YAJIKUSASALA BAIBULO
Angels
M’mabuku, yakusepasepa ni yakupetapeta, nambosoni mafidiyo, gakusalosya yiwulili ya malayika. Ana malayika gali ŵani, soni gakusatenda cici?
Ana malayika gali ŵani?
YAJIKUSASALA BAIBULO
Mlungu mkanapanganye cilambo cosope soni ŵandu jwapanganyisye yakupanganyikwa yapenani, yamacili, nambosoni yalunda mnope kwapunda ŵandu. Yakupanganyikwayi yikusatama ni Mlungu kwinani. M’weji ngaŵa mkwawula kwinani kweleku kapena kukuwona ni meso getu. (Yobu 38:4, 7) Baibulo jikusasala kuti yakupanganyikwa yeleyi yili ‘yausimu’ kapena kuti “malayika.”—Salimo 104:4; 103:20. *
Ana malayika gapali galingwa? Gapali gejinji mnope. Malayika gagasyungulile kucitengu ca ucimwene, ciŵalanjilo cakwe cili “cekulungwa mnope,” kapena kuti “ma 10,000 kutupiya ni ma 10,000.” (Ciunukuko 5:11) Yeleyi yikwamba kulosya kuti malayika gapali mamiliyoni gejinji.
“Nagaweni . . . malayika gejinjii gali gasyungulile citengu ca ucimwene. . . ,Ciŵalanjilo cakwe caliji cekulungwa mnope.”—Ciunukuko 5:11.
Ana malayika gakamulaga masengo gamtuli kalakala?
YAJIKUSASALA BAIBULO
Ndaŵi syejinji Mlungu ŵakamulicisyaga masengo malayika kuti gakasalileje ŵandu maloŵe gakwe, kapena kuti gatumicilaga mpela ŵamitenga ŵa Mlungu. * Baibulo jikusalosyasoni kuti Mlungu ŵakamulicisyaga masengo malayika kutenda yakusimonjesya. Yehofa jwatumisye lilayika kuti likamjaliwe Abulahamu, soni kuti likamlekasye kupeleka mwanagwe, Isaki mpela mbopesi. (Genesis 22:11-18) Lilayika lyawonecele kwa Mose pasikati pa liwukutu lya moto. Lilayikalyo lyamsalile Mose utenga wawacenjile umi wakwe. (Eksodo 3:1, 2) Daniyele paŵamponyisye mwisimbo lya masimba, “Mlungu jwatumisye lilayika ni kuwugala pakamwa pa masimba.”—Danieli 6:22.
“Kaneko lilayika lya Yehofa lyawonecele kwa Mose pasikati pa liwukutu lya miŵa lilyakolelaga moto.”—Eksodo 3:2.
Ana malayika gakusakamula masengo gamtuli masiku agano?
YAJIKUSASALA BAIBULO
Ngaŵa mkumanyilila yosope yagakusatenda malayika masiku agano. Nambope, Baibulo jikusalosya kuti malayika gakusakamula masengo gakwakamucisya ŵandu ŵamitima jambone kuti amanyilile yejinji yakwamba Mlungu.—Masengo 8:26-35; 10:1-22; Ciunukuko 14:6, 7.
Yehofa kupitila mu sagamisi, ŵamlosisye Yakobo malayika gali mkutuluka, soni kukwela kwinani kupitila pa “makwelelo.” (Genesis 28:10-12) Yakobo paŵagaweni malayikago nganakayicila yakuti Yehofa akugakamulicisya masengo. M’wejisoni ngaŵa mkukayicila yakuti Yehofa akusagakamulicisya masengo kuti gakamucisyeje ŵandu ŵakulupicika ŵakusosecela cikamucisyo.—Genesis 24:40; Eksodo 14:19; Salimo 34:7.
“Ŵagaweni makwelelo gagatyocele pacilambo capasi mpaka kwinani, soni malayika gali mkukwela ni kutulukaga kupitila pa makwelelogo.”—Genesis 28:12.
^ ndime 6 Baibulo jikusalosya kuti yakupanganyikwa yausimu yine yajimucile ulamusi wa Mlungu. Yakupanganyikwayi yikusakolanjikwa kuti malayika gakusakala, kapena kuti ‘yiŵanda.’—Luka 10:17-20.
^ ndime 11 Maloŵe ga Cihebeli ni ga Cigiliki gaŵagakamulicisye masengo m’Baibulo pakusala ya “lilayika,” gakusagopolela kuti “jwamtenga.”
You May Also Like
KWANGA KWA YIWUSYO YA M’BAIBULO
Ana Malayika Gali Ŵani?
Ana gapanganyidwe galingwa? Ana gakwete mena soni ndamo?
