“Wawo Yehofa, ana cinjililila cikamucisyo cawo mpaka cakaci wawo ngambikanila? Ana cinjiŵenda cikamucisyo cawo mpaka cakaci wawo ngatendapo kandu?” (Habakuku 1:2, 3) Maloŵe gelega jwaŵecete Habakuku mundu juŵatendaga yindu yakumsangalasya Mlungu. Ana yaŵaŵeceteyi yikulosya kuti nganakola cikulupi? Iyayi, ligongo Mlungu ŵamsimicisye Habakuku kuti camasye yipwetesi yosope pandaŵi jakwe.—Habakuku 2:2, 3.

Naga wawojo kapena mjawo akusimana ni yipwetesi yili yangasawusya kusala kuti Mlungu akucelewa kutendapo kandu. Kusala yisyene, Baibulo jikusatusimicisya kuti, “Yehofa ngakucelewa kukwanilisya yilanga yakwe mpela mwakusaŵecetela ŵandu ŵane, nambo ali jwakuwusimana mtima ni m’weji ligongo ngakusaka kuti jwalijose ajonasice nambo ŵandu wosope apitikuce mtima.”—2 Petulo 3:9.

Yipwetesi ciyimale pacangakaŵapa. Yesu jwasasile kuti mpago wine ucilola yakutendekwa yakulekanganalekangana yakulosya kuti tuli m’masiku gambesi ga “ndaŵi ajino.” (Mateyu 24:3-42) Kwanilicikwa kwa maloŵe gaŵaŵecete Yesuga kukulosya kuti Mlungu camasye yipwetesi yakusimana nayo ŵandu pacangakaŵapa. *

Nambo ana Mlungu cacimasya camtuli yipwetesi yosopeyi? Yesu paŵaliji pacilambo capasi ŵalosisye macili ga Mlungu gakumasya yipwetesi ya ŵandu. Kwende tulole yindu yine yaŵatesile.

Ngosi sya M’cipago. Yesu ni ŵandumetume ŵakwe paŵaliji pa nyasa ja Galileya, catesile cimbungo cacasigele panandi kutiŵisya liboti lyawo. Nambope Yesu ŵalosisye kuti jwalakwe ni Atatigwe mpaka amasye ngosi sya m’cipago. (Akolose 1:15, 16) Yesu jwagambile kuŵeceta kuti, “Mjile jii! Mtende bata!” Ana yakuyicisya yakwe yaliji yamtuli? “Kaneko cimbungoco catondweŵe mwamti panyasapo patesile bata.”—Maliko 4:35-39.

Yilwele. Yesu jwamanyice ligongo lyakusacilila kwaposya ŵandu ŵangalola, ŵalemale, ŵaulwele wakugwa, ŵamatana nambosoni yilwele yine ya mtundu wuliwose. “Jwalakwe ŵaposisye ŵandu wosope ŵaŵalagaga ni yilwele.”—Mateyu 4:23, 24; 8:16; 11:2-5.

Sala. Yesu ŵakamulicisye masengo macili gaŵampele Atatigwe pakutupiya yakulya yamnono. Baibulo jikusasala kuti kaŵilikose, jwalakwe jwalisisye ŵandu ŵajinji.—Mateyu 14:14-21; 15:32-38.

Ciwa. Yayalembedwe pakwamba yaŵatesile Yesu pakwimusya ŵandu ŵatatu ŵaŵawile, yikulosya cenene kuti Yehofa akwete macili gakumasya ciwa. Mundu jumo mwa ŵandu ŵeleŵa, ŵamjimwisye pali pamasile masiku mcece.—Maliko 5:35-42; Luka 7:11-16; Yohane 11:3-44.