Ana Malayika Gali Ŵani?
Yajikusasala Baibulo
Malayika gali yakupanganyikwa yayikwete machili mnope soni gakusatenda yindu kupunda ŵandu. (2 Petulo 2:11) Malayikaga gakusatama kwinani, kumalo kwele kukusatama yakupanganyikwa yausimu, kwakuli kwakutalika mnope kupunda kwampaka tukulole ni meso. (1 Ayimwene 8:27; Yohane 6:38) Ali ni ligongo lyakwe malayikaga gakusakolanjikwasoni kuti misimu.—1 Ayimwene 22:21; Salimo 18:10.
Ana malayika gatyochele kwapi?
Mlungu ŵapanganyisye malayika pakamulichisya masengo Yesu jwele Baibulo jukusamkolanga kuti “jwandanda kupagwa jwa yakupanganyikwa yosope.” Pakulondesya mwele Mlungu ŵakamulichisye masengo Yesu pakupanganya yindu, Baibulo jikusati: “Ligongo kupitila mwa jwalakwejo [Yesu] yindu yine yosope yapanganyidwe yakwinani soni ya pachilambo chapasi, yindu yakuwoneka soni yangawoneka,” kupwatikapo malayika. (Akolose 1:13-17) Malayika gangalombela kapena kuŵelekana. (Maliko 12:25) Mmalo mwakwe, jwalijose jwa “ŵanache jwa Mlungu jwakuwona” ŵeleŵa ŵapanganyidwe mwapajikapajika.—Yobu 1:6 NWT.
Malayika gapanganyidwe kalakala mnope, chilambo chapasichi mkanichipanganyidwe. Mlungu ali apanganyisye chilambochi, malayika “gatandite kugumila ni chisangalalo.”—Yobu 38:4-7 NWT).
Ana malayika gapali galingwa?
Baibulo jangasala chiŵalanjilo chisyesyene cha malayika, nambo jikusalosya kuti gapali gejinji kwabasi. Mwachisyasyo, mmesomkulola ndumetume Yohane ŵagaweni mamiliyoni gejinji ga malayika.—Chiwunukuko 5:11.
Ana malayika gakwete mena nambosoni ndamo syakulekanganalekangana?
Elo. Baibulo jikusasala mena gaŵili ga malayika: Mikaele ni Gabuliyele. (Daniele 12:1; Luka 1:26) a Malayika ganesoni gajitichisye kuti gakwete mena nambo nganasaka kugakolanga.—Genesesi 32:29; Ŵakulamula 13:17, 18.
Malayika gali gakulekangalekangana soni gakusakombola kuŵechetana. (1 Akolinto 13:1) Gakusakombolasoni kuganisya nambosoni kupanganya maloŵe gakumlumba Mlungu. (Luka 2:13, 14) Soni gakwete ufulu wakombola kusagula chachili chambone soni chakusakala, mpela muyaŵelele pele malayika gane galeŵile ni kumjimuchila Mlungu yimpepe ni Satana.—Mateyu 25:41; 2 Petulo 2:4).
Ana pana magulu gakulekanganalekangana ga malayika?
Elo. Mikaele, jwali jamkulungwa jwa malayika, ni jwakwete ulamusi nambosoni machili gejinji. (Yuda 9; Chiwunukuko 12:7) Aselafi gali malayika gapenani mnope gagakusatama mwakuŵandikana ni chitengu chauchimwene cha Yehofa. (Yesaya 6:2, 6) Akelubi lili gulu jinesoni ja malayika gapenani gagakusakamula masengo gapadela. Mwachisyasyo, akelubi ni ŵaŵalondelaga mlango wakwinjilila mumgunda wa Edeni pandaŵi jele Adamu ni Hawa ŵatopoledwe mumgundawo.—Genesesi 3:23, 24.
Ana malayika gakusakamuchisya ŵandu?
Elo, Mlungu akusakamulichisya masengo malayika gakwe gakulupichika pakwakamuchisya ŵandu masiku agano.
Mlungu akusakamulichisya masengo malayika pakwalongolela atumiki ŵakwe pa masengo gakulalichila ngani syambone sya Uchimwene wa Mlungu. (Chiwunukuko 14:6, 7) Yeleyi yikusakamuchisya ŵandu ŵakulalichilawo nambosoni ŵakupikanila ngani syambonewo.—Masengo 8:26, 27.
Malayika gakusakamuchisya kuti mpingo wa Chiklistu uŵe wangasakasidwa ni ŵandu ŵakusakala.—Mateyu 13:49.
Malayika gakusalongolela nambosoni kwakamuchisya ŵandu ŵali ŵakulupichika kwa Mlungu.—Salimo 34:7; 91:10, 11; Ahebeli 1:7, 14.
Pachangakaŵapa, malayika gachiputa ngondo yalumo ni Yesu pakwatyosya ŵandu wosope ŵakusakala soni yeleyi yichikamuchisya kuti ŵandu chasangalaleje.—2 Atesalonika 1:6-8.
