Mlungu ŵacipanganyisye cilu cetu mwakusimonjesya kuti cikomboleje kola macili gakuliposya. Ŵacipatala ca Johns Hopkins ŵasasile kuti, “Patulikatile, cilu cetu cikusatenda yindu yakamucisya kuti liŵangalyo lipole kanga lili lyekulungwa kapena lyamwana.” Nambosoni mwacitema, cilu cikusakamucisya kuti miyasi jikakopokaga paliŵangalyo soni kuti pawujile mwacitema.

AGANICISYE AYI: Naga Mkupanganya jwetu ŵapanganyisye cilu cetu m’litala lyakuti cikomboleje kuliposya, ana jwalakwe nganaŵa atukamucisyesoni patukulagasika nganisyo? Jwamalumbo jwalembile kuti, ‘Jwalakwe akusaposya ŵandu ŵamtima wekasice, soni akusataŵa maŵanga gawo.’ (Masalimo 147:3) Naga akulagasika nganisyo, ana mpaka asimicisye camtuli kuti Yehofa mpaka ataŵe maŵanga gawo apano, soni msogolo?

Mlungu akusatusalila kuti, “Mkasimjogopa, pakuŵa une ndili ni mmwe. Mkasimdandawula, pakuŵa une ndili Mlungu jwenu. Cinamlimbikasye. Yisyene cinamkamucisye.” (Yesaya 41:10) Mundu jwakusamanyilila kuti Yehofa akusasamala ya jwalakwe, akusakola mtendele wamumtima soni akusaŵa jwakulimba pakusimana ni yakulingwa yejinji. Ndumetume Paulo, jwasasile kuti mtendele wamumtima uli “mtendele wa Mlungu wawukusapunda kuganisya mwakusokoka kulikose.” Jwalakwe jwajonjecesye kuti, “Mu yindu yosope, ngusapataga macili kutyocela kwa jwele jwakusamba macili.”—Afilipi 4:4-7, 9, 13.

Malemba gakusatukamucisya kulimbisya cikulupi pa yilanga ya Yehofa pakwamba ya sogolo ja ŵandu. Mwambone, lilemba lya Ciwunukuko 21:4, 5 (lilembali likusimanikwa pa peji jakuyicisya) likusatusalila yacacitenda Mlungu soni ligongo lyakwe mpaka tumkulupilile kuti caciyikwanilisya:

• “Jwalakwe cacipukuta misosi” josope mmeso mwawo. Yehofa cacimasya yipwetesi yosope soni kulagasika nganisyo atamose yakusawusya yampaka ŵane ayiwone kuŵa yangali mate.

• “Jwatemi pacitengu ca ucimwene” kwinani, Mwenye Jwamaciligose jwa yakupanganyikwa yosope, cacikamulicisya masengo macili soni ukumu wakwe pakumasya yipwetesi soni kutupa cikamucisyo catukusosecela.

• Yehofa akusatusimicisya kuti maloŵe gakwe gali “gakulupicika soni gakuwona.” Yaŵele ali mkutenda munyumamu mwakamulana ni lina lyakwe, yikusatusimicisya kuti jwalakwe cacikwanilisya maloŵe gakwe.

“‘Jwalakwe cacipukuta misosi josope mmeso mwawo, soni ciwa ngasicipagwasoni. Ngasipapagwasoni kulila, kuwuwula kapena kupikana kupweteka. Yindu yakala yiciŵa yimasile.’ Nambosoni jwatemi pacitengu ca ucimwene jwatite, ‘Mlole! ngupanganya yindu yosope kuŵa yasambano.’ Jwasasilesoni kuti, ‘Mlembe, pakuŵa maloŵega gali gakulupicika soni gakuwona.’”—Ciwunukuko 21:4,  5.

Yakupanganyikwa yakwinani soni pacilambo capasi nambosoni Baibulo yikusalosya ndamo sya Atati ŵetu ŵakwinani. Atamose kuti yakupanganyikwa yikusatukamucisya kuti tummanyilile Mlungu soni kuŵa najo paunasi, nambope Baibulo jikusasala mwangapita mumbali kuti, “Amŵandicile Mlungu, soni jwalakwe cacaŵandicila.” (Yakobo 4:8) Nambosoni pa Masengo 17:27 pakusati, “Jwalakwe nganaŵa kutali ni jwalijose jwetuwe.”

Pakwendelecela kulijiganya kuti ammanyilile Mlungu ni pacaciyika pakusimicisya kuti “jwalakwe akusiŵaganicisyaga.” (1 Petulo 5:7) Ana ni yindu yambone yapi yampaka yipagwe ligongo lya kumkulupilila Yehofa camti m’yiyi?

Aganicisye yayamtendecele Toru jwakusatama ku Japan. Jwalakwe jwaleledwe ni mamagwe ŵaŵaliji ŵaciklistu. Nambope kaneko jwajinjile nawo m’kakuga ka ŵandu ŵakutenda yaciwawa ka ku yakuza m’cilambo ca Japan. Jwalakwe jwatite, “Nakulupililaga kuti Mlungu akusambenga soni kuti ciwa ca ŵacinasi ŵangu mnopemnope ŵananonyelaga, caliji cilango cangu basi.” Toru jwasasile kuti ligongo lyakulipikana camti myoyo, natandite kutenda yindu “mwangalwe soni mwangali canasa.” Ana yakuyicisya ya ndamo jakweji yaliji yamtuli? Jwalakwe jwatite, “Pakusaka kuti mbe jwakumanyika, ngawulajidwe ndili mwanace ligongo lya kum’wulaga mundu jwine jwakumanyika mnope.”

 Nambope Toru paŵatandite kulijiganya Baibulo yalumo ni ŵamkwakwe lina lyakwe Hannah, jwacenjile mnope umi wakwe soni muŵayiwonelaga yindu. Hannah jwasasile kuti, “Nayiweni kuti ŵamkwangu acenjile yisyesyene.” Apano Toru akusasala mwakusimicisya kuti, “Pana Mlungu jusyesyene jwakusasamala ya jwalijose jwetuwe. Jwalakwe ngakusaka kuti jwalijose ajase umi wakwe, nambo ali jwakusacilila kwakululucila yakulemwa ŵandu ŵapitikwice yisyesyene. Jwalakwe akusapikanila yiliyose yatukusamsalila yanganituŵa tukombwele kwasalila ŵane soni yakuti ŵane nganaŵa ayipikanicisye. Pacangakaŵapa, Yehofa catyosye yakusawusya yosope mpela yipwetesi soni kulagasika nganisyo. Atamose apano jwalakwe akusatukamucisya m’matala gakuti nganitujembeceyaga. Jwalakwe akusatunonyela soni kutukamucisya atamose kuti tuli ŵakutuluka.”—Masalimo 136:23.

Mwakamulana ni yayamtendecele Toru, kumanyilila kuti Mlungu catyosye yipwetesi yosope pacangakaŵapa, soni kutupukuta misosi ngaŵa kuti kukusagamba kutupa cembeceyo ca msogolope nambo kukusatukamucisyasoni kola umi wambone apanopano. Cinonyelo ca Mlungu mpaka citukamucisye atamose kuti cilamboci cigumbele ni yipwetesi.