet u kíimil wa máax in yaabiltmaj». Torueʼ ku yaʼalikeʼ kʼaschaj bix u kuxtal yoʼolal le baʼaxoʼob úuch tiʼoʼ bey xan úuchik u biskuba yéetel kʼasaʼan máakoʼob. Yoʼolal le baʼaxoʼob ku tsʼíiboltik kaʼach u beetkoʼ, letiʼeʼ ku yaʼalik: «Kex paaleneʼ maʼ saajken kíimiliʼ yéetel taak kaʼach in kíimsik juntúul máak famoso utiaʼal ka kʼaʼajsaʼaken yoʼolal le baʼax ken in beetoʼ».

 Baʼaleʼ ka máan kʼiineʼ Toru yéetel Hannah, u yataneʼ, káaj u xokikoʼob le Bibliaoʼ, lelaʼ le áantoʼob utiaʼal ka u kʼex bix u kuxtaloʼob. Hannah ku yaʼalik: «Jach maʼ tin tuklaj wa yaan u kʼexik u kuxtaliʼ». Torueʼ ku yaʼalik: «Jach tu jaajil yaan Dios yéetel jach u yaabiltmoʼon. Letiʼeʼ maʼ u kʼáat ka kíimik mix máakiʼ yéetel jeʼel u perdonartik máaxoʼob ku pʼatkoʼob le baʼax kʼaas ku beetkoʼoboʼ. Jeʼel u béeytal k-aʼaliktiʼ jach bix k-uʼuyikba yéetel yaan u naʼatkoʼon. Maʼ kun xáantaleʼ Jéeobaeʼ yaan u xuʼulsik le problemaʼob yéetel le muʼyajil yaan teʼ kʼiinoʼobaʼ. Desde bejlaʼeʼ ku yáantkoʼon, u yaabiltmoʼon yéetel ku líiʼsik k-óol» (Salmo 136:23).

Le baʼax úuch tiʼ Toruoʼ ku yeʼesikeʼ Dioseʼ maʼ kun xáantal kéen u luʼs le baʼaxoʼob beetik u yaatal k-óoloʼ. Tsʼoʼoleʼ bejlaʼeʼ jeʼel u yáantkoʼon utiaʼal ka kuxlakoʼon ich kiʼimak óolaleʼ. Kex yaʼab baʼaxoʼob beetik k-muʼyajeʼ, Dioseʼ u yaabiltmoʼon yéetel u kʼáat u yáantoʼon.