Ana mundu jwalijose jukwete lilayika lyalikusamkamuchisya?
Atamose kuti malayika gakusatenda chidwi ni yindu yausimu yele ŵakutumichila ŵa Mlungu akusatenda, yeleyi ngayikugopolela kuti Mlungu akusapeleka lilayika kwa Mklistu jwalijose ni chakulinga chakuti amkamuchisyeje. b (Mateyu 18:10) Malayika ngagakusateteya ŵakutumichila ŵa Mlungu ku yakusawusya kapena yakulingwa yosope. Baibulo jikusalosya kuti ndaŵi syejinji Mlungu ‘akusatupatila litala lyakutukamuchisya kupilila’ yakulingwa pakumpa mundu lunda nambosoni machili.—1 Akolinto 10:12, 13; Yakobo 1:2-5).
Nganisyo syakulemwecheka syakwamba malayika
Nganisyo syakulemwecheka: Malayika gosope gali gambone.
Yisyesyene yakwe: Baibulo jikusasala ya “magulu ga misimu jakusakala” soni “malayika gagalemwisye.” (Aefeso 6:12; 2 Petulo 2:4) Malayika gakusakalaga yili yiwanda yele yaliji kumbali ja Satana ni kumjimuchila Mlungu.
Nganisyo syakulemwecheka: Malayika gangawa.
Yisyesyene yakwe: Malayika gakusakala, kupwatikapo Satana, chachijonanjidwa.—Yuda 6.
Nganisyo syakulemwecheka: Ŵandu pawile akusasyuka malayika.
Yisyesyene yakwe: Malayika gali yakupanganyikwa yapadela ya Mlungu, ngaŵa ŵandu ŵawile kaneko kwimusidwa. (Akolose 1:16) Ŵandu ŵajimusidwe kuti akaŵe ni umi kwinani, Mlungu akusiŵapa mboto ja umi wangawa. (1 Akolinto 15:53, 54) Jemanjaji chachikola malo gapenani kupunda malayika.—1 Akolinto 6:3.
Nganisyo syakulemwecheka: Malayika gapanganyidwe kuti gatumichileje ŵandu.
Yisyesyene yakwe: Malayika gakusakuya malamusi ga Mlungu, ngaŵaga getu. (Salimo 103:20, 21) Atamose Yesu pandaŵi jine jwaŵechete kuti akakombwele kuŵenda chikamuchisyo kwa Mlungu, ngaŵaga malayika.—Mateyu 26:53.
Nganisyo syakulemwecheka: Mpaka tukombole kupopela kwa malayika kuti atukamuchisye.
Yisyesyene yakwe: Kupopela jili mbali ja kulambila kwetu, mwamti tukusosekwa kulambila kwa Yehofa Mlungu basi. (Chiwunukuko 19:10) Tukusosekwa kupopela kwa Mlungupe, kupitila mwa Yesu.—Yohane 14:6.
a Pa Yesaya 14:12, ma Baibulo gane akusakamulichisya masengo maloŵe gakuti “Lusifala” gele ŵandu ŵane akusati lili lina lya lilayika lyele kaneko jwaliji Satana. Nambope, maloŵe ga Chihebeli gandanda gele ŵagakamulichisye masengo palilembali gakusagopolela “jwakunyesimila.” Nganiji ngajikulosya kuti maloŵega gakusala ya Satana, nambo gakusala ya msela wa mamwenye ga Babulo, gele Mlungu ŵaliji mkugatendekasya sooni ligongo lyakupoka kwawo. (Yesaya 14:4, 13-20) Maloŵe gakuti “jwakunyesimilamwe” ŵagakamulichisye masengo pandaŵi jele mamwenye ga Babulo gatyosyedwe paudindo, pakulosya kuti galiji gakuloŵela.
b Ŵandu ŵane akusaganisya kuti ngani jakulondesya ya kukopoka mundende kwa Petulo jikugopolela kuti jwalakwe jwakwete lilayika lyalyalyamteteyaga. (Masengo 12:6-16) Nambope, ŵakulijiganyawo paŵaŵechete kuti “lilayika [lya Petulo],” komboleka kuti ŵaganisisye mwakulemwecheka kuti lilayika lyele lyaliji mtenga jwakwimila Petulo ayiche, ngaŵaga Petulo jusyesyenejo.
You May Also Like
KWANGA KWA YIWUSYO YA M’BAIBULO
Ana Mikaele Jwamkulungwa jwa Malayika Ali Ŵani?
Jwalakwe akwetesoni lina line lyatukusalimanyilila chenene.
SANJA JA MLONDA
Ana Jwalijose Akwete Lilayika Lyalikusamkamucisya?
Ana wawojo akusaganisya kuti lilayika, kapena malayika mpaka gacenjele?
YAJIKUSAJIGANYA BAIBULO
Atande Kulijiganya Baibulo
Atande kulijiganya Baibulo mwakambilana soni mwalulele ni mundu jwine.